Tlamantli tlen uelis tikixnamikis
Yoshimitsu tlen chanti Japón okijto: “Onikijto ayakmo nitlachichinas para amo mamokoko tokone tlen yikin oneski. Itech nokalijtik oniktlali se letrero tlen kijtoua: “Nikan amo xitlachichina”. San opanok se hora uan oksepa oniknekiaya nitlachichinas, ik non, san niman onikxotlalti se cigarro”.
TLEN okipanok Yoshimitsu, kiteititia ijkuak ikaj ayakmo kineki tlachichinas ualeua kixnamiki seki tlamantli. Ixtlamatkej kijtouaj kanaj noventa por ciento akinmej kinekij kikauaskej tabaco oksepa peuaj tlachichinaj. Tla tejuatsin tikneki tikkauas tabaco achto moneki tikmatis tlen tikchiuas ijkuak itlaj tikixnamikis. Matikitakan seki tlamantli tlen uelis mitspanos.
Tiknekis tikchichinas nicotina. Ualeua panoua san kanaj eyi tonal uan oksepa tikneki tikchichinas se cigarro pero ome semana satepan xamo ayakmo tiknekis ijkon tikchiuas. Se tlakatl akin otlachichinaya okijto: “Ualeua tiknekij titlachichinaskej pero ualeua amo”. Xamo uelis panos miak xiuitl uan ok tiknekis titlachichinas. Tla ijkon mitspanos amo san niman xitlachichina. Xikkaua mapano kanaj makuili minutos uan ayakmo tiknekis titlachichinas.
Tlen mitspanos ijkuak ayakmo titlachichinas. Ualeua sekimej san kinekij kochiskej, amo kuali mokuayejyekouaj noso motomauaj. Noijki itlaj kinkokoua, kekexkiaj, mitoniaj, san niman kualanij, noso san moyolkokouaj. Xamo ijkon kinpanos pero ijkuak panos kanaj naui noso makuili semanas ayakmo ijkon momachiliskej.
Nin tlamantli uelis mitspaleuis para ayakmo titlachichinas:
● Okachi xikochi.
● Xikoni miak atl noso jugo uan kuali xitlakua.
● Xikchiua ejercicio.
● Kuali ximijyoti uan xikilnamiki itech mopulmones kalaki ejekatl tlen chipauak.
Tlen uelis kichiuas oksepa xitlachichina. Ijkuak itlaj mitspanos noso timoyolkokojtos uelis tiknekis oksepa titlachichinas. Xamo otikxotlaltiaya se cigarro ijkuak itlaj otikoniaya. Tla ijkon otikchiuaya san niman xikoni tlen tikpia para amo tiknekis titlachichinas. Satepan xamo ayakmo ijkon mitspanos uan uelis timoyolpaktis ijkuak itlaj tikonis.
Ualeua uelis itlaj kichiuas oksepa xikneki xitlachichina maski yopanok miak xiuitl. Torben tlen otikitakej itech okse tlamachtil kijtoua: “Yikipiaj kanaj diecinueve xiuitl ayakmo nitlachichina pero ijkuak nikoni café ualeua ok nikneki nitlachichinas”. Ualeua ijkon panoua, pero ijkuak panos miak xiuitl ayakmo tiknekis ijkon tikchiuas.
Pero amo ijkon panoua ijkuak ikaj koni alcohol uan tlachichina. Moneki ayakmo konis itlaj tlen kipia alcohol uan amo yas kanin kinemakaj alcohol, porque ijkuak tlauantos kinekis oksepa tlachichinas. ¿Tleka ijkon tikijtouaj?
● Maski san tepitsin tikonis alcohol uelis kichiuas oksepa xitlachichina.
● Maski amo nochipa titlauanas uelis kichiuas xitlachichina.
● Alcohol uelis kichiuas ayakmo kuali ximokuayejyeko uan ayakmo xipinaua. Biblia kijtoua: “Vino uan alcohol kichiuaj matikchiuakan tlen amo kuali” (Oseas 4:11, Biblia del Peregrino).
Akinmej inmiuan timouika. Amo ximouika inmiuan akinmej tlachichinaj noso akinmej mitsiluiskej xitlachichina. Noijki amo ximouika inmiuan akinmej mitspinauiskej porque timochijchikajtok ayakmo titlachichinas.
Ken timomachilia. Se ixtlamatki kijtoua miakej oksepa opejkej tlachichinaj porque okualaniayaj uan omotekipachouayaj. Tla tikmachilia tikneki oksepa titlachichinas porque tikualantok noso timotekipachoua, san niman itlaj xikchiua, xikoni atl, xikkua se chicle noso xinejnemi. Noijki nochipa kuali ximokuayejyeko, xiktlatlaujti Jehová mamitspaleui noso xiktlajtolti Biblia (Salmo 19:14).
Sekimej kijtouaj
● San tepitsin nitlachichinas.
Tlen uelis panos: Maski san tepitsin titlachichinas, pero kanaj eyi hora san timokuayejyekojtos oksepa tiknekis titlachichinas. Non kichiuas oksepa xikchichina tabaco.
● Ijkuak nitlachichina ayakmo okachi nimotekipachoua.
Tlen uelis panos: Ixtlamatkej kijtouaj nicotina uelis kichiuas okachi ximotekipacho. Ijkuak ikaj tlachichina san tepitsin kuali momachilia pero san niman oksepa peua motekipachoua.
● Nikita oui ayakmo nitlachichinas.
Tlen uelis panos: Tla san timokuayejyekojtos amo keman tikkauas tabaco non san kichiuas ximosotlaua. Biblia kijtoua: “Tla timoyolkokoua ijkuak timotekipachoua, amo tiyolchikajtos” (Proverbios 24:10). Amo ximokuayejyeko amo keman uelis tikkauas tabaco. Akin mochijchikaua kikauas uan kichiuas tlen yotikitakej itech nin revista, uelis ayakmo keman tlachichinas.
● Amo nitlaxikos porque oksepa niknekis nitlachichinas.
Tlen uelis panos: Ualeua tiknekis titlachichinas pero ximochijchikaua porque ijkuak panos seki semanas ayakmo ijkon timomachilis. Nochipa xikilnamiki tleka ayakmo tikneki titlachichinas. Tla oksepa tikneki ijkon tikchiuas maski yopanok seki metstli noso seki xiuitl, amo ximosotlaua porque san seki minutos ijkon tikmachilis, pero amo xikxotlalti se cigarro.
● Nimokokoua, ik non, moneki nitlachichinas.
Tlen uelis panos: Tla tejuatsin tikoni pajtli porque sapanoua timoyolkokoua noso tikpia esquizofrenia, xikilui tepajti mamitspaleui para ayakmo titlachichinas. Xamo kinekis mitspaleuis. Mitsmakas okseki pajtli tlen mitspaleuis ayakmo xitlachichina uan noijki mitspaleuis para okachi kuali xiyeto.
● San okachi nimoyolkokos tla oksepa peua nitlachichina.
Tlen uelis panos: Tla oksepa tikxotlaltia se cigarro uan tikchichina, amo kijtosneki oksepa peuas titlachichinas uan ayakmo uelis tikkauas. Nochipa ximochijchikaua. ¡Amo ximosotlaua! Tla tejuatsin timochijchikaua, satepan ayakmo tiknekis titlachichinas.
Ijkon okichi Romualdo. Otlachichinki kanaj veintiséis xiuitl uan satepan ayakmo otlachichinki kanaj treinta xiuitl. Ye okijto: “Ayakmo nikmati keski uelta oksepa onitlachichinki uan sapanoua onimoyolkokouaya porque onimokuayejyekouaya amitlaj nopati. Pero ijkuak opejki nimouika iuan Jehová nochipa onikiluiaya manechpaleui, ye onechpaleui uan ayakmo onitlachichinki”.
Itech saiktlami tlamachtil tlen kipia nin amatlajkuilol kijtoua seki tlamantli tlen mitspaleuis ayakmo xitlachichina uan xiyolpaki.
[Recuadro uan foto]
UELIS TIMIKIS MASKI SAN TLEN TLAMANTLI TIKCHICHINAS
Tabaco tlatlamantli kichijchiuaj para kinemakaskej. Itech seki altepemej, kinemakaj tabaco itech herbolarios uan tiendas naturistas. Pero Organización Mundial de la Salud kijtoua: “Maski tabaco kinemakaj ken yetoskia pajtli noijki teijtlakoua”. Tabaco uelis kichiuas matimokokokan ika cáncer, maijtlakaui toeso, ayakmo kuali matekiti toyolo uan hasta uelis tiixpoliuiskej. Siuamej tlen yikin kipiaskej inkoneuan uan kichichina tabaco uelis kichiuaskej mamokokokan inkoneuan. Matikitakan ken sekimej kichichinaj tabaco.
Bidis. Nin cigarro amo ken oksekimej porque akin kichichina san iselti uelis kichijchiuas, ijkon kichiuaj altepetl Asia. Nin cigarro okachi kipia alquitrán, nicotina uan monóxido de carbono, amo ken okseki cigarros.
Puros. Kikuechouaj tabaco uan kikimilouaj ika ixijyo. Puros san niman kikajkauaj nicotina ijkuak kitlaliaj itech inkamak maski ayamo kixotlaltiaj uan okachi chikauak amo ken cigarro.
Kreteks noso cigarros tlen kipiaj clavo. Nin cigarro kipia kanaj sesenta por ciento tabaco uan kanaj cuarenta por ciento clavo. Pero okachi kikajkaua alquitrán, nicotina uan monóxido de carbono amo ken okseki cigarros.
Pipas. Noijki teijtlakoua porque uelis timokokos ika cáncer noso uelis mitsajsis okseki kokolistli.
Tabaco tlen amo popoka. Tlatlamantli kichijchiuaj, seki mota ken chicle, okseki kikuechouaj para kijyotilanaskej ika inyekatsol noso kikuechouaj para kimotlaliliskej itech inkamak, ijkon kichiuaj ompa altepetl Asia tlen kajki ik sureste. Maski nin tabaco amo popoka, noijki teijtlakoua porque nicotina tlen kijkajkaua ajsi itech estli.
Pipas tlen kipiaj atl (bongs, hookahs, narghiles, shishas). Maski pipas tlen kipiaj atl okinchijchijkej para makichipaua poktli tlen kikixtia tabaco, noijki teijtlakoua porque poktli tlen kikixtia ajsi itech pulmones uan noijki kinmajsi cáncer.
[Recuadro uan foto]
TLA TIKNEKI IKAJ TIKPALEUIS
● Xiteyolchikaua. Moneki matikyolchikauakan uan amo san matikajuakan noso san nochipa matikiluikan tlen moneki kichiuas. Tla tikiluiaj “ximochijchikaua, te uelis ayakmo titlachichinas” okachi tikyolchikauaskej uan amo matikiluikan “¡te amo keman uelis tikkauas tabaco!”.
● Xiteajsikamati. Xiktlapojpolui tla akin otlachichinaya kualani noso itlaj mitsiluia tlen uelis mitsyolkokos. Uelis tikiluis: “Nikmati oui tlen tikchijtok pero niyolpaki porque sapanoua timochijchikaua”. Amo keman xikilui “ijkuak otitlachichinaya amo san niman otikualaniaya”.
● Xikteititi melauak tiiyolikni. Biblia kijtoua: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj” (Proverbios 17:17). Ximochijchikaua para amo san niman tikualanis uan nochipa xikiknomati akin ayakmo tlachichina, maski ualeua sapanoua kualani.