Tlajtolmej tlen okinmijkuilojkej itech tepamitl

Satepan, Belsasar opejki tlanauatia Babilonia. Se yoak, okichi miak tlakuali uan okinyole 1,000 tlaltikpaktlakamej tlen okachi oueyititokaj itech non ueyi altepetl. Okinmilui itlakeualuan ma kinkixtikan vasos de oro tlen Nabucodonosor okinkixti itech iteokal Jehová. Belsasar uan akinmej okinyole otlakonikej ika nonmej vasos uan okinueyichijkej indioses. San niman, oualmonexti ima se tlakatl uan okinmijkuilo seki tlajtolmej tlen amo omoajsikamatiayaj itech tepamitl kanin otlakuajtokaj.

Belsasar sapanoa omomojti. Okinnotski akinmej otetlajchiuiayaj uan okinmilui: “Akin nechiluis tlen kijtosneki ninmej tlajtolmej, noijki ueyititos nikan Babilonia”. Ik non, omochijchikajkej para kimatiskiaj tlen okijtosnekiaya nonmej tlajtolmej, pero amo ikaj okajsikamatki. Satepan, oajsito siuatl ueyi tekiua uan okijto: “Se tlakatl tlen itoka Daniel okiluiaya Nabucodonosor tlen okijtosnekiaya tlen okochtemikiaya. Ye uelis mitsiluis tlen kijtosneki ninmej tlajtolmej”.

Daniel okitato Belsasar. Ijkuak oajsito, ye okilui Daniel: “Tla tikmati tlen kijtosneki ninmej tlajtolmej, nimitsmakas se koskatl de oro uan noijki tiueyititos nikan Babilonia”. Daniel okinankili: “Nimitsiluis tlen kijtosneki ninmej tlajtolmej. Pero amo nikneki itlaj xinechtliokoli. Motajtsin Nabucodonosor omoueyinekiaya, pero Jehová okimachti ma yeto yolyamanki. Te yitikmati tlen okipanok, pero amo otiktlakaitak Jehová. Otikonik vino ika vasos tlen okatkaj ijtik iteokal. Ik non, toTajtsin Dios okinmijkuilo ninmej tlajtolmej: MENÉ, MENÉ, TEQUEL uan PARSÍN. Nin kijtosneki medos uan persas kimoaxkatiskej Babilonia uan te ayakmo titlanauatis”.

Omotaya amo keman kimoaxkatiskiaj Babilonia. Nin ueyi altepetl okiyaualoaya se tepamitl uejkapantik uan se aueyatl uejkatlan. Pero non yoak, medos uan persas okiteuitoj Babilonia. Ueyi tekiua persa tlen omotokayotiaya Ciro okixelo aueyatl uan ijkon soldados ajsiskiaj kanin okatka ikaltlatsakuil Babilonia. Ijkuak ompa oajsitoj, ¡otlatlapotoka! Soldados san niman opejkej kiteuiaj Babilonia, okimoaxkatijkej uan okimiktijkej ueyi tekiua. Ijkuakon, Ciro opejki tlanauatia Babilonia.

Ijkuak Ciro yokipiaya se xiuitl otlanauatijtoka, okijto: “Jehová onechilui oksepa ma nikchijchiua iteokal itech Jerusalén. Uelis yaskej judíos tlen kinekiskej tlapaleuiskej”. Ik non, miakej judíos omokuepkej inmialtepe 70 xiuitl satepan ijkuak okipojpolojkej Jerusalén. Ijkon omochi tlen okijto Jehová. Noijki, Ciro okintemakak vasos de oro uan plata uan okseki tlamantli tlen Nabucodonosor okimoaxkati. ¿Otikitak ken Jehová okitekitilti Ciro uan ijkon okipaleui ialtepe?