¿Timochijchikajtok para “okachi titlapaleuis”?

FERNANDOa omomojtiaya porque ome tokniuan tlayekankej okiluijkej iuan motlapouiskiaj. Ijkuak tokni tlayekanki itech circuito okintlajpalouaya, tlayekankej okiluiayaj Fernando tlen omonekiaya kichiuas para okachi tlapaleuiskia itech tlanechikol. Ye omotlajtlaniaya kox se tonal yetoskia tlayekanki. Axkan tlayekanki itech circuito oksepa okintlajpaloto, ik non, Fernando omokuayejyekouaya tlen kiluiskiaj tlayekankej.

Se tlayekanki okitlajtoltili Fernando tlen kijtoua 1 Timoteo 3:1 uan okilui yiuelis tlapaleuiskia ken tlayekanki. Ye amo okineltokaya tlen okiluijkej uan okijto: “¿Tlen? ¿Amo nikajsikamati?”. Tokni tlayekanki oksepa okilui uan Fernando oyolpakik uan oixuetskak. Satepan ijkuak itech tlanechikol okijtojkej Fernando yokatka tlayekanki, nochtin tokniuan oyolpakej.

¿Kijtosneki amo kuali tla ikaj kineki okachi tlapaleuis itech tlanechikol? Amo. Apóstol Pablo okijkuilo ninmej tlajtolmej: “Tla se tlakatl mochijchikaua para yetos tlayekanki, kuali tlen kineki kichiuas” (1 Tim. 3:1). Miakej tokniuan okachi tlapaleuiaj ijkon ken kijtoua nin texto. Itech ialtepe toTajtsin Dios katej miakej tlayekankej uan siervos ministeriales. Pero moneki okachi yetoskej tlayekankej porque axkan katej okachi miakej tlanechikolmej. ¿Ken moneki kichiuaskej? ¿Akinmej kinekij yetoskej tlayekankej moneki san motekipachojtoskej ijkon ken okichi Fernando?

¿TIMOCHIJCHIKAUA “OKACHI TITLAPALEUIS”?

Tlajtoli timochijchikaua okachi titlapaleuis, ika griego kijtosneki tiknekis itlaj tikchiuas uan timochijchikauas para uelis tikchiuas. Ijkon ken ijkuak ikaj motilana para uelis kitekis se tlakilotl. Pero apóstol Pablo amo okijto ikaj moneki tlaixnekis para uelis yetos tlayekanki. ¿Tleka? Porque akinmej kinekij yetoskej tlayekankej ijkon kichiuaj porque kinekij kichiuaskej se kuali tekitl uan amo para miakej makinmixmatikan.

1 Timoteo 3:2-7 uan Tito 1:5-9 kijtoua tlen moneki kichiuaskej akinmej kinekij yetoskej tlayekankej. Se tokni tlen itoka Raymond, okijto: “Ne nikita ipati ken titlamachtiaj uan ken titlajtouaj pero okachi ipati tlen tikchiuaj. Miak ipati se tlayekanki mayeto yekmilajka para amaka makiteili tenawak, mayeto tlalnamikiliso. Noiwa mayeto yekmilajka iwa kuali mamoyekkuika iwan oksikimeh. Nochipa makinyekselicha akimeh kontlajpaloah. Mayeto se kuali tlakatl teyolsewi”.

Akin kineki melauak kichiuas tlen kuali yeknemi uan amo tlakajkayaua. Nochi kichiua ken moneki, ixtlamatki, teajsikamati uan nochi kuali kichiua. Ik non, tokniuan kineltokaj kinpaleuis ijkuak tlajyouiaj uan kuali kinyekanas itech tlanechikol. Noijki kuali kinselia oksekimej, ik non, kinyolchikaua telpochmej uan akinmej yikin peua momachtiaj. Kinyolchikaua akinmej mokokouaj uan akinmej yikipiaj miak xiuitl porque kipaktia kichiuas tlen kuali. Kichiua nochi non tlamantli para kinpaleuis oksekimej uan amo para okachi makimakakan miak tekitl.b

Tlayekankej uelis kiyekmelauaskej uan kiyolchikauaskej akin kineki okachi tlapaleuis itech tlanechikol. Pero moneki kichiuas ijkon ken kijtoua Biblia tokni akin kineki okachi tlapaleuis. Henry akin yikipia miak xiuitl tlapaleuia ken tlayekanki okijto: “Tla tikneki okachi titlapaleuis ximochijchikaua uan xikchiua tlen kijtoua Biblia”. Noijki okijto tlen kijtoua Eclesiastés 9:10: “Nochi tlen uelis tikchiuas, xikchiua ika mochikaualis. Tla tlayekankej mitsiluia itlaj xikchiua, ximochijchikaua para kuali tikchiuas. Nochipa xiyolpaki ijkuak itlaj tikchiua itech tlanechikol, ken ijkuak titlachpana. Tla timochijchikaua, oksekimej kitaskej tlen tikchiua”. Akin kineki yetos tlayekanki, moneki tekipanos uan moneki kichiuas tlen kiluiskej. Amo moneki moueyinekis nion tlaixnekis, moneki yetos yolyamanki (Mat. 23:8-12).

AMO XIMOKUAYEJYEKO NION XIKCHIUA TLEN AMO MONEKI

Akinmej kinekij okachi tlapaleuiskej, xamo kinekiskej itlaj kichiuaskej noso kijtoskej para ijkon tlayekankej makitakan kinekij tlapaleuiskej. Oksekimej kualanij ijkuak tlayekankej kinnojnotsaj. Tla ikaj ijkon kichiua uelis motlajtlanis: “¿Melauak nikneki nikinmaluis ichkauan Jehová noso san notech nimotekipachoua?”.

Onka okse tlamantli tlen moneki kichiuas akin kineki yetos tlayekanki: mochijchikauas para oksekimej ‘makitakah kenomi kichiwah’ (1 Ped. 5:1-3). ¿Ken uelis ijkon kichiuas? Moneki kixtopeuas uan amo kichiuas tlen amo kuali, uan noijki moneki kimatis mochias uan tlaxikos maski kiluiskej uelis okachi tlapaleuis noso amo. Maski se tonal uelis yetos tlayekanki amo kijtosneki nochi kuali kichiuas uan ayakmo motlapololtis (Núm. 12:3; Sal. 106:32, 33). Xamo tokni tlen kineki tlapaleuis mokuayejyekoua kichijtok nochi tlen moneki, pero oksekimej tokniuan amo ijkon kitaj (1 Cor. 4:4). Tla ijkon mitspanoua uan tlayekankej mitsnojnotsaj ika Biblia, xikinkaki uan amo xikualani. Satepan xikchiua ijkon ken omitsiluijkej.

¿TLEN TIKCHIUAS TLA MONEKI TIMOCHIAS?

Sekimej tokniuan mosotlauaj porque amo san niman kinmiluiaj uelis tlapaleuiskej. Tla te yiuejkika tikneki tiyetos tlayekanki, ¿yitimosotlajtok? Tla ijkon mitspanoua, xikilnamiki tlen kijtoua se texto itech Biblia: “Moyolkokoua akin kichixtok itlaj tlen amo mochiua pero ijkuak mochiua tlen kineki yetoskia ken se kuauitl tlen kitemaka yolilistli” (Prov. 13:12).

Ijkuak amo mochiua tlen tejuan tiknekij timoyolkokouaj. Ijkon okipanok Abrahán, Jehová okilui kipiaskia se konetl pero opanokej seki xiuitl uan Sara amo ueli okinpiaya ikoneuan (Gén. 12:1-3, 7). Ijkuak Abrahán yokipiaya miak xiuitl okitlajtlani Jehová tleka amo ueli okinpiaya ikoneuan. Maski Jehová okiyekilui tlen panoskia, nin omochi ijkuak opanok kanaj catorce xiuitl (Gén. 15:2-4; 16:16; 21:5).

¿Ayakmo oyolpakik Abrahán porque omonekiaya mochias? Amo. Ye okimatiaya Jehová kichiuaskia tlen okilui, ik non, omochixki. Satepan apóstol Pablo okijto: “Abraham wejkawitl omochixki iwa ijkó okiseli tlan Dios okilijka kimakaskia” (Heb. 6:15). Satepan toTajtsin Dios okiteochi Abrahán uan okimakak miak tlamantli. ¿Tlen techmachtia tlen okipanok?

Amo ximosotlaua tla yikipia seki xiuitl tikchixtok mamitsiluikan uelis tiyetos tlayekanki, xiktekichiuili Jehová uan itech xitlaneltoka. William yokinpaleui miakej tokniuan makitekichiuilikan Jehová, ik non, okijto: “Amo san niman uelis tikchiuaskej tlen kijtoua Biblia. Se tokni kiteititia tlen ueli kichiua uan ken mokuayejyekoua ijkuak kitlakamati tlen kinauatiaj uan noijki ijkuak kuali moyekana. Sekimej mokuayejyekouaj yolpakiskej tla kinmakaj okachi tekitl, pero non amo melauak porque akin ijkon kichiua, san itech non mokuayejyekojtok. Melauak tiyolpakiskej tla nochipa tiktekichiuiliaj Jehová maski san tlen tekitl techmakaskej uan san kanin tiyetoskej”.

Se tokni omochixki kanaj majtlaktli xiuitl uan satepan okiluijkej uelis yetoskia tlayekanki. Ye okijto tlen kajki itech amochtli Ezequiel capítulo 1: “Jehová kiyekana icarro uan ialtepe uan ye kijtoua kanin moneki yaskej. Jehová kijtos tlen mochiuas uan keman mochiuas, amo tejuan. Maski ne oniknekiaya niyetos tlayekanki uan oniknekiaya nitlapaleuis, san Jehová okimatiaya tlen kichiuaskia”.

Tla te tikneki tiyetos tlayekanki, xikinpaleui tokniuan mayolpakikan. Amo ximosotlaua tla tikmachilia amo san niman mitsiluia xiyeto tlayekanki. Raymond tlen achto itech otimotlapouijkej okijto: “Ijkuak tiknekij tikpiaskej miak tlamantli amo tiyolpakij uan ijkuak tiknekij itlaj mapano ayakmo kuali tiktekichiuiliaj Jehová”. Para amo ijkon mamitspano xikchiua tlen kijtoua Biblia uan xikmati ximochia. Noijki ximomachti Biblia para okachi kuali timouikas iuan Jehová, xitetlapoui, xikinmachti oksekimej uan kuali xikyekana mofamilia ijkuak san sekan nanmomachtiaj, ijkon yejuan noijki kitekichiuiliskej Jehová. Noijki xiyolpaki ijkuak tiyetos inmiuan tokniuan ijkon amo okachi timosotlauas.

Jehová mitskauilia ximochijchikaua para uelis titlapaleuis itech tlanechikol uan ijkon uelis tikinpaleuis tokniuan. Ye uan ialtepe amo kinekij ximoyolkoko noso ximosotlaua. Jehová kinteochiua uan kinpaleuia akinmej kinekij okachi kitekichiuiliskej, xikilnamiki “amo tetlajyouiltia” ijkuak techteochiua (Prov. 10:22).

Maski yimiak xiuitl timochixtok, uelis timochijchikauas tikchiuas okseki tlamantli. Jehová amo kilkauas tla timochijchikaua tikchiuas tlen kijtoua Biblia uan tla kuali tikmaluia mofamilia uan oksekimej tokniuan. Xiyolpaki ijkuak tiktekichiuilia Jehová maski san tlen tekitl tikpias.