Jehová kinteochiua akinmej kitemakaj tlen kipiaj

YIMIAK xiuitl kitlamaniliaj Jehová uan nin sapanoa miak ipati. Israelitas okintemakayaj yolkamej uan akinmej kichiuaj ken Cristo noijki ‘kiweyijkachiwah Dios’. Pero Jehová noijki kipaktia okseki tlamanali (Heb. 13:15, 16). Yolpakij tlen kitemakaj tlen kipiaj ika nochi inyolo uan Jehová kinteochiua ijkon ken tikitaskej sekimej neskayomej.

Ana okatka se israelita yolmelajki ixpan Jehová, okinekiaya kipias se konetl pero amo ueli okinpiaya ikoneuan. Se tonal okitlatlaujti Jehová uan okilui tla kimakaskia se konetl, kimakaskia para ma kitekichiuili itech nochi inemilis (1 Sam. 1:10, 11). Satepan okipixki se chokotsin uan okitokayoti Samuel. Ijkuak ayakmo ochichiaya okiuikak itech tabernáculo para ma kitekichiuili Jehová ijkon ken okijto Ana. Jehová okiteochi Ana porque okichi ken okijto. Satepan okinpixki ok makuili ikoneuan uan Samuel omochi teotlajtojki uan noijki okijkuilo seki tlamantli tlen kajki itech Biblia (1 Sam. 2:21).

Ijkon ken Ana uan Samuel, tejuan noijki uelis timotemakaskej ixpan Jehová uan tiktekichiuiliskej. Jesús okijto tikseliskej miak tlateochiualistli tla tiktekichiuiliskej Jehová (Mar. 10:28-30).

Itech achto siglo, okatka se tokni tlen omotokayotiaya Dorcas “nochipa okichiwaya tlan kuali iwa okimpalewiaya akimeh amitla okipiayah”. Satepan “owalmokoko iwa omikki” uan tokniuan sapanoa omoyolkokojkej. Ijkuak okimatkej Pedro ik ompa onemiaya, okiluijkej san niman ma kitati Dorcas. ¡Sapanoa oyolpakej ijkuak Pedro okiyoliti! Itech Biblia kijtoa nin achto yolitilistli okichi nin tlatitlanil (Hech. 9:36-41). ToTajtsin Dios amo keman okilka nochi tlen okichi Dorcas (Heb. 6:10). Ijkuilitok itech Biblia tlen okipanok uan axkan uelis tikchiuaskej ken ye.

Tlatitlanil Pablo noijki techmaka kuali neskayotl ijkuak okitemakak tlen okipiaya uan omotekipacho intech oksekimej. Okintlajkuilili tokniuan tlen ochantiayaj Corintio: “Iwa ne ika nochi noyolo niktemakas nochi tlan nikpia, iwa asta manechmiktikah para nomejwah ximomakixtikah” (2 Cor. 12:15). Pablo kuali okimatiaya tla tiktemakaj tlen tikpiaj, tiyolpakiskej uan noijki toTajtsin Dios techteochiuas uan techselis (Hech. 20:24, 35).

Jehová kipaktia ma tikpaleuikan Tekiuajkayotl uan tokniuan. Pero ¿onka okseki tlamantli tlen moneki ma tikchiuakan? Kema. Uelis tikinpaleuiskej tokniuan pero okachi tikueyichiuaskej Jehová tla tikmakaj tlen tikpiaj. Tomin tlen tiktemakaj ika nochi toyolo tlapaleuia ika ma tetlapouikan itech nochi Tlaltikpak. Se neskayotl, tomin tlen tiktemakaj kinpaleuia misioneros uan oksekimej tlen okachi kitekichiuiliaj Jehová. Noijki moneki tomin para kinyektlaliskej amatlajkuilolmej, kintlajtolkuepaskej, kinchiuaskej videos noijki moneki tomin para kinpaleuiskej tokniuan tlen tlajyouiaj uan noijki tlen ika kinchijchiuaskej kalmej kanin timonechikoskej. Jehová okachi techteochiuas tla tiktemakaj tlen tikpiaj. Uan ijkon tikueyichiuaskej ika tlen tikpiaj (Prov. 3:9; 22:9).

¿Ken uelis titlapaleuiskej para ma motetlapoui itech nochi tlaltikpak?

Ijkon ken ijkuak okatka tlatitlanil Pablo, axkan noijki tikxeloaj seki tomin uan tiktlaliaj ijtik caja kanin kijtoa “Tomin para ma motetlapoui itech nochi Tlaltikpak” (1 Cor. 16:2). Sejse metstli tokniuan kititlanij tomin kanin tekitij iTlaixpantijkauan Jehová. Uan tejuatsin noijki uelis tiktemakas motomin ika tokayotl tlen kitekitiltiaj iTlaixpantijkauan Jehová. Tla tikneki tikmatis okachi itech nin tokayotl, xitlanotsa itech kali kanin tekitij iTlaixpantijkauan Jehová. Noijki uelis titlatemos itech www.jw.org/ncx. Nikan moijtoa seki tlamantli ken uelis tiktemakas motomin:

TOMIN TLEN TIKTEMAKAJ IKA NOCHI TOYOLO

Uelis tiktitlanis itech banco noso ika se tarjeta de débito noso crédito. Itech seki altepemej uelis tiktitlanis itech www.jw.org/ncx página tlen tikpiaj itech Internet.
Uelis tiktemakas tomin, koskamej tlen patiojkej uan okseki tlamantli. Uan xikijkuilo se amatl kanin tikyekijtoa ika nochi moyolo tiktemaka nin tlamantli.

MOTOMIN UELIS MITSKUEPILISKEJ

Uelis tiktemakas motomin uan ijkuak tiknekis, oksepa mitskuepiliskej.
Xikijkuilo se amatl kanin tikyekijtoa tiknekis ma mitskuepilikan.

NIKAN MOIJTOA SEKI TLAMANTLI KEN UELIS TIKTEMAKAS MOTOMIN

Nikan tikajsis okseki tlamantli ken uelis tiktemakas motomin para titlapaleuis okachi ma motetlapoui itech nochi Tlaltikpak. Achto tiktemakas motomin, xitlanotsa kanin tekitij iTlaixpantijkauan Jehová para tikmatis ken uelis tiktemakas. Itech altepemej kipiaj tlatlamantli tlanauatilmej, ik non, timitsyoleuaj xiktlajtlani akin kinmixmati tlanauatilmej uan ijkon tikmatis tlen tikchiuas.

Seguros uan jubilaciones: Tla tikpia se seguro de vida noso yitikpia mojubilación, uelis tikpejpenas se tokayotl tlen kipiaj iTlaixpantijkauan Jehová para ika uelis kiseliskej tomin.

Tomin tlen tikpia itech banco: Noijki uelis tiktekitiltis se tokayotl tlen kipiaj iTlaixpantijkauan Jehová para ma kiselikan motomin ijkuak timikis. Moneki mochiuas ken kijtoaj tlanauatilmej itech moaltepe.

Acciones uan bonos: Uelis tiktemakas motomin ika se tokayotl tlen kipiaj iTlaixpantijkauan Jehová noso uelis tikpejpenas ijkuak timikis ma kipanoltilikan nin tokayotl.

Tlalmej noso kalmej: Tla tikpia se tlali noso se kali tlen uelis monemakas, uelis tiktemakas ika se tokayotl tlen kipiaj iTlaixpantijkauan Jehová. Tla ok ompa tichanti, uelis ompa tiyetos hasta ijkuak timikis.

Testamentos uan fideicomisos: Uelis tiktemakas se tlali noso tomin ika se tokayotl tlen kipiaj iTlaixpantijkauan Jehová. Uelis tiktemakas tlen tiktlanis ijkuak tikchiuas se contrato de fideicomiso. Nin uelis mitspaleuis ijkuak tiktlaxtlauas impuestos.

Ijkon ken yotikitakej seki tlamantli ken uelis tiktemakas motomin, moneki tikyektlalis seki tlamantli. Tla tikneki tikmatis okachi ken uelis tiktemakas motomin para okachi ma motetlapoui itech nochi Tlaltikpak, xiktlajtolti amatlajkuilol Donaciones planificadas para favorecer el servicio del Reino en todo el mundo. Nin amatlajkuilol kajki ika español uan inglés. Noijki kiyekijtoa ken uelis tiktemakas tlen tikpiaj. Uelis tlatlamantli tlanauatilmej kinpiaj altepemej, ik non, uelis amo nochi tikchiuas ijkon ken nikan moijtoa. Miakej ijkon kitemakaj intomin para ma motetlapoui itech nochi Tlaltikpak uan noijki amo miak impuestos kitlaxtlauaj. Tla itech moaltepe onka nin amatlajkuilol, xiktlajtlanili secretario kanin timonechikoa.

Tla tikneki tikmatis okachi xikalaki itech www.jw.org/ncx uan xikchiua clic kanin kijtoa “Nikneki niktemakas tomin ika nochi noyolo” noso xitlanotsa itech kali kanin tekitij iTlaixpantijkauan Jehová.