Josué

22 Satepan Josué okinnechiko rubenitas, gaditas uan tlajko itribu Manasés 2 uan okinmilui: “Namejuan yonankichijkej nochi tlen onamechnauati Moisés itekipanojka Jehová. Noijki yonankichijkej nochi tlen ne onamechnauati. 3 Desde yiuejkika hasta axkan nankinpaleuijtokej namokniuan uan nankichijtokej tlen Jehová namoDios onamechnauati. 4 Ijkon ken okijtojka Jehová namoDios, ye okinyolseui namokniuan. Ikinon axkan namejuan uelis nanmokopaskej kanin katej namokaltsitsinuan.* Kanin kajki tlali tlen Moisés itekipanojka Jehová onamechmakak ik okse lado aueyatl* Jordán. 5 Namejuan xikintlakamatikan* nochi tlanauatilmej tlen katej itech iTlanauatil Moisés itekipanojka Jehová. Xiktlasojtlakan Jehová namoDios, nochipa xikchiuakan tlen kineki,* xikintlakamatikan itlanauatiluan, amo xikkauakan, xiktekichiuilikan ika nochi namoyolo uan ika nochi namoyolilis”.*

6 Satepan Josué okinteochi uan okinnauati mauiaj kanin katej inkaltsitsinuan. 7 Moisés okinkajteuili tlali ompa Basán tlajko itribu Manasés uan Josué okinmakak tlali ok tlajko itribu Manasés ik Jordán ik kanin motlatia tonaltsin, ik kanin chantij inmikniuan. Josué okinteochi uan okinmilui mamokopakan kanin katej inkaltsitsinuan 8 uan okinmilui: “Ijkuak nanmokopaskej kanin katej namokaltsitsinuan xikuikakan miak tlamantli patio, miakej toros uan vacas, plata, oro, cobre, tepostli uan miak tsotsoli.* Xikuikakan tlen okachi kuali onankitlankej ijkuak onanuiaj guerra uan xikinmakakan namokniuan”.

9 Satepan rubenitas, gaditas uan tlajko itribu Manasés okinkajtejkej israelitas uan okikajkej altepetl Siló tlen kajki Canaán. Ijkon ken Jehová okinauatijka Moisés, yejuan omokopkej Galaad kanin ochantiayaj, tlen okatka inmiaxka. 10 Ijkuak rubenitas, gaditas uan tlajko itribu Manasés oajsitoj ik kanin kajki aueyatl Jordán kanin tlami Canaán, okichijkej se altar sapanoua ueyi uan tetlajtlachialti inakastlan aueyatl Jordán. 11 Satepan oksekimej israelitas okimatkej sekimej okijtouayaj: “¡Xikita! Rubenitas, gaditas uan tlajko itribu Manasés okichijkej se altar ik kanin kajki aueyatl Jordán kanin tlami Canaán ik kanin kajki intlal israelitas”. 12 Ijkuak ijkon okimatkej, nochtin israelitas omonechikojkej Siló para kinmiktitiuij.

13 Ikinon israelitas okititlankej Finehás ikone teopixki Eleazar ompa Galaad kanin okatkaj rubenitas, gaditas uan tlajko itribu Manasés. 14 Noijki oyayaj majtlaktli akinmej okinyekanayaj israelitas. Sejse yejuan okinyekanayaj sejse intribu israelitas uan noijki yejuan okinyekanayaj sejse infamilia israelitas. 15 Ijkuak oajsitoj Galaad kanin okatkaj rubenitas, gaditas uan tlajko itribu Manasés, okinmiluijkej:

16 “Nin tlen kijtoua nochi ialtepe Jehová: ‘Namejuan onankikajkayajkej inDios israelitas, amo onankichijkej tlen Jehová kineki porque onankichijkej altar uan onankixnamikej Jehová. 17 ¿Amo sapanoua yotitlajyouijkej ika tlen opanok ompa Peor? Maski miakej tlen opouiayaj itech ialtepe Jehová okinmiktijkej ok titlajyouiaj ika tlen amo kuali okichijkej. 18 ¡Namejuan nankinekij nankikauaskej Jehová! Tla namejuan nankixnamikij Jehová, mostla ye kualanis inuan nochtin israelitas. 19 Tla nankimachiliaj tlali kanin nankatej amo chipauak, xipanokan itech itlal Jehová kanin kajki itabernáculo Jehová, ompa touan xichantikan. Pero amo xikixnamikikan Jehová nion xikchiuakan okse altar porque kajki san se ialtar Jehová toDios. 20 Ijkuak Acán ikone Zérah amo otetlakamatki* ijkuak okijtojkej omonekiaya nochi kipojpoloskej, nochtin israelitas otlajyouijkej uan ijkuakon amo san ye omiki’”.

21 Ikinon rubenitas, gaditas uan tlajko itribu Manasés okinnankilijkej tlakamej akinmej okinyekanayaj infamilias israelitas: 22 “¡Jehová Dios akin okachi ueyititok! ¡Jehová Dios akin okachi ueyititok! Ye kimati tlen opanok uan nochtin israelitas kimatiskej. Amo techpaleuikan tla otikkajkayajkej uan otikixnamikej Jehová. 23 Tla otikchijkej se altar para ayakmo tikueyichiuaskej Jehová uan para ompa tikintlaliskej tetliokolilmej tlen mochichinouaj,* tetliokolilmej tlen mochiuaj ika semilla uan tetliokolilmej tlen tesetiliaj, Jehová matechixkomaka. 24 Pero tejuan otikchijkej nin porque otechtekipachouaya satepan namokoneuan makinmiluikan tokoneuan: ‘¿Namejuan tlen nankipiaj nankitaskej iuan Jehová inDios israelitas? 25 Jehová okitlali aueyatl Jordán para makitlajkoxelo totlal uan namotlal, noijki intlal rubenitas uan gaditas. Namejuan amitlaj nankipiaj nankitaskej iuan Jehová’. Ikinon namokoneuan amo kinkauiliskej tokoneuan makiueyichiuakan Jehová”.

26 “Ikinon otikijtojkej: ‘Matikchiuakan se altar pero amo para tikinchichinoskej* tetliokolilmej nion tikintemakaskej okseki tlatlamantli tetliokolilmej, 27 okachi kuali matikchiuakan para techilnamiktis uan kinmilnamiktis toxuiuan, moneki tikintemakaskej ixpan Jehová tetliokolilmej tlen mochichinouaj, tetliokolilmej tlen tesetiliaj uan okseki tlatlamantli tetliokolilmej. Ijkon namokoneuan amo kinmiluiskej tokoneuan: “Namejuan amitlaj nankipiaj nankitaskej iuan Jehová”’. 28 Ikinon otikijtojkej: ‘Tla yejuan ijkon techiluiskej uan noijki satepan ijkon kinmiluiaj tokoneuan, tejuan tikinmiluiskej: “Xikitakan altar tlen okichijkej touejkatatajuan, mota ken ialtar Jehová tlen nankipiaj kanin nanchantij uan non techilnamiktis san sekan tiktekichiuiliaj toTajtsin Dios uan amo para tikchichinoskej* okseki tlatlamantli tetliokolil”’. 29 ¡Tejuan amo tikchiuaskej okse altar ijkon ken ialtar Jehová toDios tlen kajki iyekapan itabernáculo para tikintemakaskej tetliokolilmej tlen mochichinouaj, tetliokolilmej tlen mochiuaj ika semilla uan okseki tlatlamantli tetliokolil! ¡Porque tejuan amo tikixnamikiskej Jehová nion tikkauaskej Jehová!”.

30 Teopixki Finehás, tlakamej tlen okinyekanayaj nochtin israelitas uan akinmej okinyekanayaj sejse infamilia israelitas, opakej ijkuak okikakej tlen okijtojkej ixuiuan Rubén, ixuiuan Gad uan ixuiuan Manasés. 31 Finehás ikone teopixki Eleazar okinmilui ixuiuan Rubén, ixuiuan Gad uan ixuiuan Manasés: “Axkan tikmatij Jehová touan kajki porque amo onankikajkayajkej Jehová. Namejuan onankinmakixtijkej imak Jehová nochtin israelitas”.

32 Satepan Finehás ikone teopixki Eleazar uan akinmej okinyekanayaj israelitas okinkajtejkej ompa Galaad rubenitas uan gaditas. Satepan omokopkej inmialtepe Canaán uan okinmiluijkej oksekimej israelitas nochi tlen opanok. 33 Israelitas opakej ijkuak okikakej nochi non. Okiueyichijkej toTajtsin Dios uan okijtojkej ayakmo kinmiktitiuij nion kinkixtilitiuij intlal rubenitas uan gaditas.

34 Satepan rubenitas uan gaditas okitlalilijkej itoka non altar,* porque okijtouayaj: “Touan kajki Jehová akin melauak toTajtsin Dios”.