Tekiuajkayotl tlen nochipa yetos

Se yoak, ueyi tekiua Nabucodonosor okochtemik itlaj tlen amo okajsikamatiaya. Sapanoa okitekipachoaya tlen okochtemik, ik non, ayakmo ueli okochiaya. Okinnotski akinmej otetlajchiuiayaj uan okinmilui: “Xinechiluikan tlen kijtosneki nokochtemikilis”. Yejuan okiluijkej: “Oh ueyi tekiua, xitechilui tlen otikochtemik”. Pero Nabucodonosor okinmilui: “¡Amo! Namejuan xinechiluikan tlen onikochtemik. Namechmiktis tla amo nankijtoaj”. Oksepa okiluijkej: “Xitechilui tlen otikochtemik uan timitsiluiskej tlen kijtosneki”. Nabucodonosor okinnankili: “Nankinekij nannechkajkayauaskej. ¡Xinechiluikan tlen onikochtemik!”. Yejuan okinankilijkej: “Amo ikaj uelis kichiuas tlen tikneki. Melauak oui”.

Nabucodonosor sapanoa okualanki, ik non, otlanauati ma kinmiktikan nochtin ixtlamatkej tlen okatkaj itech altepetl. Noijki kinmiktiskiaj Daniel, Sadrac, Mesac uan Abednego. Pero Daniel okilui ueyi tekiua ma mochia. Ijkuakon, ye uan iyolikniuan okiluijkej Jehová ma kinpaleui. ¿Tlen okichi Jehová?

Jehová okinextili Daniel tlen okijtosnekiaya ikochtemikilis Nabucodonosor. Mostlatika, Daniel okiluito itlakeual ueyi tekiua: “Amo xikinmiktikan ixtlamatkej. Ne nikmati tlen kijtosneki ikochtemikilis ueyi tekiua”. Tlakeuali okiuikak Daniel ixpan Nabucodonosor. Daniel okilui ueyi tekiua: “ToTajtsin Dios omitsititi tlen panos satepan. Otikochtemik se ueyi estatua, itsonteko okatka de oro, ielpan uan imauan de plata, itlalax uan imetsuan de cobre, ikotsuan de tepostli uan ikxiuan de tepostli tlen nelitok ika sokitl. Satepan se tetl oualkiski itech se tepetl uan chikauak okinuitek ikxiuan estatua. Nin estatua otlajtlapanki, san tlalpinoli omoka uan ejekatl okiuikak. Tetl omokuepki se ueyi tepetl tlen okatka itech nochi Tlaltikpak”.

Satepan, Daniel okijto: “Nin kijtosneki kochtemikilistli: itsonteko estatua tlen okatka de oro kineskayotia motekiuajkayo. Plata kijtosneki se tekiuajkayotl tlen mitspatkayotis. Satepan yetos okse tekiuajkayotl ken cobre uan tlanauatis itech nochi Tlaltikpak. Satepan yetos okse tekiuajkayotl sapanoa chikauak ken tepostli. Saiktlami, yetos se tekiuajkayotl tlen xexelitos, kanaj yetos chikauak ken tepostli uan kanaj amo chikauak ken sokitl. Tetl tlen mokuepa se tepetl kineskayotia iTekiuajkayo toTajtsin Dios, tlen kinpojpolos nochtin tekiuajkayomej uan nochipa yetos”.

Nabucodonosor omotlankuaketski uan omokuatolo ixpan Daniel uan okijto: “MoDios omitsilui tlen kijtosneki nokochtemikilis. Amo onka okse dios ken ye”. Nabucodonosor ayakmo okimikti Daniel, okitlali ma kinyekana ixtlamatkej uan ma tlanauati itech Babilonia. ¿Otikitak ken Jehová okinankili itlatlaujtilis Daniel?