Amo ikaj okintsakuili

Se tlakatl tlen amo onejnemiaya mojmostla omotlaliaya ikaltempa teokali uan okitlajtlaniaya tomin. Se tiotlak, ye okinmitak Pedro uan Juan oajsitoj teokali uan okinmilui: “Namechtlatlaujtia, itlaj xinechmakakan”. Pedro okinankili: “Nimitsmakas itlaj tlen okachi kuali amo ken tomin. Ika itoka Jesús, ¡ximoketsa uan xinejnemi!”. Pedro okipaleui non tlakatl ma moketsa uan opejki nejnemi. Akinmej ompa okatkaj oyolpakej ijkuak okitakej non milagro uan miakej opejkej tlaneltokaj.

Pero teopixkej uan saduceos sapanoa okualankej. Okinkitskijkej tlatitlanilmej uan okinuikakej ixpan Sanedrín kanin okatkaj tlayekankej itech tlaneltokalismej uan okintlajtlanijkej: “¿Akin onamechmakak chikaualistli tlen ika onankipajtijkej non tlakatl?”. Pedro okinnankili: “Jesucristo otechmakak chikaualistli, tlakatl tlen namejuan onankimiktijkej”. Tlayekankej itech tlaneltokalismej chikauak okinmiluijkej: “¡Amo xikteneuakan Jesús!”. Tlatitlanilmej okijtojkej: “Moneki itech titlajtoskej. Amo timokamatsakuaskej”.

Ijkuakon, Pedro uan Juan okinkajkej ma yakan uan yejuan san niman okinmiluitoj imachtijkauan Jesús tlen opanok. San sekan okiluijkej Jehová: “Timitstlatlaujtiaj, techyolchikaua uan ijkon ok motech titlajtoskej”. Jehová okinmakak espíritu santo uan ijkon ueli otetlapouijkej uan otlapajtijkej. Miakej opejkej kichiuaj ken Cristo. Saduceos sapanoa okualankej uan okintsakej itlatitlaniluan Jesús. Pero non yoak, Jehová okititlanki se ángel uan nin ángel okitlapo kaltlatsakuil kanin otsaktokaj tlatitlanilmej uan okinmilui: “Oksepa xiakan teokali uan ompa xitetlapouikan”.

Mostlatika, ikaj okinmiluito akinmej opouiayaj itech Sanedrín: “¡Telpiloyan kuali tsaktok, pero tlakamej tlen onankintsakej ayakmo ompa katej! ¡Tetlapouijtokej itech teokali!”. Ik non, oksepa okinkitskijkej tlatitlanilmej uan okinuikakej ixpan Sanedrín. Ueyi teopixki okinmilui: “¡Yotimechnauatijkej ayakmo xitetlapouikan itech Jesús!”. Pedro otlanankili: “Tejuan tiktlakamatiskej tlen kijtoa toTajtsin Dios uan amo tlen kijtoaj tlakamej”.

Tlayekankej itech tlaneltokalismej sapanoa okualankej uan okinekiayaj kinmiktiskej tlatitlanilmej. Pero se fariseo tlen omotokayotiaya Gamaliel omoketski uan okijto: “¡Ximotlachilikan! Uelis toTajtsin Dios kajki iuan ninmej tlakamej. ¿Nankinekij nanmoteuiskej iuan toTajtsin Dios?”. Yejuan okikakej tlen okijto Gamaliel. Okinkauilijkej tlatitlanilmej ma yakan, pero achto okinuitekej ika tlakotl uan oksepa okinmiluijkej ayakmo ma tetlapouikan. Pero non amo okintsakuili. Tlatitlanilmej otetlapouijkej ika yolchikaualistli itech teokali uan oyayaj inkalijtik tlaltikpaktlakamej.