8 Ma kichiuakan tlen kijtouaj

¿TLEN MONEKI KICHIUASKEJ?

Tetajmej moneki mochijchikauaskej kichiuaskej ijkon ken kijtouaj. Se tlakatl amo uelis kiluis ikone ma kijto tlen melauak tla ye ualeua tlakajkayaua.

Se tlakatl tlen itoka David okijto: “Sekimej kijtouaj: ‘Xikchiua tlen nikijtoua uan amo tlen nikchiua’. Pero amo uelis ijkon tikinmiluiskej tokoneuan. Yejuan kilnamiktokej tlen tikchiuaj uan tlen tikijtouaj uan san niman kitaskej tla tikijtouaj se tlamantli pero tikchiuaj okse uan techiluiskej”.

PRINCIPIO BÍBLICO: “Tla tikinmilia oksikimeh amokuali se matlachteki, ¿tleka te titlachteki?” (Romanos 2:21).

¿TLEKA MIAK IPATI?

Konemej okachi kichiuaj ken intatajuan uan amo ken akinmej iuan momachtiaj. Ik non, moneki nankinmachtiskej tlen moneki kichiuaskej ika tlen nankijtouaj uan ika tlen nankichiuaj.

Nicole okijto: “Amo tikmatij kox kikakij tlen tikinmiluiaj, pero tla amo tikchiuaj tlen tikinmiluiaj san niman techiluiaj. San kitaj nochi tlen tikchiuaj”.

PRINCIPIO BÍBLICO: “Pero akimeh kipiah n ixtlamatílistli non Dios kitemaka [...] amo san techikotlasojtlah” (Santiago 3:17).

¿TLEN UELIS TIKCHIUAS?

Ximotlajtlani: “¿Niktlasojtla nonamik uan nokoneuan? ¿Tlen nechpaktia nikitas? ¿Akinmej inmiuan nimouika? ¿Nikinpaleuia oksekimej?”. ¿Mitspaktiskia ma kichiuakan ken tejuatsin mokoneuan ijkuak moskaltiskej?

Christine okijto: “Nion nonamik nion ne tikinmiluiaj tokoneuan itlaj ma kichiuakan tla tejuan amo tikchiuaj”.

Xikijto ma mitstlapojpoluikan. Tokoneuan kimatij tinochtin timotlapololtiaj. Ik non, moneki tikinmachtis ijkuak motlapololtiaj moneki ma kijtokan ma kintlapojpoluikan uan ijkon yetoskej yolyamankej.

Robin okijto: “Moneki tikijtoskej tlen amo kuali otikchijkej uan tikijtoskej ma techtlapojpoluikan, tla amo tikchiuaj, tokoneuan noijki amo kichiuaskej”.