Biblia techiluia tlen panos satepan
¿Se tonal yotimotlajtlani tlen panos satepan? Biblia kijtoua ayakmo miak poliui tikitaskej miak tlamantli tetlajtlachialti uan tinochtin tikixnamikiskej.
Jesús okiyekijto ken tikmatiskej “itlanawatil Dios ya walajsi” noso iTekiuajkayo (Lucas 21:31). Noijki okijto panoskia guerras, tlalolinis, yetos apistli uan miak kokolistli ijkon ken axkan panotok (Lucas 21:10-17).
Biblia noijki kijtoua tlen panoskia itlamian tonalmej. Tlanauatiskiaj tekiuajkej uan akinmej kinyekanaskiaj kichiuaskiaj tlen amo kuali. Xikita nin itech 2 Timoteo 3:1-5. Xamo tikitas melauak ijkon panotok tlen ompa kijtoua.
¿Tlen kijtosneki nin? Ayakmo miak poliui uan iTekiuajkayo toTajtsin Dios kichiuas kuali ma tiyetokan (Lucas 21:36). Biblia kijtoua toTajtsin Dios kichiuas miak tlamantli kuali nikan tlaltikpak uan sapanoua techpaleuis. Ma tikitakan seki tlamantli tlen kichiuas.
TIKPIASKEJ SE KUALI TEKIUA
Jesús “okimakakej tlanauatijkayotl uan ueyitilistli uan tekiuajkayotl para uejueyij altepemej uan nochtin akinmej tlajtouaj nochi tlatlamantli tlajtolmej ma kitekichiuilikan. Itlanauatijkayo se tlanauatijkayotl tlen amo keman tlamis uan itekiuajkayo amo keman kixpoloskej” (DANIEL 7:14).
¿Tlen kijtosneki? ToTajtsin Dios okitlali se Tekiuajkayotl tlen tlanauatis ipan nochi tlaltikpak uan Jesús ye Tekiua. Nin Tekiuajkayotl amo tlanauatis ken axkan tekiuajkej tlanauatiaj. Nin Tekiuajkayotl techpaleuis nochipa ma tiyolpakikan.
AMO TIMOKOKOSKEJ
“Amikaj kijtos: ‘Nimokokoua’” (ISAÍAS 33:24).
¿Tlen kijtosneki? Amo keman itlaj techpanos nion timokokoskej. Nochipa tiyoltoskej uan ayakmo tiixpoliuiskej.
TIYETOSKEJ IKA YOLSEUILISTLI
“Kintlajtlamia guerras itech nochi tlaltikpak” (SALMO 46:9).
¿Tlen kijtosneki? Tinochtin tiyetoskej ika yolseuilistli uan ayakmo titlajyouiskej porque yetos se guerra.
YETOSKEJ SAN AKINMEJ YOLKUALMEJ
“Akinmej amo yolkualmej ayakmo yetoskej” uan “akinmej yolkualmej kinmakaskej tlaltikpak” (SALMO 37:10, 11).
¿Tlen kijtosneki? Ayakmo yetoskej akinmej amo yolkualmej uan san yetoskej akinmej kitlakamatiskej toTajtsin Dios.
NOCHI TLALTIKPAK YETOS SE XOCHITLALI
“Kinchijchiuaskej kalmej uan ompa chantiskej, kitokaskej viñas uan kikuaskej itlakilo” (ISAÍAS 65:21, 22).
¿Tlen kijtosneki? Nochi tlaltikpak yetos se kuajkualtsin xochitlali. ToTajtsin Dios kichiuas tlen kineki nikan “tlaltikpak” ijkon ken tiktlajtlaniliaj (Mateo 6:10).