TLAMACHTIL 09
Ijkuak timotlatlaujtiaj okachi kuali timouikaj iuan toTajtsin Dios
¿Mitspaktiskia ikaj mamitspaleui? ¿Mitspaktiskia tikmatis seki tlamantli? ¿Tikneki ikaj mamitsyolchikaua noso mamitsyolseui? ¿Mitspaktiskia okachi timouikas iuan Jehová? Tla timotlatlaujtis, tikpias nochi tlen yotikijtojkej. Pero ¿ken moneki timotlatlaujtiskej? ¿Kinkaki Jehová nochtin akinmej motlatlaujtiaj? ¿Tlen moneki tikchiuas tla tikneki mamitskaki ijkuak timotlatlaujtia? Matimomachtikan.
1. ¿Akin moneki tiktlatlaujtiskej? ¿Tlen uelis tikijtoskej ijkuak timotlatlaujtiaj?
Jesús okijto san toTajtsin Dios moneki tiktlatlaujtiskej. Ye ijkon okichiuaya, okitlatlaujtiaya Jehová. Se tonal okijto: “Namejuan moneki ijkin nanmotlatlaujtiskej: ‘ToTajtsin Dios tlen tika iluikak’” (Mateo 6:9). Okachi kuali timouikaj iuan Jehová ijkuak iuan timotlapouiaj.
Ijkuak tiktlatlaujtiskej Jehová uelis tikiluiskej nochi tlen tiknekiskej pero tla tiknekij matechmaka tlen tiktlajtlaniliaj, moneki tiktlajtlaniskej tlen ye kipaktia. Biblia kijtoua: “ToTajtsin Dios techkaki maski san tlen tlamantli tiktlajtlaniliskej tla ijkon ken ye kineki” (1 Juan 5:14). Jesús okijto tlen uelis tiktlajtlaniskej ijkuak timotlatlaujtiaj (xiktlajtolti Mateo 6:9-13). Maski uelis tikiluiskej tlen tiknekij uan tlen techpanoua, noijki moneki nochipa matiktlasojkamatilikan nochi tlen techmaka uan matiktlatlaujtikan ma kinpaleui oksekimej.
2. ¿Ken moneki matimotlatlaujtikan?
Biblia kijtoua: “Xikiluikan [toTajtsin Dios] tlen nankipiaj itech namoyolo” (Salmo 62:8). Ikinon ijkuak timotlatlaujtiaj matikijtokan nochi tlen tikmachiliaj. Ijkuak timotlatlaujtiskej uelis mokakis tlen tikijtouaj noso amo. Biblia amo kijtoua ken moneki tiyetoskej ijkuak timotlatlaujtiaj pero moneki matikteititikan tiktlakaitaj Jehová. Noijki uelis timotlatlaujtiskej san tlen hora tiknekiskej uan san kanin.
3. ¿Ken technankilia Jehová?
Ye tlatlamantli technankilia. Ika Biblia technankilia tlen tiknekij tikmatiskej. Tla tiktlajtoltiskej iTlajtol toTajtsin Dios, tiyetoskej tiixtlamatkej (Salmo 19:7; xiktlajtolti Santiago 1:5). Ijkuak itlaj techtekipachoua Jehová techyolseuia uan xamo kinyolinis itekipanojkauan matechpaleuikan.
MATIMOMACHTIKAN
Matikitakan ken uelis timotlatlaujtis ika nochi moyolo uan ijkon mitskakis toTajtsin Dios, noijki tikitaskej ken mitspaleuis tla timotlatlaujtia.
4. ¿Tlen moneki tikchiuaskej tla tiknekij matechkaki toTajtsin Dios ijkuak tiktlatlaujtiaj?
¿Tlen uelis kichiuas matechkaki noso amo matechkaki? Xikitakan VIDEO.
Jehová kineki san ye matiktlatlaujtikan. Xiktlajtoltikan Salmo 65:2 uan satepan xikitakan tlen namechmachtia.
¿Tikneltoka toTajtsin Dios kineki xiktlatlaujti? ¿Tleka ijkon tikijtoua?
Tla tiknekij matechkaki, moneki timochijchikauaskej tiktlakamatiskej. Xiktlajtoltikan Miqueas 3:4 uan 1 Pedro 3:12 uan satepan xikitakan tlen namechmachtia.
¿Tlen moneki tikchiuaskej tla tiknekij matechkaki Jehová?
Xamo akinmej moteuiaj kiluiaj toTajtsin Dios makinpaleui matlatlanikan. ¿Tikneltoka toTajtsin Dios kinkaki ijkuak motlatlaujtiaj?
5. Matikiluikan Jehová tlen tikmachiliaj
Sekimej kinmachtiaj tlen moneki kijtoskej ijkuak motlatlaujtiaj uan san ijkon kijtojtokej. ¿Ijkon kineki toTajtsin Dios matimotlatlaujtikan? Xiktlajtoltikan Mateo 6:7 uan satepan xikitakan tlen namechmachtia.
¿Ken uelis timotlatlaujtiskej para amo san se tlamantli tikijtojtoskej?
Mojmostla xiktemo itlaj tlen omitspakti uan xiktlasojkamatili Jehová. Tla ijkon tikchiuas kanaj se semana, tikitas yotiktlasojkamatili chikome tlamantli uan amo san se tlamantli otikilui.
Teta tlen kitlasojtla ikone kineki makilui tlen kitekipachoua. Jehová noijki kineki matikiluikan tlen techtekipachoua noso techyolkokoua.
6. Ijkuak tiktlatlaujtiaj Jehová yetoskia ken itlaj techtliokolia
¿Ken techpaleuia timotlatlaujtiskej ijkuak titlajyouiaj? Xikitakan VIDEO.
Biblia kijtoua tla timotlatlaujtiaj timoyolseuiskej. Xiktlajtoltikan Filipenses 4:6, 7 uan satepan xikitakan tlen namechmachtia.
Maski ijkuak timotlatlaujtiaj amo pojpoliui tlen techtekipachoua, ¿ken techpaleuia?
¿Tlen mitspaktiskia tikiluis toTajtsin Dios ijkuak timotlatlaujtis?
¿Otikmatiaya?
“Amén” kijtosneki “ijkon mamochiua” noso “melauak”. Yiuejkika okijtouayaj “amén” ijkuak otlamiaya omotlatlaujtiayaj (1 Crónicas 16:36).
7. Nochipa ximotlatlaujti
Ualeua amo timajxiliaj timotlatlaujtiskej. ¿Okipatioitaya Jesús motlatlaujtis? Xiktlajtoltikan Mateo 14:23 uan Marcos 1:35 uan satepan xikitakan tlen namechmachtia.
¿Tlen okichiuaya Jesús para majxilis motlatlaujtis?
¿Tlen tikchiuas para timajxilis timotlatlaujtis?
SEKIMEJ KIJTOUAJ: “Amitlaj ipati timotlatlaujtiskej porque amikaj techkaki”.
¿Tejuatsin tlen tikijtoua?
XIKILNAMIKTO
Ijkuak timotlatlaujtiaj ika nochi toyolo okachi kuali timouikaj iuan toTajtsin Dios. Noijki ayakmo sapanoua timotekipachouaj uan timoyolchikauaj para tikchiuaskej tlen toTajtsin Dios kineki.
Matikojpauikan
¿Akin moneki tiktlatlaujtiskej?
¿Ken moneki timotlatlaujtiskej?
¿Ken techpaleuia timotlatlaujtiskej?
NIN NOIJKI MITSPAKTIS
Miakej kinekij kimatiskej ken uelis motlatlaujtiskej. Xikita tlen kijtoua Biblia.
“¿Ken moneki timotlatlaujtiskej?” (Akin Tetlapouijtok, 1 de octubre 2010)
Xikita tleka moneki timotlatlaujtis uan ken uelis okachi kuali timotlatlaujtis.
“¿Tleka moneki timotlatlaujtiskej?” (Nin tlamachtil kajki itech jw.org/ncx)
Xikita tlen kijtoua Biblia akin moneki tiktlatlaujtiskej.
“¿Moneki tikintlatlaujtiskej santos noso imágenes?” (Nin tlamachtil kajki itech jw.org/ncx)
Xikitakan itech nin video kox moneki kanaj tiyetoskej ijkuak timotlatlaujtiaj.