¿Tlen kineki kichiuas toTajtsin Dios?

ITECH periódico, televisión, radio uan Internet tikitaj miakej kichiuaj tlen amo kuali, onka guerras uan miakej kinmiktiaj. Xamo tejuatsin timokokoa noso oixpoliuik ikaj tlen tiktlasojtla uan non mitstlajyouiltijtok.

Ximotlajtlani:

• ¿Ijkon okinekiaya toTajtsin Dios ma niyeto ne uan nokalchanejkauan?

• ¿Tlen nechpaleuis ma nikixnamiki ouijkayotl?

• ¿Se tonal yetos yolseuilistli nikan tlaltikpak?

Biblia techpaleuia ma tikmatikan uan uelis tikneltokaskej tlen ompa kijtoa.

BIBLIA KIJTOA TOTAJTSIN DIOS KICHIUAS MIAK TLAMANTLI TLEN TECHPALEUIS

• Ayakmo timoyolkokoskej nion tikokoxkatiskej noso tiueuejtiskej uan ayakmo tiixpoliuiskej (Apocalipsis 21:4).

• “Akin amo nejnemi tsikuinis ken masatl” (Isaías 35:6).

• “Inmixtololouan akinmej amo tlachiaj motlaposkej” (Isaías 35:5).

• Kinyolitiskej akinmej yoixpolikej (Juan 5:28, 29).

• Amikaj mokokos (Isaías 33:24).

• Tinochtin tikpiaskej tlen tikkuaskej (Salmo 72:16).

  

BIBLIA UELIS MITSPALEUIS

Xamo timokuayejyekoa nochi tlen otiktlajtolti amo melauak panos. Pero toTajtsin Dios yokijto amo miak poliui kichiuas nochi non tlamantli nikan tlaltikpak. Biblia techyekiluia ken kichiuas.

Biblia noijki techiluia tlen moneki tikchiuaskej para tiyolpakiskej. Ximokuayejyeko nochi tlen mitstekipachoa. Xamo tikpia ouijkayotl iuan mokalchanejkauan, amo tikpia tomin noso timokokoa. Noso xamo titlajyouijtok porque oixpoliuik ikaj akin tiktlasojtla. Tlen kijtoa Biblia mitspaleuis xikxiko nochi tlen mitspanoa. Noijki mitsyolseuis tlen kijtoa itech nin tlamantli:

• ¿Tleka titlajyouiaj?

• ¿Tlen techpaleuis ma tikixnamikikan ouijkayotl?

• ¿Ken uelis tiyolpakiskej iuan tokalchanejkauan?

• ¿Tlen kinpanoa akinmej ixpoliuij?

• ¿Oksepa tikinmitaskej akinmej tikintlasojtlaj tlen yoixpolikej?

• ¿Tleka uelis tikneltokaskej toTajtsin Dios melauak kichiuas nochi tlen yokijto?

Tla tiktlajtoltijtok nin amochtli, kijtosneki tikneki tikmatis tlen techmachtia Biblia uan nin amochtli mitspaleuis xikmati. Sejse párrafo kiualika se tlajtlanilistli uan non mitspaleuis xikajsikamati tlen kijtoa Biblia. Miakej kinpaktia motlapouiskej itech Biblia iuan iTlaixpantijkauan Jehová. Xamo tejuatsin noijki mitspaktis. ¡ToTajtsin Dios ma mitsteochiua porque timochijchikaua tikmatis tlen techmachtia Biblia!