Achto ilibro Samuel
2 Satepan Ana ijkin omotlatlaujti:
“Niktlasojkamatilia Jehová porque niyolpaki;
Jehová nechmaka nochikaualis.
Niyetos niyolchikauak para nikinnankilis akinmej nechkokoliaj,
ne niyolpaki porque titemakixtia.
2 Amikaj santo ijkon ken tejuatsin, Jehová.
Amikaj onka ken tejuatsin.
ToTajtsin Dios, san tejuatsin tichikauak ken se ueyi tetl.*
3 Amo ximoueyinekikan ijkuak nantlajtouaj.
Amo xikijtokan tlen amo ipati,
porque Jehová Dios nochi kimati
uan ye kimati kox kuali noso amo kuali tlen kichiuaj tlakamej.
4 Pojpostekij inmiarco tlakamej tlen chijchikauakej
pero akinmej amo chikauakej kinmakaj chikaualis.
5 Akinmej okipiayaj miak tlakuali moneki tekipanoskej para kipiaskej tlen kikuaskej
pero akinmej apismikij yikipiaj tlen kikuaskej.
Siuatl tlen amo ueli okinpiaya ikoneuan axkan kinpia chikome ikoneuan
pero akin okinpiaya miakej ikoneuan iselti omoka.
6 Jehová techmaka uan techkixtilia tonemilis.
Ye kichiua matiakan uan matikisakan ijtik Mikatekochtli.*
7 Jehová kichiua matikpiakan miak tlamantli uan kichiua amo matikpiakan miak tlamantli.
Ye kichiua matechpinauikan uan matechueyitlalikan.
8 Ijtik tlalpinoli* kikixtia akin yolyamanki
uan ijtik miak tlikonextli kikixtia akin amitlaj kipia
para kintlalis iuan príncipes
uan kichiuas makintlakaitakan ijkuak yetoskej tekiuajkej.
Jehová iaxka kanin peua tlaltikpak
uan iaxka kanin tlamochiua.
9 Ye kinmaluia kanin yauij akinmej amo kikauaj
pero akinmej amo yolkualmej kinkamatsakua kanin tlayoua,
porque tlakatl amo uelis tlatlanis san ika ichikaualis.
10 Jehová kinxaxamanis akinmej kinekiskej kixnamikiskej
uan ijkuak kikualaniskej kichiuas matlatijtikuini iluikak.
Jehová tlaixkomakas ipan nochi tlaltikpak.
Kimakas chikaualis itekiua.
Akin ye okipejpenki kimakas chikaualis”.
11 Satepan Elcaná oyajki ikalijtik ompa Ramá. Pero chokotsin omoka iuan teopixki Elí uan opejki kitekichiuilia Jehová.
12 Ikoneuan Elí sapanoua okichiuayaj tlen amo kuali, yejuan amo okitlakaitayaj Jehová. 13 Okatkaj teopixkej pero amo san okimokauiayaj tlen okinmakayaj, yejuan ijkin okichiuayaj: ijkuak se tlakatl okitetliokoliaya se yolkatl uan ijkuak oposontoka, akin okipaleuiaya teopixki okiuikaya se ueyi tenedor 14 uan okikalakiaya ijtik kaxitl, ijtik cazuela tlen kipia ome inakas, ijtik tlen oposontoka nakatl noso ijtik komitl. Teopixki okimokauiaya nochi tlen tenedor okikixtiaya. Ijkon okintoktiayaj* nochtin israelitas tlen oyayaj altepetl Siló. 15 Noijki achto kichichinoskiaj* chiauak, akin okipaleuiaya teopixki okiluiaya tlakatl tlen okitemakaya tetliokolil: “Xikmaka teopixki nakatl tlen kitliuatsaj, ye amo kiselis tlen san kiposoniaj. Ye san kineki nakatl tlen ayamo kikxitiaj”. 16 Pero tlakatl okijtouaya: “Achto xikitakan makichichinokan* chiauak, satepan uelis tikmokauis tlen tiknekis”. Akin okipaleuiaya teopixki okiluiaya: “Amo, san niman techmaka nakatl. Tlamo techmakas nimitskixtilis”. 17 Akinmej ompa otlapaleuiayaj sapanoua otlajtlakolchiuayaj ixpan Jehová porque amo okitlakaitayaj tlen okitliokoliayaj Jehová.
18 Samuel okitekichiuiliaya Jehová maski ok okatka chokotsin uan okonakiaya* se efod* de lino. 19 Noijki sejse xiuitl imama okichiuiliaya se itlaken makoto uan okiuikiliaya ijkuak ye uan inamik oyayaj kikauatiuij tetliokolil, ijkon ken okichiuayaj sejse xiuitl. 20 Elí okiteochi Elcaná uan isiua. Ye okijto: “Jehová makichiua xikpia okse mokone iuan mosiua porque ye okitemakak ikone ixpan Jehová”. Satepan yejuan omokopkej inkalijtik. 21 Jehová okiknomatki Ana ikinon ye okinpixki oksekimej ikoneuan, okinpixki eyi itelpochuan uan ome ichpochuan. Samuel omoskaltijtiaya ijkuak okitekichiuiliaya* Jehová.
22 Elí sapanoua yokokoxkatika* pero okimatiaya nochi tlen ikoneuan okintoktiayaj israelitas. Noijki okimatiaya yejuan omotekayaj inuan siuamej tlen otlapaleuiayaj ikaltempa kalnechikol. 23 Ye okinmiluiaya ikoneuan: “¿Tleka ijkon nankichijtinemij? Nochtin nechiluiaj namejuan nankichijtinemij tlen amo kuali. 24 Nokoneuan, amo kuali tlen kijtojtinemij akinmej chantij ialtepe Jehová. 25 Tla se tlakatl tlajtlakolchiua ixpan okse tlakatl, xamo ikaj ipatka kitlatlaujtis Jehová. Pero tla ikaj tlajtlakolchiua ixpan Jehová, ¿akin ipatka motlatlaujtis?”. Yejuan amo okitlakamatkej* ipapa, porque Jehová yokijtojka kinmiktis. 26 Ijkuak Samuel omoskaltijtiaya, Jehová uan oksekimej okachi okitlasojtlayaj.
27 Satepan toTajtsin Dios okititlanki se tlakatl makiluiti Elí: “Nin tlen kijtoua Jehová: ‘¿Amo onikchi kuali manechixmati ifamilia mouejkatata ijkuak okatkaj itlakeualuan faraón ompa Egipto? 28 Itech nochtin intribus israelitas ye onikpejpenki manechtekichiuili ken teopixki. Ye onikpejpenki para manechtlatliokoli uan para makichichino* kopali kanin kajki noaltar, noijki para noixpan makiuika efod. Ifamilia mouejkatata onikinmakak nochi tetliokolilmej tlen mochiuaj ika tlitl tlen kitemakaj israelitas. 29 ¿Tleka nankixtopeuaj tlen onitlanauati makitemakakan uan makitetliokolikan nokalijtik? ¿Tleka okachi tikinpatioita mokoneuan uan amo ne? ¿Tleka san nanmotomauaj ika tlen okachi kuali kitetliokoliaj israelitas?’”.
30 “‘Nin tlen kijtoua Jehová inDios israelitas: “Ne onikijtojka mofamilia uan ifamilia mouejkatata nochipa nechtekichiuiliskiaj”. Pero axkan Jehová ijkin kijtoua: “Ne ayakmo ijkon nimokuayejyekoua.* Porque ne nikintlakaitas akinmej nechtlakaitaj pero akinmej nechtlauelitaj ne noijki nikintlauelitas”. 31 Yiajsis tonal ijkuak te ayakmo tikpias chikaualis nion ifamilia mopapa kipias chikaualis. Nion se tlakatl tlen poui itech mofamilia kajxitis miak xiuitl. 32 Itech nokalijtik tikpias akin mitskokolis pero israelitas kuali yetoskej. Itech mofamilia nion se tlakatl kajxitis miak xiuitl. 33 Se tlakatl tlen poui itech mofamilia tlen onikkauili manechtekichiuili kanin kajki noaltar kichiuas xiixtlami uan sapanoua ximotekipacho. Pero miakej tlen pouij itech mofamilia kinmiktiskej ika espada. 34 Para tikneltokas mochiuas tlen axkan nimitsiluijtok ijkin kinpanos, ome mokoneuan Hofní uan Finehás san sekan mikiskej itech se tonal. 35 Satepan nikpejpenas se teopixki tlen nochipa manechtlakamati* uan ye kichiuas tlen nikyolneki. Nikchiuas ixuiuan nochipa matlapaleuikan ken teopixkej uan nochipa kitekichiuiliskej akin onikpejpenki. 36 Akinmej ok mokauaskej mokalijtik ixpan motlankuaketsaskej, kitlajtlaniliskej pan uan tekitl para makintlaxtlauikan. Sejse kijtos: “Nimitstlatlaujtia, techkauili manitekipano ken teopixki para nikpias tlen nikkuas”’”.