Josué
23 Satepan ijkuak Jehová yokinyolseuijka israelitas, yokinmakixtijka inmak akinmej okinkokoliayaj uan Josué yokipiaya miak xiuitl uan yimikiskia, 2 Josué okinnechiko nochtin israelitas, tlayekankej, jueces, akinmej otlayekanayaj uan akinmej okinnauatiayaj israelitas uan okijto: “Yonikokoxkatik* uan yinimikis. 3 Namejuan onankitakej ken Jehová namoDios namouan okatka ijkuak onankinmiktitoj akinmej onamechkokoliayaj. Noijki onankitakej nochi tlen Jehová namoDios okintokti* namopatka ninmej altepemej. 4 Xikilnamikikan ken nochtin tribus onikinmakak nochi nin tlali ijkon ken okistiaya uan ken onikintlanili uan onikinkixtili nochi intlal ninmej altepemej, desde ik kanin kajki aueyatl* Jordán hasta kanin kajki mar Grande,* ik kanin motlatia tonaltsin. 5 Jehová namoDios ika ichikaualis, namoixpan okinkixti uan okinkixtili intlal para namejuan ompa xichantikan. Ijkon ken Jehová namoDios onamechiluijka”.
6 “Ikinon ximoyolchikauakan para nankitlakamatiskej* uan nankichiuaskej nochi tlen ijkuilitok itech iTlanauatil Moisés. Moneki nochipa xiktlakamatikan* nochi tlen ompa kijtoua uan ijkon amo nanyaskej itech okse ojtli.* 7 Amo keman ximouikakan inuan akinmej chantij itech ninmej altepemej. Amo xikinmijtokan intoka indioses. Nion itlaj xikijtokan* ika intoka indioses. Amo keman xikinueyichiuakan nion inmixpan ximotlankuaketsakan. 8 Namejuan amo moneki nankikauaskej Jehová namoDios, ijkon ken nankichijtokej. 9 Namoixpan Jehová kinkixtis akinmej chantij itech altepemej tlen kinpiaj miakej soldados. Ikinon hasta axkan akinmej namechkokoliaj amo ueli namechtlaniliaj. 10 Sejse namejuan uelis nankintlaniliskej 1,000 soldados, porque Jehová namoDios namechpaleuijtok ijkon ken okijtojka. 11 Ximochijchikauakan para amo keman nankikauaskej nankitlasojtlaskej Jehová namoDios”.
12 “Pero tla namejuan amo nantechtlakamatij,* nanmotokiaj inuan akinmej chantij itech nonmej altepemej, inuan nanmouikaj uan inuan nanmonamiktiaj, 13 xikmatokan Jehová namoDios, amo kinkixtilis intlal nonmej altepemej. Yejuan mochiuaskej ken se trampa, ken se mekatl uan ken uitstli itech namoixtololouan hasta manamechixpolokan itech nin kuali tlali tlen Jehová namoDios onamechmakak”.
14 “Pero axkan xikmatikan ne yinimikis uan namejuan kuali nankimatij ika nochi namoyolo uan ika nochi namoyolilis* omochi nochi tlamantli kuali tlen okijto Jehová namoDios. Nochi omochi namopatka uan opanok tlen okijto. 15 Pero ijkon ken omochi nochi tlamantli kuali tlen Jehová namoDios okijto, noijki Jehová namechtlajyouiltis ijkon ken okijto uan namechkixtilis nin tlali tlen Jehová namoDios onamechmakak. 16 Tla namejuan amo nankitlakaitaj acuerdo tlen Jehová namoDios onamechnauati xikchiuakan, tla nankiueyichiuaj oksekimej dioses uan inmixpan nanmotlankuaketsaj, Jehová namoDios namouan kualanis uan namechkixtis itech tlali tlen onamechmakak”.