Tlamachtil pampa Akinmej Tetlapouiaj itech xiuitl 2015 techpaleuis pampa okachi kuali titlamachtiskej

¹ Salmista David okijkuilo: “Tlen nikijtoa itech nokamak uan tlen nimokuayejyekoa itech noyolo ma mitsyolpakti, oh Jehová, noTepexi uan akin nechMakixtia” (Sal. 19:14). Tejuan tiknekij totlajtol ma kiyolpakti Jehová, uan sapanoa tikpatioitaj titlajtoskej tlen melauak itech tlanechikol uan ijkuak titetlapouiaj. Itech Tlamachtil pampa Akinmej Tetlapouiaj, Jehová techmachtia pampa uelis titetlapouiskej. Nin tlamachtil mochiua sejse semana itech kanaj 111,000 tlanechikolmej itech nochi Tlaltikpak. Kinpaleuia nochtin tokniuan itech nochi Tlaltikpak pampa kuali kimatiskej ken tetlapouiskej kuali tlajtolmej, ika tlakaitalistli uan ken tlamachtiskej pampa ajsis itech inyolo tlaltikpaktlakamej (Hech. 19:8; Col. 4:6).

² Itech Tlamachtil pampa Akinmej Tetlapouiaj itech xiuitl 2015, timomachtiskej ninmej amatlajkuilolmej: Kuali tlajtolmej techmaka toTajtsin Dios, Uelis timochiuaskej tiiyolikniuan toTajtsin Dios, ¿Akinmej kichiuaj itlanekilis Jehová itech ninmej tonalmej? uan Xikaki toTajtsin Dios uan tiyoltos nochipa. Uan itech tlen okachi ipati tlen omotlajtolti itech Biblia mopatla kauitl tlen omotekitiltiaya uan noijki itech tlanojnotsalistli 1. Ma tikitakan tlen omopatlak uan ken mochiuas nin tlamachtil itech nin xiuitl.

³ Tlanojnotsalistli itech tlen okachi ipati tlen omotlajtolti itech Biblia. Nin kipanoltis se tokni san ika ome minutos uan kijtos se tlamantli tlen miak ipati itech tlen omotlajtolti itech non semana. Moneki kuali moyektlalis pampa kijtos itlaj tlen kipaleuis tlanechikol san itech kauitl tlen kipia. Satepan, kikauas chikuase minutos pampa ma tlanankilikan tokniuan ika treinta segundos, tlen omomachtijkej itech non semana. Moneki kuali timoyektlaliskej pampa tikijtoskej itlaj ipati san ika treinta segundos. Ijkon okachi kuali timomachtiskej, uan tikkauaskej oksekimej tokniuan noijki ma kijtokan tlen omomachtijkej.

⁴ Tlanojnotsalistli 1. Itech nin motlajtoltis Biblia san ika ome noso eyi minutos, uan motlajtoltis san kanaj se página itech Biblia. Akinmej kitlajtoltiskej Biblia moneki kiojpauiskej miak uelta, kuali ma kitenkixtikan uan kuali ma kitlajtoltikan, pampa kuali moajsikamatis. Nochtin akinmej tiktekichiuiliaj Jehová moneki kuali itlaj tiktlajtoltiskej, pampa nin miak ipati itech ken tikueyichiuaj. Sapanoa techyolpaktia ijkuak tikinkakij konemej kuali itlaj kitlajtoltiaj. Uan tikinmitaskej tetajmej motekipachoaj pampa kinpaleuiaj inkoneuan ika tlasojtlalistli pampa kuali itlaj ma kitlajtoltikan.

⁵ Tlanojnotsalistli 2. Nin kipanoltis se tokni siuatl san ika makuili minutos. Moneki kipanoltis tlamachtil tlen okimakakej, uan kipanoltis ika tlen melauak panoa kanin tetlapouia. Noijki uelis kintekitiltis okseki tlaxelolmej tlen kipaleuia itlamachtil. Akin kiyekana nin tlamachtil kijtos akin kipaleuis.

⁶ Tlanojnotsalistli 3. Nin kipanoltis se tokni tlakatl noso se tokni siuatl san ika makuili minutos. Ijkuak kipanoltis se tokni siuatl moneki kichiuas ijkon ken kijtoa tlanojnotsalistli 2. Ijkuak kipanoltis se tokni tlakatl ye kipanoltis iixpan tokniuan tlen monechikoskej. Ninmej tokniuan moneki tlamachtiskej itech tlen itoka tlamachtil uan kipejpenaskej seki tlaxelolmej.

⁷ Ken kinnojnotsaskej. Akin kiyekana nin tlamachtil kitekitiltis san ome minutos pampa kinyolchikauas uan kinnojnotsas ijkuak tlamis intlamachtil sejse tokniuan, uan kintlapouis itech tlen kijtoa amochtli Benefíciese de la Escuela del Ministerio Teocrático.

⁸ Akinmej kipanoltiskej se tlamachtil uelis kitaskej ken moneki kichiuaskej itech amochtli Benefíciese páginas 79 a 81. Ijkuak se tokni kipanoltis se tlamachtil, akin kiyekana tlamachtil kijkuilos itech iamoch tokni tlamachtil tlen okichi uan kitlajtlanis iselti kox okichi tlen kijtoa nin amochtli. Uelis kinnojnotsas uan kinyolchikauas tokniuan ijkuak tlamis nechikol noso okse tonal. Tlanojnotsalistli tlen kiseliskej tokniuan moneki kitaskej ken se tlapaleuilistli pampa okachi moskaltis intlaneltokilis (1 Tim. 4:15).

⁹ Tla se tokni tlen kipanoltia se tlamachtil sapanoa uejkaua, akin kiyekana tlamachtil noso akin kipaleuia uelis ichtaka kiluis ma tlami. Tokni san niman ma kitlami itlamachtil uan ma temo (xikita amochtli Benefíciese página 282, párrafo 4).

¹⁰ Nochtin akinmej kichiuaj tlen moneki itech innemilis, uelis panoskej itech Tlamachtil pampa Akinmej Tetlapouiaj (xikita amochtli Benefíciese página 282, párrafo 6). Itech nin tlamachtil tlen tikseliaj, kinmachtia itekipanojkauan Jehová pampa kuali ma tlajtokan uan ma tlamachtikan kuali tlajtolmej itech Tekiuajkayotl, ika tlakaitalistli uan tlasojtlalistli. Nochtin akinmej momachtiaj itech nin tlamachtil sapanoa kiyolpaktiaj Jehová pampa kiueyichiuaj ika nin tlamachtil (Sal. 148:12, 13; Is. 50:4).