Se tekiuajkayotl tlen okatka ken se ueyi kuauitl

Se yoak, Nabucodonosor itlaj okochtemik uan sapanoa omomojti. Okinnotski tlakamej ixtlamatkej tlen okipaleuiayaj para ma kiluikan tlen okijtosnekiaya ikochtemikilis, pero amo ikaj ueli okilui tlen okijtosnekiaya. Satepan, ueyi tekiua omotlapoui iuan Daniel.

Nabucodonosor okilui Daniel: “Onikochtemik se kuauitl tlen sapanoa omoskalti uan oajsito hasta iluikak. Nin kuauitl omotaya itech nochi Tlaltikpak. Ixijyo kualtsin omotaya uan okitemakaya miak tlakilotl. Yolkamej omoseuiayaj itlampa uan ompa totomej okichijchiuayaj intepajsol. Satepan, se ángel tlen okatka iluikak oualtemok uan chikauak okijto: ‘¡Xiktekikan kuauitl uan xikkixtilikan imamayouan! Pero xikkauakan itlaktson uan ineluayouan. Uan xikyaualokan itlaktson ika tepostli uan cobre. Iyolo kuauitl mopatlas. Ayakmo kipias iyolo se tlakatl, kipias iyolo se yolkatl. Uan panos chikome tiempos. Nochtin kimatiskej toTajtsin Dios tlanauatia uan ye uelis kimakas se tekiuajkayotl san akin ye kinekis’”.

Jehová okilui Daniel tlen okijtosnekiaya non kochtemikilistli. Daniel omomojti ijkuak okimatki tlen okijtosnekiaya. Okijto: “Oh ueyi tekiua, okachi kuali yetoskia tla kinpanoskia akinmej mitskokoliaj tlen otikochtemik, pero te mitspanos. Kuauitl uejkapantik tlen okitekej te mitsneskayotia. Ayakmo titlanauatis uan tikkuas xiuitl itech tlalan ken se yolkatl. Pero ángel okijto ma kikauakan itlaktson uan ineluayouan kuauitl. Nin kijtosneki satepan oksepa titlanauatis”.

Se xiuitl satepan, Nabucodonosor okatka ikuapak ikalijtik uan okitak kuajkualtsin omotaya Babilonia. Ye okijto: “¡Tetlajtlachialtia nin altepetl tlen onikchijchi! ¡Amo ikaj ken ne!”. Ijkuak Nabucodonosor ijkon okijto, se tlajtoli tlen oualaya iluikak okilui: “¡Nabucodonosor! Ayakmo titlanauatis”.

Ijkuakon, Nabucodonosor okuatlapolo uan opejki kichiua ken se yolkatl. Okikixtijkej kanin otlanauatiaya uan opejki chanti tlalan iuan yolkamej. Itsonkal sapanoa omoskalti uan omotaya ken ijuio águila, isteuan omoskaltijkej ken isteuan se tototl.

Nabucodonosor otlalnamik ijkuak opanok chikome xiuitl uan Jehová okikauili oksepa ma tlanauati Babilonia. Noijki, Nabucodonosor okijto: “Nikueyichiua Jehová, ueyi Tekiua itech iluikak. Ye kichiua ma mopinatikan akinmej moueyinekij. Axkan nikmati Jehová tlanauatia uan kimaka tekiuajkayotl san akin ye kineki”.