Kampa monankilia netajtanilmej
◼ ¿Kuali maj itaixpantijkauan Jiova kimoyauakan tanojnotsmej grabados oso tein kikixtiaj itech amat?
Tanojnotsmej bíblicos techyolchikaua (Hech. 15:32). Yejika tiknekij maj no kikaki nejon tanojnots akin amo uelik kikakik. Axkan onkak miak teposmej tein ika uelis mochiuas se grabación ika tanojnotsmej uan uelis momoyauas tel ijsiujka. Sekin kieujtokej miak tanojnotsmej grabados, tein yankuikej uan tein uejkaujya motemakak. Uan xa ika se kuali yolo tetaneujtiaj oso kinchiuiliaj se grabación imin tasojikniuan. Oksekin kikixtiaj se sitio itech Internet, uan ompa kitaliaj tanojnotsmej kampa nochin uelis kikixtiskej.
Amo onkak kuejmol maj tikchiuakan se grabación ika tanojnotsmej komo sayoj tejuan tikuitij oso tochankauan. Uan no, tayekananij itech nechikol uelis kijtoskej maj kichiuilikan se grabación se tokniuj tein mokokoua uan amo ueli monechikoua. Sayoj ke moajsi seki taman keyej maj amo tikmoyauakan tanojnotsmej grabados oso tein kikixtiaj itech amat.
Kemej tikmatij, akin kitemaka tanojnots kinemilia keniuj kinpaleuis takakinij maj motekitilikan kampa kinpoloua. Yejika, komo tikmoyauaj se tanojnots grabado, uelis taman kiajsikamatiskej seki tanemililmej tein kipia porin amo kimatij keyej motemakak nejon tanojnots. Uan no, ouij se kimatis kemanian uan akoni kitemakak, uan amo uelis se takuaujtamatis ox yankuik uan ajsitok (Luc. 1:1-4). Uan komo tikmoyauaj tanojnotsmej grabados oso tein kikixtiaj itech amat, sekin uelis kinuikas maj kitemakakan oso maj kiselikan ueyiitalis (1 Cor. 3:5-7).
Takeual takuaujtamach uan tamatkej tel tekiti, uan ijkon ‘techtamaka [espiritualmente] ijkuak monekiʼ uan kemej moneki (Luc. 12:42). Itech nejon takualis, no yetok tanojnotsmej tein motemaka itech nechikolmej tein kipiaj itaixpantijkauan Jiova, uan grabaciones tein uelis tikixtiskej itech sitio oficial itech Internet www.jw.org. Uelis senkis tikneltokaskej ke takeual takuaujtamach uan tamatkej uan Oloch Taojtokaltianij, techmakaskej tein techpaleuis maj tikpiakan chikauak totakuaujtamatilis (Hech. 16:4, 5).