Dios kintatiochiuia akin kitakamatij

Moisés se takat akin kitematiltiaya tein Dios kijtouaya kijtoj ke Dios techtatiochiuis komo tiktakamatij (Deuteronomio 10:13; 11:27). Amo tiktakamatij Dios porin tikmouiliaj maj techtatsakuilti. Tiktasojtaj porin semi kualtsin tein kichiua uan kemej tanemilia. Uan no, kemej tiktasojtaj tiktakamatij porin amo tiknekij tikyolkokoskej. Biblia kijtoua: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil ten Dios technauatilia ma tikchiutinemikan” (1 Juan 5:3).

¿Toni tatiochiualismej tikseliaj komo tiktakamatij Dios? Maj tikitakan ome.

1. TIMOCHIUAJ TITAMATINIJ KOMO TIKTAKAMATIJ DIOS

“Nejua, Jiova, nimoDios, Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis” (ISAÍAS 48:17).

Jiova toTachijchiujkauj techixmati, uan kuali techixyekana. Komo tiknekij maj techpaleui tein techyolmajxitia maj kuali titaixpejpenakan, moneki maj tiktemokan itech Biblia tein yejuatsin kiyolpaktia uan maj tiktakamatikan.

2. TIYOLPAKIJ KOMO TIKTAKAMATIJ DIOS

“¡Tatiochiualme de Dios nochi nekes ten kiyekakij in Tajtoltsin de Dios uan kitakamatij!” (LUCAS 11:28).

Axkan, millones akin kitakamatij iTajtol Dios semi yolpakij. Maj tikitakan tein kipanok se takat kayot España, yejua niman kualania uan kinchiuiliaya tein amo kuali oksekin, no ijkon kichiuaya iuan inamik. Se tonal kiixtajtoltij tein kijkuiloj tanauatijkej Moisés, ompa ika motajtoua tein kipanok José, ikoneuj Jacob. José kinamakakej kemej takeual uan kitsakkej maski amo teyi kichiujka. Maski kichiuilijkej nejon, kisentokak katka yolnejmach, amo niman kualania uan teikneliaya (Génesis, capítulos 37 hasta 45). Takat akin kayot España kijtoj: “Niknemilis tein kichiuak José nechpaleuij maj nikinchiuili tein kuali oksekin, maj nikualtakat uan maj nikmati nimotsakuilis. Yejua ika axkan semi niyolpaki iniuan nochankauan”.

Itech Biblia techiluia keniuj uelis timouikaskej iniuan oksekin. Maj okachi ika titajtokan nejin itech okse tamachtilis.