ToTajtsin Dios kijtoua kiyektlalis tlaltikpak

Ijkon okijtojkej sekimej ixtlamatkej tlen kitaj tleka tlatotonia uan seua ipan nochi tlaltikpak. Tlen okijtojkej ixtlamatkej mitspaleuis ximokuayejyeko akin okichijchi tlaltikpak uan kichiua iselti mamoyektlali. Ikinon xamo tejuatsin tikneltoka kajki akin otechchijchi uan kitekipachoua tlen techpanoua.

Miakej yokijtlakojkej tlaltikpak ikinon ayakmo ueli iselti moyektlalia. ¿Tleka uelis tikneltokaskej toTajtsin Dios itlaj kichiuas para kiyektlalis tlaltikpak uan nochi tlen onka?

Textos tlen nesij itech recuadro kiteititiaj amo pojpoliuis tlaltikpak uan miakej ompa yoltoskej.

• ToTajtsin Dios okichijchi tlaltikpak. “Achto, toTajtsin Dios okichijchi iluikak uan tlaltikpak” (Génesis 1:1).

• Tlaltikpak iaxka toTajtsin Dios. “Jehováa iaxka tlaltikpak uan nochi tlen kipia” (Salmo 24:1).

• ToTajtsin Dios okichijchi tlaltikpak para amo keman mapojpoliui. “Ye okitlali tlaltikpak kanin kajki uan amo keman ikaj kolinis” (Salmo 104:5).

• ToTajtsin Dios kijtoua nochipa tiyoltoskej ipan tlaltikpak. “Akin melauak toTajtsin Dios, akin okichijchi tlaltikpak […], amo san okichijchi, okichijchi para itech chantiskiaj” (Isaías 45:18).

• ToTajtsin Dios yokijto nochipa tichantiskej ipan tlaltikpak. “Yolmelauakej yetoskej tlaltikpak uan nochipa itech chantiskej” (Salmo 37:29).

Tlaltikpak iselti moyektlalia porque toTajtsin Dios okitlali seki tlamantli makipaleui. Pero tejuan noijki moneki titlapaleuiskej kuali mayeto. Jehová yokijto tlen tonal kinmixpolos akinmej kijtlakouaj tlaltikpak porque tlaixnekij (Apocalipsis 11:18).

Biblia kijtoua ijkuak ijkon panos, toTajtsin Dios kiyektlalis tlaltikpak, kikopas se kualtsin xochitlali uan ‘kinmakas tlen kinekij nochtin tlen yoltokej’ (Salmo 145:16).