Tlen okijkuilo Mateo
7 “Ayakmo xitlateneuakan* uan ijkon amo namechteneuaskej.* 2 Porque ijkon ken namejuan nantlateneuaj,* noijki ijkon namechteneuaskej.* Uan namechtoktiskej ijkon ken nankintoktiaj oksekimej. 3 ¿Tleka tikita uitstli tlen kajki ijtik ixtololo mokni pero amo tikita kouitl tlen kajki ijtik moixtololo? 4 ¿Tleka tikiluia mokni: ‘Techkauili manimitskixtili uitstli tlen kajki ijtik moixtololo’, tla te tikpia se kouitl ijtik moixtololo? 5 ¡Te tikpia ome moixko! Achto xikmokixtili kouitl tlen kajki ijtik moixtololo uan ijkon tikitas ken tikkixtilis uitstli tlen kajki ijtik ixtololo mokni”.
6 “Amo xikinmakakan itskuintin tlamantli tlen iaxka toTajtsin Dios. Noijki amo xikinmakakan pitsomej* namoperlas, tlamo ipan tlajtlaksaskej,* namopan mokopaskej uan namechkojkoskej”.
7 “Xiktlajtlantokan uan namechmakaskej, xiktemojtokan uan nankajsiskej, xikuiuitekikan* puerta uan namechtlatlapoliskej. 8 Porque akin itlaj kitlajtlani kiselia, akin itlaj kitemoua kajsi uan akin kiuiuiteki* puerta kitlatlapoliaj. 9 ¿Nankimakaskej namokone se tetl tla namechtlajtlanilia pan? 10 Noso ¿nankimakaskej se kouatl tla namechtlajtlanilis se michin? 11 Namejuan nankinmakaj tlen kuali namokoneuan maski nantlajtlakolejkej. ToTajtsin Dios tlen kajki iluikak okachi kinmakas tlen kuali akinmej kitlajtlaniliaj”.
12 “Xikchiuakan nochi tlen namechpaktiskia manamechchiuilikan oksekimej. Non tlen tlamachtia iTlanauatil Moisés uan tlen okijkuilojkej profetas”.
13 “Xikalakikan itech puerta tlen amo patlauak. Porque ixpoliuij akinmej kalakij itech puerta patlauak uan itech ojtli patlauak, uan miakej kalakij itech non puerta. 14 Pero nochipa yoltoskej akinmej kalakij itech puerta tlen amo patlauak uan itech ojtli pitsauak, uan amo miakej kajsij”.
15 “Ximomaluikan porque profetas tekajkayajkej motaj ken ichkamej, pero amo yolkualmej ken tekuanimej. 16 Nankinmixmatiskej ika tlen kichiuaj. Amikaj kiteki uvas nion higos itech uitsyo. 17 Noijki se kuali kouitl kitemaka kuajkuali tlakilotl, pero se kouitl tlen yopalanki amo kuajkuali itlakilo. 18 Se kuali kouitl amo kitemaka tlakilotl tlen amo kuajkuali. Noijki se kouitl tlen yopalanki amo kitemaka kuajkuali tlakilotl. 19 Kouitl tlen amo kuajkuali itlakilo kitsontekij uan kitlamotlaj ijtik tlitl. 20 Ijkon nankinmixmatiskej nonmej tlakamej ika tlen kichiuaj”.
21 “Amo nochtin akinmej nechiluiaj: ‘NoTeko, noTeko’, kalakiskej itech Tekiuajkayotl tlen kajki iluikak. San kalakiskej akinmej kichiuaj tlen kineki noTajtsin tlen kajki iluikak. 22 Non tonal, miakej nechiluiskej: ‘NoTeko, noTeko, tejuan otitetlapouijkej ika motoka, ika motoka otikinkixtijkej ejekamej* uan ika motoka otikinchijkej miakej milagros’. 23 Pero ne nikinmiluis: ‘¡Namejuan amo namechixmati! ¡Xiakan namejuan porque amo nankitlakamatij* tlanauatil!’”.
24 “Akin nechkaki uan nechtlakamati,* yetoskia ken se tlakatl ixtlamatki tlen omokalti ipan tetl. 25 Ijkuak okiauik, otlatenki uan ejekatl chikauak okitlauitek kali, pero kali amo oxixinki porque kuali omotlakxilijtoka ipan tetl. 26 Pero akin nechkaki uan amo nechtlakamati,* yetoskia ken se tlakatl amo ixtlamatki tlen omokalti ipan xali. 27 Ijkuak okiauik, otlatenki uan ejekatl chikauak okitlauitek kali. Kali ouetsito uan nochi oxixinki”.
28 Ijkuak Jesús otlanki okintlapoui, nochtin omotlajtlachialtijkej ken otlamachtiaya. 29 Porque ye otlamachtiaya tlen kijtoua toTajtsin Dios, uan amo ijkon ken akinmej otlamachtiayaj tlanauatil.