TLAMACHTIL 20
¿Ken titlapaleuiaj tiiTlaixpantijkauan Jehová?
Jehová kipaktia nochi matikchiuakan ken moneki (1 Corintios 14:33). Ikinon itech ialtepe timochijchikauaj kuali tikyekchiuaskej iteki. ¿Ken tlapaleuiaj akinmej pouij itech ialtepe toTajtsin Dios? ¿Ken uelis titlapaleuiskej tinochtin?
1. ¿Akin kinyekana akinmej kichiuaj ken Cristo?
“Cristo kiyekana tlanechikol” (Efesios 5:23). Jesús kinualyekantok itekipanojkauan Jehová itech nochi tlaltikpak. Ye okitlali “tlakeuali yolmelajki uan ixtlamatki”. Ompa pouij sekimej tlayekankej ixtlamatkej uan noijki kinmixmatij ken Cuerpo Gobernante (xiktlajtolti Mateo 24:45-47). Ijkon ken otlayekanayaj apóstoles uan tlayekankej tlen okatkaj Jerusalén, axkan akinmej pouij itech Cuerpo Gobernante kinyekanaj akinmej kitekichiuiliaj toTajtsin Dios (Hechos 15:2). Pero yejuan amo ueyititokej itech ialtepe toTajtsin Dios. Kiluiaj Jehová makinpaleui uan kichiuaj tlen kijtoua iTlajtol, noijki kikauiliaj Jesús makinyekana.
2. ¿Ken tlapaleuiaj tlayekankej?
Tlayekankej kipiaj chikauak intlaneltokilis uan tlamachtiaj ika Biblia, noijki kinpaleuiaj uan kinyolchikauaj nochtin. Yejuan amikaj kintlaxtlauia. Kitekichiuiliaj toTajtsin Dios ika nochi inyolo, amo kichiuaj para itlaj kitlaniskej (1 Pedro 5:1, 2). Sekimej tokniuan kinmiluiaj siervos ministeriales, yejuan kinpaleuiaj tlayekankej uan satepan yejuan noijki uelis mochiuaskej tlayekankej.
Cuerpo Gobernante kinpejpena sekimej tlayekankej para makintlajpalokan tokniuan uan yejuan kinmiluiaj tlayekankej itech circuito. Yejuan kintlajpalouaj miakej tokniuan uan ijkuak ijkon kichiuaj kinpaleuiaj uan kinyolchikauaj. Noijki ika Biblia kitaj akinmej uelis mochiuaskej tlayekankej uan siervos ministeriales (1 Timoteo 3:1-10, 12; Tito 1:5-9).
3. ¿Tlen tekitl kichiua sejse iTlaixpantijka Jehová?
Ijkuak timonechikouaj tikueyichiuaj Jehová porque titlanankiliaj, sekimej tokniuan techmachtiaj, oksekimej techititiaj ken uelis titetlapouiskej uan noijki titlakuikaj. Noijki tikueyichiuaj Jehová ijkuak timochijchikauaj titetlapouiaj (xiktlajtolti Salmo 148:12, 13).
MATIMOMACHTIKAN
Matikitakan ken techyekana Jesús, tlen kichiuaj tlayekankej para kichiuaskej ken ye uan ken uelis tikinpaleuiskej.
4. Jesús se tlayekanki yolkuali
Jesús techiluia itlaj matikchiuakan. Xiktlajtoltikan Mateo 11:28-30 uan satepan xikitakan tlen namechmachtia.
¿Ken kipia iyelis Jesús uan ken kineki matimomachilikan?
¿Ken kichiuaj ken Jesús tlayekankej? Xikitakan VIDEO.
Biblia kijtoua ken moneki tlapaleuiskej tlayekankej.
Xiktlajtoltikan Isaías 32:2 uan 1 Pedro 5:1-3 uan satepan xikitakan tlen namechmachtia.
Jesús okinyolseuiaya oksekimej uan tlayekankej mochijchikauaj ijkon kichiuaskej, ¿ken tikita tlen yejuan kichiuaj?
¿Tlen okseki tlamantli mochijchikauaj kichiuaskej tlayekankej ijkon ken Jesús okichi?
5. Tlayekankej kichiuaj tlen tetlapouiaj
¿Ken kineki Jesús makitakan tlayekankej tekitl tlen yejuan kichiuaj? Xikitakan VIDEO.
Jesús okiteititi tlen moneki kichiuaskej akinmej techyekanaj itech tlanechikol. Xiktlajtoltikan Mateo 23:8-12 uan satepan xikitakan tlen namechmachtia.
¿Tlen kijtoua Biblia moneki kichiuaskej tlayekankej? ¿Timokuayejyekoua ijkon kichiuaj akinmej tlayekanaj itech okseki religiones?
Tlayekankej mochijchikauaj kuali mouikaskej iuan Jehová uan noijki kipaleuiaj infamilia ijkon makichiuakan.
Tlayekankej kintekipachoua tlen oksekimej kinpanoua.
Tlayekankej nochipa tetlapouiaj.
Tlayekankej tlamachtiaj pero noijki techpaleuiaj ijkuak titlachipauaj uan ijkuak tikchiuaj okseki tlamantli.
6. Tikinpaleuiaj tlayekankej
Biblia techiluia tleka moneki tikintlakamatiskej tlayekankej. Xiktlajtoltikan Hebreos 13:17 uan satepan xikitakan tlen namechmachtia.
¿Tleka kijtoua Biblia moneki tikintlakamatiskej akinmej techyekanaj? ¿Timokuayejyekoua moneki ijkon tikchiuaskej? ¿Tleka ijkon tikijtoua?
Xiktlajtoltikan Lucas 16:10 uan satepan xikitakan tlen namechmachtia.
¿Tleka moneki nochipa tikintlakamatiskej tlayekankej?
SEKIMEJ KIJTOUAJ: “Amo moneki tikpiaskej se religión”.
¿Tleka moneki timonechikoskej iuan oksekimej?
XIKILNAMIKTO
Jesús kiyekana ialtepe toTajtsin Dios, noijki kinyekana tlayekankej uan tejuan tiyolpakij ijkuak tikintlakamatij porque techmaluiaj. Ijkuak kichiuaj tlen kuali techmachtiaj tlen moneki tikchiuaskej.
Matikojpauikan
¿Akin kiyekana ialtepe toTajtsin Dios?
¿Ken kinpaleuiaj tlayekankej nochtin tokniuan?
¿Tlen tekitl kichiua sejse itekipanojka Jehová?
NIN NOIJKI MITSPAKTIS
Xikita ken kiteititiaj tetlasojtlaj tokniuan tlen poui itech Cuerpo Gobernante uan akinmej tlayekanaj.
Xikita ken tlapaleuiaj tokniuan akinmej tlayekanaj itech circuito.
¿Tlen kichiua se tokni tlen tlayekana itech circuito? (4:51)
Xikita ken kitekichiuiliaj toTajtsin Dios siuamej.
Xikita ken tlayekankej mochijchikauaj kinyolchikauaskej oksekimej
“Tlayekankej techpaleuiaj kuali ma tiyetokan” (Akin Tetlapouijtok, 15 de enero 2013)