Achto ilibro Samuel
3 Ijkuakon Samuel omoka iuan Elí uan opejki kitekichiuilia Jehová. Itech nonmej tonalmej ayakmo okachi omokakiaya itlajtol Jehová uan ayakmo okachi okinnextiliayaj seki tlamantli.
2 Se tonal Elí ouetoka kanin nochipa okochiaya, ye ayakmo otlachiaya. 3 Itlauil toTajtsin Dios ok oxotlatoka uan Samuel omotekatoka itech itemplo* Jehová ik kanin okatka iArca toTajtsin Dios. 4 Ijkuakon Jehová okinotski Samuel uan ye okinankili: “Nikan nika”. 5 Ikinon san niman omotlalo* kanin okatka Elí uan okilui: “Noteko, otechnotski, nikan nika”. Pero Elí okinankili: “Ne amo onimitsnotski, xikochiti”. Samuel oyajki uan oksepa okochito. 6 Jehová oksepa okinotski: “¡Samuel!”. Ye omejki uan oyajki kanin okatka Elí uan okilui: “Noteko, otechnotski, nikan nika”. Pero Elí okinankili: “Amo nokone, amo onimitsnotski, oksepa xikochiti”. 7 (Samuel ayamo okixmatiaya Jehová uan ijkuakon Jehová ayamo itlaj okiluiaya). 8 Jehová oksepa okinotski: “¡Samuel!”. Ye omejki uan oyajki kanin okatka Elí uan okilui: “Otechnotski, nikan nika”.
Ijkuakon Elí okajsikamatki* ye Jehová akin okinotski chokotsin. 9 Ikinon Elí okilui Samuel: “Xio, xikochiti uan tla oksepa mitsnotsas moneki tikiluis: ‘Xitlajto Jehová, porque ne akin nimotlakeual nimitskaktok’”. Samuel oyajki uan oksepa okochito.
10 Satepan Jehová oksepa okinotski ijkon ken achto: “¡Samuel, Samuel!”. Ye okinankili: “Xitlajto, porque ne akin nimotlakeual nimitskaktok”. 11 Ijkuakon Jehová okilui Samuel: “¡Xikita! Itlaj nikchiuas itech altepetl Israel uan nochtin akinmej kikakiskej sapanoua momojtiskej.* 12 Non tonal nikchiuas nochi tlen onikijto kipanos Elí uan ifamilia, nikchiuas nochi tlen onikijto. 13 Moneki tikiluis nochipa niktlajyouiltis ifamilia porque ye kimati sapanoua otlajtlakolchijkej. Ikoneuan kiuijuikaltiaj* Dios pero ye amo kinyektlalia. 14 Ikinon yonikijto,* maski ifamilia Elí itlaj kitemakaj noso itlaj kitetliokoliaj amo keman pojpoliuis intlajtlakol”.
15 Samuel okochtoka hasta ijkuak otlaneski. Satepan okintlapoto ipuertas ikalijtik Jehová pero omomojtiaya kiluis Elí nochi tlamantli tlen okinextilijkej. 16 Pero Elí okinotski Samuel uan okilui: “¡Samuel, nokone!”, ye okinankili: “Nikan nika”. 17 Elí okitlajtlani: “¿Tlen omitsilui? Nimitstlatlaujtia nochi techilui. ToTajtsin Dios fiero mamitstlajyouilti tla amo nochi techiluis tlen ye omitsilui”. 18 Ikinon Samuel okilui nochi uan amitlaj okitlatili uan Elí okilui: “Jehová ijkon kineki kichiuas ikinon makichiua tlen kuali kita”.
19 Samuel ok omoskaltijtiaya, Jehová iuan okatka uan nochi tlen okijtouaya omochiuaya. 20 Itech intlal israelitas, desde Dan hasta Beer-Seba nochtin okajsikamatkej* Samuel okitlalijkej mayeto iprofeta Jehová. 21 Uan Jehová ok omonextiaya ompa Siló, porque Jehová ompa okichi Samuel makimati tlen ye kineki ika itlajtol Jehová.