TLAJTLANILMEJ ITECH BIBLIA
¿Tlen kijtosneki Tonal ijkuak toTajtsin Dios Tlaixkomakas?
Sapanoa tiyolpakiskej itech tonal ijkuak toTajtsin Dios tlaixkomakas. ¿Tleka?
Yiuejkika Jehová okintlali seki jueces pampa ma kimakixtikan ialtepe itech nochi tlamantli amo kuali (Jueces 2:18). Biblia kijtoa Tonal ijkuak toTajtsin Dios Tlaixkomakas sapanoa tiyolpakiskej pampa Jehová, Juez tlen kiixkomakas nochi Tlaltikpak, techmakixtis itech nochi tlen amo kuali. (Xiktlajtolti Salmo 96:12, 13 uan Isaías 26:9.)
Kichiuas ika Jesús, akin okitlali ken juez pampa kinmixkomakas akinmej yoltokej uan akinmej yomikej (Hechos 10:42; 17:31). Itech Tonal ijkuak toTajtsin Dios Tlaixkomakas Jesús kinyolitis akinmej omikej uan amo okintlapouijkej itech Jehová, uan ijkon uelis kixmatiskej uan uelis kitlasojtlaskej. (Xiktlajtolti Hechos 24:15.)
¿Keski uejkauas Tonal ijkuak toTajtsin Dios Tlaixkomakas?
Biblia kijtoa nin Tonal uejkauas mil xiuitl. Ijkuakon kinyolitiskej akinmej yomikej. Itech nochi mil xiuitl kixmatiskej Jehová uan uelis momachtiskej pampa kitlakamatiskej (Apocalipsis 20:4, 12). Miakej tlaltikpaktlakamej kijtoaj kinmixkomakaskej pampa nochi tlen okichijkej ijkuak oyoltokaj. Pero Biblia techiluia kinmixkomakaskej pampa nochi tlen kichiuaskej ijkuak kinyolitiskej. (Xiktlajtolti Romanos 6:7.)
Biblia noijki techtlapouia itech se Tonal keman Tlaixkomakaskej tlen san niman ajsis, nin mochiuas ijkuak ayamo peuas mil xiuitl. Nin Tonal noijki itoka ijkuak tlamis nochi, ijkon ken yotimomachtijkej itech tlamachtilmej tlen uitsej kanin peua nin revista. Ijkuakon toTajtsin Dios kinmixpolos nochtin akinmej amo yolkualmej (2 Pedro 3:7). Ik non, moneki ma tikteititikan melauak tiktlasojtlaj Jehová. (Xiktlajtolti 2 Pedro 3:9, 13.)