Xikilui ikaj mamitspaleui
“Tla ikaj uelis kitlanis se, ome uelis kixnamikiskej” (Eclesiastés 4:12).
IJKUAK oksekimej techpaleuiaj, uelis tiktlaniliskej akin techkokolia. Tla tejuatsin ayakmo tikneki titlachichinas, moneki tikinmiluis mofamiliares uan moyolikniuan mamitspaleuikan noso ikaj tlen uelis mitsajsikamatis.
Xikinmilui mamitspaleuikan akinmej ayakmo tlachichina, porque yejuan uelis mitsajsikamatiskej uan mitspaleuiskej. Se tlakatl tlen itoka Torben uan chanti altepetl Dinamarca, kijtoua: “Sapanoua nikpatioita porque onechpaleuijkej ayakmo manitlachichina”. Abraham tlen chanti altepetl India, okijkuilo: “Nofamilia uan tokniuan onechititijkej melauak nechtlasojtla, non onechpaleui ayakmo manitlachichina”. Pero ualeua amo san moneki matechpaleuikan tofamiliares uan toyolikniuan.
Se tlakatl tlen itoka Bhagwandas, kijtoua: “Kanaj veintisiete xiuitl onitlachichinki, satepan ayakmo onitlachichinki porque opejki nimomachtia Biblia uan onikajsikamatki tlen tlamantli kisokiotia totlalnakayo. Amo san niman onika tabaco pero sapanoua onimochijchika. Ayakmo onimouikaya inmiuan akinmej tlachichinaj. Oniktemo se tepajti para manechpaleui. Nochi nin tlamantli amo onechpaleui, ik non, se youak oniktlatlaujti Jehová ika nochi noyolo uan onikilui manechpaleui para ayakmo manitlachichina. ToTajtsin Dios onechpaleui uan ayakmo onitlachichinki”.
Noijki moneki tikmatis tlen tlamantli uelis tikixnamikis ijkuak tiknekis tikkauas tabaco. Itech okse tlamachtil tikitaskej seki tlamantli.
[Recuadro]
¿MONEKI NIKONIS NOSO NIKMOTLALILIS PAJTLI?
Miakej kikouaj pajtli para ayakmo tlachichinaskej, ken parches tlen kipia nicotina, ik non, akinmej kinemakaj kitlani miak tomin. Pero tla tikneki tikouas non pajtli, achto xikita nin tlamantli.
¿Melauak mitspaleuis? Sekimej kijtouaj nin pajtli kinpaleuia para ayakmo makinekikan tlachichinaskej, ijkon satepan ayakmo tlachichinaj. Pero sekimej kijtouaj uelis techijtlakos tla nochipa tikmotlaliliaj.
¿Ken uelis techijtlakos? Seki pajtli uelis kichiuas matimotlakopilikan, san timoyolkokojtoskej uan peuas timokuayejyekoskej tlen amo kuali. Noijki matikilnamikikan akinmej ayakmo kimotlaliliaj pajtli tlen kipia nicotina pero kimotlaliliaj okse pajtli para ayakmo tlachichinaskej, kijtosneki ok kimotlalilijtokej droga uan noijki kinmijtlakoua. Ik non, maski ayakmo tlachichinaj, pajtli tlen kimotlaliliaj noijki kipia droga tlen itoka nicotina.
¿Tlen uelis mitspaleuis ayakmo xitlachichina? Ijkuak okintlajtlanijkej akinmej otlachichinayaj tlen okichijkej para ayakmo tlachichinaskej, miakej okijtojkej amo okimotlalilijkej pajtli.