Tlen okijkuilo Lucas
5 Se tonal, Jesús omoketoka itempa atl tlen itoka Genesaret.* Ompa sapanoua miakej omonechikojkej porque okinekiayaj kikakiskej iTlajtol toTajtsin Dios. 2 Ye okinmitak ome barcos itempa atl. Akinmej omichkitskiayaj otemokej uan okinpaktokaj inmichayauan. 3 Jesús otlejkok itech se barco tlen okatka iaxka Simón uan okilui makiuika okachi uejkatsin. Satepan omotlali uan opejki kinmachtia akinmej okatkaj itempa atl. 4 Ijkuak otlanki okinmachti, okilui Simón: “Xikuika barco kanin okachi tlauejkatlan, ompa xikintlamotlakan michayamej para nanmichkitskiskej”. 5 Pero Simón okinankili: “Tlamachti, nochi se youali otitekipanojkej uan amitlaj otikajsikej. Pero nikintlamotlas michayamej ijtik atl porque te ijkon tikijtoua”. 6 Ijkuak ijkon okichijkej, sapanoua miakej michimej okinkitskijkej uan michayamej opejki tsayanij. 7 Ikinon ika señas okinnotskej akinmej inuan otekipanouayaj tlen okatkaj itech okse barco makinpaleuitij. Yejuan okinpaleuitoj uan okintemitijkej ome barcos. Barcos opejki apolakij porque sapanoua otentokaj. 8 Simón Pedro omotlankuaketski ixpan Jesús ijkuak okitak tlen opanok uan okilui: “NoTeko amo ximotoki nonauak porque nitlajtlakole”. 9 Ijkon okijto porque ye uan akinmej ompa okatkaj sapanoua omotlajtlachialtijkej ijkuak okinkitskijkej miakej michimej. 10 Santiago uan Juan itelpochuan Zebedeo noijki omotlajtlachialtijkej. Yejuan san sekan otekipanouayaj iuan Simón. Pero Jesús okilui Simón: “Ayakmo ximomojti. Axkan tikintemos tlakamej ijkon ken timichkitskia”. 11 Satepan okinuikakej barcos itempa atl. Nochi otlakajtejkej uan oyajkej iuan Jesús.
12 Okse tonal, Jesús okatka itech se altepetl uan ompa oajsito se tlakatl tlen opalanki nochi inakayo.* Ijkuak tlakatl okitak Jesús, ixpan omotlankuaketski uan okitlatlaujti: “NoTeko, ne nikmati tla te tiknekis uelis techpajtis”. 13 Jesús okikitski uan okilui: “Ne nikneki xipajti”. Ijkon san niman oualpajtik. 14 Jesús okinauati tlakatl amikaj makilui tlen opanok. Noijki okilui: “San xikitati teopixki uan xikuika motlatliokolil ijkon ken otlanauati Moisés porque yotipajtik. Ijkon tikteititis yotipajtik”. 15 Pero tlen okichiuaya Jesús uejka omomatki. Miakej omonechikouayaj porque okinekiayaj kikakiskej uan okinekiayaj makinpajti. 16 Pero ye oyaya kanin amikaj okitaya uan ompa omotlatlaujtiaya.
17 Se tonal, Jesús otlamachtijtoka itech se kali uan ompa okatkaj* sekimej fariseos uan akinmej otlamachtiayaj iTlanauatil Moisés. Yejuan oualayaj itech altepetl Galilea, Judea uan Jerusalén. Jehová okimakak chikaualistli Jesús para makinpajti kokoxkej. 18 Ijkuakon sekimej tlakamej okiualikakej se tlakatl tlen amo ueli omoliniaya uan okiualmamayaj ipan petlatl. Yejuan okinekiayaj kikalakiskej uan kitlaliskej ixpan Jesús. 19 Pero amo ueli oajsiayaj kanin okatka Jesús porque miakej ompa okatkaj. Ikinon otlejkokej ikpak* kali uan ompa okitemouijkej tlakatl ipan petlatl. Okitemouijkej intlajko oksekimej uan okitlalijkej ixpan Jesús. 20 Ijkuak Jesús okitak yejuan otlaneltokayaj, okilui tlakatl tlen amo ueli omoliniaya: “Noyolikni, ne yonimitstlapojpoluili motlajtlakol”. 21 Fariseos uan akinmej otlamachtiayaj tlanauatil okimoluijkej: “¿Akin nin tlakatl tlen tlauijuikaltia? San toTajtsin Dios ueli techtlapojpoluilia totlajtlakol”. 22 Jesús okimatki tlen omokuayejyekouayaj* uan okinmilui: “¿Tlen nanmokuayejyekouaj?* 23 ¿Tlen okachi amo oui? ¿Nikiluis yoniktlapojpoluili itlajtlakol noso nikiluis mamoketsa uan manejnemi? 24 Pero ijkon nankitaskej iKone Tlakatl yokinauatijkej makintlapojpoluili intlajtlakol akinmej chantij tlaltikpak...”. Ijkuakon okilui tlakatl tlen amo ueli omoliniaya: “Ne nimitsiluia: ‘Ximoketsa, xikonana mopetl uan xiuia mochan’”. 25 Tlakatl teixpan omoketski, okonanki ipetl tlen ipan okatka uan oyajki ichan. Ye okiueyichijtiaj toTajtsin Dios. 26 Nochtin omotlajtlachialtijkej uan opejki kiueyichiuaj toTajtsin Dios. Noijki omomojtijkej uan okijtojkej: “¡Axkan otikitakej miak tlamantli tetlajtlachialti!”.
27 Satepan Jesús oyajki uan okitak se tlakatl itoka Leví tlen otominololouaya. Ye okatka* kanin otominololouayaj uan Jesús okilui: “Nouan xiuiki”. 28 Leví omoketski, nochi otlakajte uan oyajki iuan Jesús. 29 Satepan Leví ompa ichan okiluichiuili Jesús. Ompa noijki otlakuajkej miakej tominololojkej uan oksekimej. 30 Fariseos uan oksekimej tlen otlamachtiayaj tlanauatil, amo okinpakti uan okinmiluitoj idiscípulos Jesús: “¿Tleka nantlakuaj uan itlaj nankonij inuan tominololojkej uan akinmej tlajtlakolchiuaj?”. 31 Ijkuak Jesús okitak tlen opanotoka, okinmilui: “Akinmej amo mokokouaj amo moneki kinpajtiskej, pero kokoxkej moneki kinpajtiskej. 32 Ne onikinmiluiko tlajtlakolejkej mamoyolkopakan uan amo ijkon onikinmiluiko akinmej yolkualmej”.
33 Yejuan okiluijkej: “Idiscípulos Juan uan indiscípulos fariseos amo tlakuaj* uan motlatlaujtiaj, pero modiscípulos tlakuaj uan itlaj konij”. 34 Jesús okinnankili: “Namejuan amo uelis nankichiuaskej amo matlakuakan* akinmej mouikaj iuan novio ijkuak ye inuan kajki. 35 Pero ajsis tonal kiuikaskej novio uan ijkuakon amo tlakuaskej”.*
36 Noijki okinmilui nin neskayotl:* “Amikaj kiteki se tsotsoli* yankuik uan kijtsoma ipan se tsotsoli* tlen yotlajtlanki. Tla ikaj ijkon kichiuas, tsotsoli* yankuik kitsomonis tsotsoli* tlen yotlajtlanki. Uan tsotsoli* yankuik amo kinamikis tsotsoli* tlen yotlajtlanki. 37 Noijki amikaj kitlalia yankuik vino ijtik kuetlaxtekonmej tlen yotlajtlankej. Tla ikaj ijkon kichiuas, vino yankuik kintsomonis kuetlaxtekonmej uan nochi ijtlakauis. 38 Yankuik vino moneki kitlaliskej ijtik kuetlaxtekonmej yankuikej. 39 Amikaj kineki konis yankuik vino ijkuak yokonik vino tlen youejka tlatitok porque kijtoua: ‘Okachi uelik vino tlen youejka tlatitok’”.