Xikmalui mokuayejyekol uan amo ma mitskajkayaua tlen amo kuali

Tlatitlanil Pablo okitaya tlen ika tlakajkayaua Satanás, pero oksekimej tokniuan amo okitayaj. Se neskayotl, sekimej tokniuan tlen ochantiayaj Corinto san yejuan intech otlaneltokayaj uan omokuayejyekoayaj okipiayaj chikauak intlaneltokilis (1 Cor. 10:12). Ik non, Pablo okinnejmachti: “Ne nimawi manomechkajkayawakah iwa ayakmó xikneltokakah n Cristo” (2 Cor. 11:3).

Tlen okijto Pablo techmachtia ma timomaluikan uan amo san totech ma titlaneltokakan. Para amo techijtlakos tlen ika tlakajkayaua Satanás, moneki ma tikmaluikan tokuayejyekol uan ma tikitakan tlen uelis techpanos.

¿TLEN UELIS TECHPANOS?

Onka miak tlamantli tlen tlaltikpaktlakamej kitekitiltiaj para techkajkayauaskej uan uelis kijtlakoskej tokuayejyekol uan satepan tikchiuaskej tlen kinekij. Tlen kitekitiltiaj mouika iuan “tlakajkayaualistli, tlen amo melauak [...] uan kinekij kinauatiskej tokuayejyekol”. Nochi nin tlamantli mouika iuan “auilnemilistli, tlen amo kuali uan tlen tetlajyouilti” (Propaganda and Persuasion).

¿Tleka techijtlakoa tlen ika tlakajkayauaj? Porque nin ken se gas temikti tlen amo mota nion moijnekui. Tikijyotilanaj uan yolik kijtlakojti totlalnamikilis. Sociólogo Vance Packard kijtoa tlen tikitaj “techyoltilana ma tikchiuakan tlen amo keman otimokuayejyekoayaj tikchiuaskej”. Okse ixtlamatki kijtoa tlakamej uan siuamej “kichiuaj okachi miak tlamantli tlen amo kuali” uan nin panoa porque onka miak tlamantli tlen tlaltikpaktlakamej kitekitiltiaj, ik non, momiktiaj, onka guerras, mokokoliaj tlaneltokalismej uan noijki amo motlasojtlaj tlaltikpaktlakamej (Easily Led—A History of Propaganda).

Tla tlaltikpaktlakamej tlakajkayauaj ika miak tlamantli, Satanás okachi amo oui techkajkayauas. Yiuejkika kitiuits tlen kichiuaj tlaltikpaktlakamej. Ken ye kiyekana nochi tlen onka itech Tlaltikpak, uelis kitekitiltis san tlen ye kinekis uan ijkon techkajkayauas (1 Juan 5:19; Juan 8:44). Biblia kijtoa Satanás “kinmixtlapoyawaltia” uan “kinkajkayawa nochteh n tlaltikpaktlakah” (2 Cor. 4:4; Apoc. 12:9). ¿Tlen uelis tikchiuaskej?

OKACHI XIMOMALUI

Jesús okijto tlen uelis tiktekitiltiskej para amo techkajkayauas tlen Satanás kitekitiltia, okijto: “Iwa nonkixmatiskeh tlan milák, iwa tlan milák nomechmakixtis” (Juan 8:31, 32). Kijtoaj itech guerra nochtin tlakajkayauaj, ik non, se soldado moneki kimatis akin itech tlaneltokas. Tejuan noijki moneki timomaluiskej para tikmatiskej akin itech titlaneltokaskej. Uan Jehová techiluia ma titlaneltokakan itech Biblia. Ompa nochi kajki tlen ika uelis tikixnamikiskej tlen Satanás kitekitiltia (2 Tim. 3:16, 17).

Satanás kuali kimati Biblia techpaleuia. Ik non, ye kitekitiltia tlen onka itech Tlaltikpak para ma timokuayejyekokan itech okseki tlamantli uan amo ma tiktlajtoltikan nion ma timomachtikan Biblia. ¡Pero amo xikkauili ma mitskajkayaua! (Efes. 6:11). Moneki ma timochijchikauakan uan kuali ma tikajsikamatikan tlen melauak tlamachtia Biblia (Efes. 3:18). Ximokuayejyeko tlen okijto se tlamachti tlen itoka Noam Chomsky: “Amo ikaj uelis kikalakis tlen melauak itech tokuayejyekol. Moneki tejuan tiktemoskej”. Ik non, mojmostla kuali ximomachti tlen melauak tlamachtia Biblia (Hech. 17:11).

Kuali ma tikmatokan Satanás amo kineki ma tikitakan tlen kuali uan tlen amo kuali. ¿Tleka? Ken kijtoa se amochtli, nochi tlen kitekitiltiaj tlen ika tlakajkayauaj okachi totoka kichiuaj ijkuak tlaltikpaktlakamej amo mokuayejyekoaj tlen kichijtikisaj (Media and Society in the Twentieth Century). Ik non, amo san niman xikneltoka tlen mitsiluiskej (Prov. 14:15). Xiktekitilti tlen toTajtsin Dios omitsmakak, kuali ximokuayejyeko uan xikita kox melauak tikneltoka tlen tlamachtia Biblia (Prov. 2:10-15; Rom. 12:1, 2).

SATANÁS KINEKI TECHXELOS

Soldados kinmomojtiaj akinmej iuan moteuiskej uan ijkon uelis kintlaniliskej. Uelis kichiuaskej sekimej soldados san yejuan ma moteuikan noso ma moxelokan. Se soldado alemán okijto tleka ialtepe amo otlatlanki itech Primera Guerra Mundial, okijto: “Tlen okitekitiltijkej oksekimej soldados nochtin okinmomojti, ijkon ken se koatl kimomojtia se tochi”. Satanás noijki ijkon kichiua, kineki kinxelos tokniuan uan ijkon uelis techtlanilis. Se neskayotl, uelis kichiuas sekimej tokniuan ma mokualanikan noso amo keman ma kilkauakan tlen okinchiuilijkej uan ijkon ma moxelokan itech ialtepe toTajtsin Dios.

¡Amo xikkauili ma mitskajkayaua! Xikkauili iTlajtol toTajtsin Dios ma mitsyekana. Biblia techyoleua san niman ma timotlapojpoluikan iuan tokniuan uan ijkon uelis san sekan tiyetoskej (Mat. 5:23, 24; Col. 3:13, 14). Noijki technejmachtia tlen uelis techpanos tla timoxeloskej itech tlanechikol (Prov. 18:1). ¿Tleka amo tikita kox mitsijtlakojtok tlen kitekitiltia Satanás? Se neskayotl, ximokuayejyeko ijkuak san niman otikualanki. Axkan ximotlajtlani: “¿Tlen onikchi? ¿Onimokuayejyeko ken akinmej amo kixmatij toTajtsin Dios noso onimokuayejyeko ken toTajtsin Dios?” (Gál. 5:16-26; Efes. 2:2, 3).

AMO IKAJ MA KICHIUA AYAKMO XITLANELTOKA

Tla se soldado ayakmo kineltokilis akin kinauatia, ayakmo kuali moteuis iuan oksekimej. Ik non, akinmej kitekitiltiaj tlen ika tlakajkayauaj kichiuaj ayakmo ma yetokan yolmelajkej soldados. Kinmiluiaj oksekimej: “Amo xikinneltokilikan akinmej namechyekanaj” noso “¡Kichiuaskej xitlajyouikan!”. Uan san kitemojtokej itlaj amo kuali ma kichiuakan uan kitekitiltiskej para ika kinkajkayauaskej. Satanás noijki ijkon kichiua. Uan amo kineki intech ma titlaneltokakan akinmej Jehová kintekitiltia para ma kiyekanakan ialtepe.

¿Ken uelis timomaluis? Amo keman xikkaua ialtepe Jehová uan xikintlakamati akinmej kiyekanaj, maski tlajtlakolejkej (1 Tes. 5:12, 13). Amo xikinkauili ma mitskajkayauakan akinmej yomoxelojkej itech Jehová noso akinmej amo kitlakaitaj ialtepe toTajtsin Dios, maski ma mota melauak tlen kijtoaj (2 Tes. 2:2; Tito 1:10). Xikchiua tlen okiluijkej Timoteo: “Nochipa xikneltoka tlan omitsmachtijkeh, non te yotikyekneltokak” (2 Tim. 3:14, 15). ¡Melauak uelis itech titlaneltokaskej! Porque onka miak tlamantli tlen kiteititia yikanaj cien xiuitl Jehová kitekitiltia “tlakeuali yolmelajki” para techmachtis tlen melauak tlamachtia Biblia (Mat. 24:45-47, TNM; Heb. 13:7, 17).

AMO XIMOMOJTI

Ma tikilnamiktokan Satanás kitemoa ken kijtlakos tokuayejyekol ika okseki tlamantli tlen mota. Ualeua kineki techmomojtis, “nin se tlamantli tlen yiuejkika okitekitiltiayaj” (Easily Led—A History of Propaganda). Se neskayotl, se tlamachti británico tlen itoka Philip Taylor, okijto asirios okinmoaxkatijkej akinmej iuan omoteuiayaj porque okatka política temomojti uan miak tlamantli okitekitiltiayaj tlen ika otlakajkayauayaj. Satanás noijki kineki techmomojtis ika tlaltikpaktlakamej, ijkuak techtojtokaj, ika mikilistli noso ika okseki tlamantli uan kichiuas ayakmo ma tiktekichiuilikan Jehová (Is. 8:12; Jer. 42:11; Heb. 2:15).

¿Tikkauilis Satanás ma mitsmomojti uan timosotlauas noso titlajtlakolchiuas? Jesús okijto: “Amo xikinmawilikah akimeh weletis nomechmiktiskeh. Pero satepa ayakmitla weletis nomechtoktiskeh” (Luc. 12:4). Nochipa xikneltoka Jehová yokijto mitsmaluis, mitsmakas “weletílistli [tlen] amo toaxka, yej wits de Dios” uan mitspaleuis amo ximomojti uan xiyeto xiyolmelajki (2 Cor. 4:7-9; 1 Ped. 3:14).

Ualeua uelis timomojtis noso timosotlauas. Pero xikilnamiki tlen Jehová okilui Josué: “Ximoyolchikaua uan ximochijchikaua. Amo ximomojti nion ximosotlaua porque Jehová moDios mouan kajki maski san kanin tias” (Jos. 1:9). Ijkuak timotekipachos, san niman xiktlatlaujti Jehová uan xikilui tlen mitstekipachoa. Kuali xikmati “iyolsewilis Dios” kimaluis moyolo uan mokuayejyekol para uelis tikixnamikis nochi tlen Satanás kitekitiltia (Filip. 4:6, 7).

¿Tikilnamiki tlen okitekitilti rabsaqué para kimomojtis ialtepe Jehová? Ye okijto amo ikaj uelis kinmakixtiskia itech Asiria. Nion Jehová amo kinpaleuiskia. Noijki okijto Jehová okititlanki ma kipojpoloti non altepetl. Uan Jehová okiyolchika ueyi tekiua itech Judá uan okilui amo ma momojti maski miak tlamantli okinmiluijkej itekipanojkauan (2 Rey. 18:22-25; 19:6). Satepan Jehová okiualtitlanki se ángel uan okinmikti 185,000 (ciento ochenta y cinco mil) asirios (2 Rey. 19:35).

XIYETO TIIXTLAMATKI UAN NOCHIPA XIKKAKI JEHOVÁ

¿Yotikitak se película kanin mota ken sekimej tlakamej kitlaliliaj se trampa se tlakatl? ¿Otiknekiaya tikiluis: “¡Amo xikinneltokili, non se trampa!”? Ximokuayejyeko ángeles mitsualtlatokej uan mitsiluiaj: “¡Amo ma mitskajkayaua Satanás!”.

Amo xikneltoka tlen ika tlakajkayaua Satanás (Prov. 26:24, 25). Xikkaki Jehová uan nochipa itech xitlaneltoka (Prov. 3:5-7). Xikchiua tlen mitsiluia: “Xiixtlamati, nokone uan xinechyolpakti, ijkon uelis niknankilis akin nechpinauia” (Prov. 27:11). Tla ijkon tikchiuas, mokuayejyekol amo itlaj kipanos uan tiktlanilis tlen amo kuali.