¿Tikonmatia?

¿Keyej Esteban yolseujtoya keman moajsia ininixpan akin kiixnamikiaj?

ESTEBAN moajsi ininixpan seki takamej akin kitelixnamikij, 71 uejueyi tamelauanij akin pouij itech Sanedrín uan taixyekanaj ompa Israel. Kinsentilij tayekankatiopixkat Caifás, akin seki metsti achto taixyekanak keman moixtalij maj kimiktianij Jesús (Mat. 26:57, 59; Hech. 6:8-12). Seki takamej kitakajkayauiliaj Esteban. Ompa, keman kiitaj Esteban, tamelauanij kimoujkaitaj porin iixko moita “keme [iixko] se ángel” (Hech. 6:13-15).

¿Toni kipaleuij Esteban maj amo moui, ta maj yolseujto? Achto ke kiuikaskiaj iixpan Sanedrín, kitayekanaltijtoya kichiuas tekit tein kipiaya itech nechikol ika inepaleuil iespíritu Dios tein kipia miak chikaualis (Hech. 6:3-7). Keman moajsia ininixpan tamelauanij, nejon espíritu kiyolseuij uan kielnamiktij seki taman (Juan 14:16). Tein melauj, keman kinnankilij ika yolchikaualis, tein ijkuiliujtok itech Hechos capítulo 7, espíritu kipaleuij maj kielnamiki kemej sempoual tajkuilolmej tein moajsij itech Escrituras Hebreas (Juan 14:26). Sayoj ke itakuaujtamatilis okachi mochikauak keman kiitak Jesús ijkatoya iyekmakopa Dios (Hech. 7:54-56, 59, 60).

Xa se tonal no kinekiskej techchiuiliskej tein amo kuali oso techtajyouiltiskej (Juan 15:20). Komo nochipa tikixtajtoltiaj iTajtol Dios uan titanojnotsaj, tikauaskej maj iespíritu Jiova techixyekana. Uan no tikseliskej chikaualis tein techpaleuis maj titaxikokan keman techixnamikiskej uan maj tiyolseujtokan (1 Ped. 4:12-14).