Ome tokniuan no peuak pouij iuan Oloch Taojtokaltianij
TONAL 5 DE OCTUBRE XIUIT 2024, motematiltij itech nechikol tein mochiua xijxiujtika ke tokniuan Jody Jedele uan Jacob Rumph no peuak pouij iuan Oloch Taojtokaltianij akin kinixyekanaj itaixpantijkauan Jehová. Nochin omen kuali kitekitilianij Jehová miak xiujmejya.
Jody Jedele uan isiuatsin, Dámaris
Tokniuj Jedele yolik ompa Misuri (Estados Unidos). Itatuan katkaj itaixpantijkauan Jehová uan nemiaj kampa ayamo onkayaj miakej tokniuan. Yejua ika uelik kinixmatik miakej de okseki altepemej akin yayaj ompa tapaleuitij. Kemej kiitaya ke tokniuan semi motasojtayaj uan kuali mouikayaj semi kipaleuij. Moauij itech 15 de octubre xiuit 1983. Semi kiuelitaya tanojnotsas uan keman kisak den escuela, mochiuak precursor regular itech septiembre xiuit 1989.
Keman yejua uan iikniuj siuapil katkaj nojnelmejok, itatuan kemansa kinuikayaj Betel. Nejon kinyolchikauak maj kinekikan ompa tapaleuiskej uan satepan kinyoleujkej. Tokniuj Jedele peuak tapaleuia Betel de Wallkill itech septiembre xiuit 1990. Keman ajsik tapaleuij itech Departamento de Limpieza uan satepan itech Servicios Médicos.
Seki nechikolmej kampa tajtouayaj español tein yetoyaj amo uejka de Betel semi momiakilijtoyaj, yejua ika monekia maj tapaleuitij tokniuan takamej. Uan tokniuj Jedele peuak ompa tapaleuia uan momachtij español. Tepitsin satepan kiixmatik Dámaris, se precursora akin yetoya itech icircuito. Satepan monamiktijkej, uan Dámaris no peuak tapaleuia Betel.
Itech xiuit 2005 kiskej de Betel para kiyekpiaskej imomaj Jedele uan itatuan Dámaris. Keman kinyekpixtoyaj inintatuan, tapaleuijtoyaj kemej precursores regulares, uan tokniuj Jedele miakpa no kitemakaya Tamachtilis para akin Tekitij kemej Precursor. No kinpaleuij Tayekananij akin Tetajtouiaj itech Tapajtiloyamej uan Tokniuan akin Kiixyekanaj Kalchiualis kampa yejuan nemiaj.
Itech xiuit 2013 oksepa kinyoleujkej Betel para maj tapaleuikan maj mochijchiua ueyi kali ompa Warwick. Desde ijkuak no tapaleuianij Patterson uan Wallkill. Yejua tapaleuiani Kampa Moixtalia uan Moixyekana Kalchiualis uan Kampa Tematiltiaj ika Tapajtiloyamej. Itech marzo xiuit 2023 kiixtalijkej maj kinpaleui Tokniuan akin kiixyekanaj tanojnotsalis. Yejua techiluia keniuj momachilia keman itech tanemilia tekimej tein kipiani: “Keman tikseliaj se yankuik tekit, kemansa tikmachiliaj ke amo uelis tikchiuaskej. Keman ijkon techpanoua, maj tikelnamikikan ke semi moneki maj titakuaujtamatikan iuan Jehová porin yejua techpaleuia maj tikchiuakan tein yeski tein technauatia”.
Jacob Rumph uan isiuatsin, Inga
Tokniuj Rumph yolik ompa California (Estados Unidos). Keman katka konetsin, imomaj amo monechikouayaok nion tanojnotsayaok, sayoj ke nochipa mochikauak kinextilis tein Biblia tamachtia. Xijxiujtika, tokniuj Rumph no kikalpanouaya iueyinan, yejua tel kuali kitekitiliaya Jehová uan kipaleuij maj kineki momachtis. Yejua ika keman kipiaya 13 xiujmej tajtanik maj kimachtikan Biblia. Itech 27 de septiembre xiuit 1992 moauij keman katka telpochok. Uan no, imomaj oksepa peuak monechikoua uan tanojnotsa, uan nochin ichankauan no peuak kitekitiliaj Jehová uan moauijkej.
Keman Rumph katka telpoch, kiitaya ke precursores semi yolpakiaj. Yejua ika keman kisak de escuela, no mochiuak precursor itech septiembre xiuit 1995. Itech xiuit 2000 yajki tapaleuito Ecuador kampa monekiaj tanojnotsanij. Ompa kiixmatik Inga, se precursora de Canadá uan satepan monamiktijkej. Niman ke monamiktijkej yajkej tapaleuitoj itech se xolaltsin de Ecuador kampa amo miakej mosentiliayaj uan katka se grupo. Axkan moajsi se nechikol kampa miakejya mosentiliaj.
Satepan kinixtalijkej kemej precursores especiales, uan de ompa no peuak takalpanouaj itech nechikolmej. Itech xiuit 2011 kinyoleujkej maj kiselikan tamachtilis 132 de Galaad. Satepan ke tamik nejon tamachtilis, miakkan tapaleuijkej uan no katkaj betelitas, misioneros uan takalpanouanij. Uan tokniuj Rumph no kitemakak Tamachtilis para akin kiteixmatiltiaj iTaixyekanalis Dios.
Keman peuak kokolis COVID-19, mokepkej Estados Unidos. Kinyoleujkej maj tapaleuikan Betel de Wallkill, kampa tokniuj Rumph kimachtijkej itech Departamento de Servicio. Satepan kintitankej Betel de Ecuador, uan ompa tokniuj Rumph iniuan tekitik tokniuan akin kiixyekanaj sucursal. Itech xiuit 2023 kintitankej Warwick, uan enero de 2024 tokniuj Rumph kiixtalijkej maj kinpaleui Tokniuan akin kiixyekanaj tanojnotsalis. Yejua kijtoua keniuj momachilia keman kinemilia kani tapaleuiani: “Tiyolpakij tiktekitiliskej Jehová kampa techtitanij, sayoj ke okachi tiyolpakij porin tiktekitiliaj iniuan tokniuan”.
Semi tiktasojkamatij tekit tein kichiuaj nejin tokniuan uan ‘nochipa tikintakachiuajʼ (Filip. 2:29).