¿Melauak Jesús nopatka omotemakak?
BIBLIA techiluia tlen okimachiliayaj akinmej yiuejkika okitekichiuilijkej toTajtsin Dios porque okatkaj ken tejuan (Sant. 5:17). Ma tikitakan tlen okijto tlatitlanil Pablo: “Ijkuak nikneki nikchiwas tlan kuali, nikita nin tlanawátili amo kuali kajki noijtik. [...] ¡Nimialma!” (Rom. 7:21-24). Xamo noijki ijkon timomachiliaj. Pero techyolchikaua tlen okijto Pablo porque noijki timochijchikauaj tikchiuaskej tlen kuali.
Pablo noijki okijto ken okitaya Jesús topatka omotemakak. Gálatas 2:20 kijtoa: “Ikone n Totajtsi Dios, Akin satlawel onechtlasojtlak iwa omotemák makimiktikah nopatka”. Pablo okineltokaya ipatka omotemakak. ¿Tikneltokaj noijki Jesús topatka omotemakak? Xamo ualeua timotlajtlaniaj kox melauak topatka omotemakak.
Ualeua timoyolkokoaj porque achto otitlajtlakolchijkej. Ik non, oui tikneltokaskej toTajtsin Dios techtlasojtla uan kox melauak yotechtlapojpolui. Noijki xamo oui tikneltokaskej okiualtitlanki iKone tisejse ma techmakixtiki. Nin se tetliokolil tlen tisejse tikseliaj. ¿Melauak kineki Jesús ijkon ma tikitakan? Tla ijkon, ¿tlen techpaleuis? Ma tikinnankilikan ninmej tlajtlanilmej.
¿KEN KITA JESÚS TOPATKA OMOTEMAKAK?
Jesús kineki ma tikneltokakan tisejse topatka omotemakak. ¿Tleka moneki ma tikneltokakan? Ma timokuayejyekokan tlen kijtoa Lucas 23:39-43, TNM. Se tlakatl okipilojkej inauak Jesús uan non tlakatl okimatiaya kimiktiskej porque yiuejkika ijkon okinpiloayaj itech se tlaketsali akinmej amo yolkualmej. Melauak otlajyouijtoka ijkuak okitlatlaujti Jesús: “Techilnamiki ijkuak pewas titlanawatis”.
¿Tlen okinankili Jesús? Ma timokuayejyekokan ken sapanoa okikokoaya itsonteko ijkuak omokopki uan okitak non tlakatl. Sapanoa otlajyouijtoka pero omochijchika kixuetskilis uan ika tlasojtlalistli okilui: “Axkan melauak nimitsiluia: Tiyetos nouan itech xochitlali”. Jesús uelis san kilnamiktiskia uan kiluiskia: “Onimochi ni tlakatl amo oniwala manechtekitilikah, yej oniwala onitekitiko iwa nimotemakas manechmiktikah iwa ijkó miakeh mamomakixtikah” (Mat. 20:28). Pero ye okipaleui ma kajsikamati noijki ipatka omotemakak. Okilui: “Tiyetos nouan itech xochitlali”. Okilui uelis kipiaskia yolilistli tlen amo keman tlamis porque ipatka omotemakak.
Non tlakatl amo keman okitekichiuili toTajtsin Dios. Pero Jesús okinekiaya ma kajsikamati noijki ipatka omotemakak. Jesús okinekiaya ma kajsikamati non tlamantli. Noijki kineki akinmej yotimoapolaktijkej uan tiktekichiuiliaj Jehová ma tikajsikamatikan topatka omotemakak. Ik non, ¿tlen techpaleuis ma tikneltokakan Jesús topatka omotemakak uan tisejse techpaleuia maski achto otitlajtlakolchijkej?
¿TLEN OKIPALEUI PABLO?
Pablo okajsikamatki Jesús ipatka omotemakak porque okinauati ma tetlapoui. Okijto: “Niktlasojkamati n Toteko Cristo Jesús, Akin onechmák chikawálistli para manitetlapowi de itlajtol, porke Ye okitak nikmati niktlakita. Achto fiero onitlajtoaya de Cristo iwa [onikintlajyouiltiaya] iwa onikinwijwikaltiaya akimeh okineltokayah” (1 Tim. 1:12-14). Pablo okimatiaya Jesús okiknomatiaya, okitlasojtlaya uan itech otlaneltokaya porque okinauati ma tetlapoui. Noijki tejuan tisejse technauatia ma titetlapouikan (Mat. 28:19, 20). ¿Tejuan noijki titetlapouiaj porque tikajsikamatij Jesús topatka omotemakak?
Ma tikitakan tlen okipanok Albert. Ye okikixtijkej itech tlanechikol kanaj treinta y cuatro xiuitl uan yikin oksepa omokopki iuan Jehová. Ye okijto: “Nochipa nikilnamiki tlen amo kuali onikchi. Pero ijkuak nitetlapouia, nikmachilia Jesús onechnauati ma nitetlapoui ijkon ken okinauati Pablo. Nin nechpaleuia ma niyolpaki, kuali ma nimomachili uan ma nikilnamikto Jehová satepan okachi nechteochiuas” (Sal. 51:3).
Ma tikinpaleuikan akinmej tikinmachtiaj ma kajsikamatikan Jesús kinmiknomati uan kintlasojtla.
Axkan ma tikitakan tlen okipanok Allan. Ijkuak ayamo omomachtiaya Biblia sapanoa oteuitekiaya uan okichi miak tlamantli amo kuali. Ye okijto: “Ok nikilnamiki tlen amo kuali onikchi uan nechyolkokoa. Pero niktlasojkamatilia Jehová nechkauilia ma nitetlapoui maski sapanoa onitlajtlakolchi. Ijkuak nitetlapouia uan nechkakij, nikilnamiki Jehová yolkuali uan tetlasojtla. Jehová nechpaleuia ma nikintlapoui akinmej kichiuaj ken ne onikchiuaya”.
Ijkuak titetlapouiaj techpaleuia ma timoyolchikauakan uan ma tikchiuakan tlen kuali. Techilnamiktia Jesús techiknomati, techtlasojtla uan totech tlaneltoka.
JEHOVÁ “OKACHI WEYI KE TOYOLO”
Xamo hasta ijkuak tlamis nochi tlen amo kuali timoyolkokojtoskej porque otitlajtlakolchijkej. ¿Tlen techpaleuis amo okachi ma timoyolkokojtokan?
Ma tikitakan tlen okipanok Jean. Ye moyolkokoa porque achto okipiaya ome ixko. Okijto: “Niyolpaki nikmatis toTajtsin Dios ‘okachi weyi ke toyolo’” (1 Juan 3:19, 20). Noijki techyolseuia tikmatiskej Jehová uan Jesús kajsikamatij titlajtlakolejkej. Ik non, ma tikilnamiktokan Jehová okiualtitlanki iKone ma kinmakixtiki tlajtlakolejkej (1 Tim. 1:15).
Tikajsikamatiskej Jesús topatka omotemakak tla timokuayejyekoaj miakej okintlasojtlak maski okatkaj tlajtlakolejkej. Noijki tikajsikamatiskej tla timochijchikauaj kuali titetlapouiaj ijkon ken otechnauati. Ijkon uelis tikijtoskej ken Pablo: Jesús “satlawel onechtlasojtlak iwa omotemák makimiktikah nopatka”.