Tlamachtilmej para Toteki akinmej tikchiuaj ken Cristo
5-11 DE AGOSTO
KEN TECHPALEUIA BIBLIA | 2 TIMOTEO 1-4
“Dios amo otechmák Iespíritu para matimaujtinemikah”
(2 Timoteo 1:7, NHY) Dios otechmakak iEspíritu Santo amo para ma tikinmiimakasikan in tlakaj, sino para ma tikpiakan ipoder, ma tikpiakan tlasojtlalistle iwan ma tikyejyekokan tlan kuale.
w09-S 15/5 pág. 15 párr. 9
Nochtin ma kitakan tikneki okachi tiktekichiuilis Jehová
9 Pablo okinekiaya kipaleuis Timoteo, ik non, okilui: “Dios otechmakak iEspíritu Santo amo para ma tikinmiimakasikan in tlakaj, sino para ma tikpiakan ipoder, ma tikpiakan tlasojtlalistle iwan ma tikyejyekokan tlan kuale” (2 Tim. 1:7, NHY). “Ma tikyejyekokan tlan kuale”, kijtosneki moneki tiyetoskej tiixtlamatkej. Non mitspaleuis xikixnamiki miak tlamantli maski sapanoa titlajyouis. Miakej telpokamej uan ichpokamej amo yolchikauakej, ik non, amo kimatij ken kixnamikiskej tlen kintlajyouiltia. Ualeua san kitaj televisión, tlauanaj, auilnemij, kintekitiltiaj drogas uan san kinekij moyolpaktiskej. Pero akinmej tikchiuaj ken Cristo Biblia techiluia: “Matikkawakah nochi tlan amokuali techyoltilanah itech nin tlaltíkpaktli. Nochipa matinemikah ika totlalnamikilis chipawak, matinemikah ika yolsewílistli iwa matikmopantikah Dios” (Tito 2:12).
(2 Timoteo 1:8) Yika, amo xipinawa tiktetlapowis itlajtol Toteko Jesús, nion xipinawa tla nitsaktok. Yej ika iweletilis n Totajtsi Dios xikxiko n tlaijyowílistli por tiktetlapowia n kualitlájtoli.
w03-S 1/3 pág. 9 párr. 7
Ma tiyetokan tiyolchikauakej uan amo ma timomojtikan
7 Ijkuak Pablo okitlajkuilili Timoteo, okilui: “Dios amo otechmák Iespíritu para matimaujtinemikah, yej para matikpiakah weletílistli [...]. Yika, amo xipinawa tiktetlapowis itlajtol Toteko Jesús” (2 Timoteo 1:7, 8; Marcos 8:38). Tlen Pablo okijto, techpaleuia ma timotlajtlanikan: “¿Nipinaua nikijtos niiTlaixpantijka Jehová? ¿Nikinmiluia akinmej inmiuan nitekipanoa niiTlaixpantijka Jehová uan tlen inmiuan nimomachtia noso amo nikneki ma kimatikan? ¿Niyolpaki ijkuak oksekimej kitaj nimouika iuan Jehová noso nipinaua?”. Tla ikaj momojtia tetlapouis noso momojtia porque amo nochtin kiseliskej, moneki kilnamikis Jehová okilui Josué amo ma momojti uan ma yeto yolchikauak. Okachi ipati ken techita Jehová uan Jesucristo uan amo tlen kijtoaj akinmej inmiuan timomachtiaj noso akinmej inmiuan titekipanoaj (Gálatas 1:10).
Ma tiktemokan ken techpaleuia Biblia
(2 Timoteo 2:3, 4) Ijkó kiné, te xikxiko nochi tlaijyowílistli, kemi se kuali soldado de Cristo Jesús. 4 Nion se soldado weleti mokalakia itech ok se tekitl, porke sa mochixtok kichiwas tlan kinawatis akin kiyakana.
Ma tiktemokan tlamantli tlen miak ipati
13 Timoteo noijki okiteititi okipiaya chikauak itlaneltokilis. Tlatitlanil Pablo okilui Timoteo okatka “kemi se kuali soldado de Cristo Jesús”. Uan satepan noijki okilui: “Nion se soldado weleti mokalakia itech ok se tekitl, porke sa mochixtok kichiwas tlan kinawatis akin kiyakana” (2 Tim. 2:3, 4). Axkan akinmej kichiuaj ken Cristo mochijchikauaj moyekanaskej ika nin principios. Uan katej kanaj se millón akinmej okachi kitekichiuiliaj Jehová. Uan mochijchikauaj amo kipiaskej tlamantli tlen onka itech Tlaltikpak, yejuan kilnamiki “akin kitlaneui tomin mochiua itlakeual akin kitetlanetia” (Prov. 22:7). Satanás kineki ma timotonalpolokan uan ma tiktemokan tlen onka itech Tlaltikpak. Sekimej kitlaneuij miak tomin para kichijchiuaskej noso para kitlaxtlauaskej se kali, para kitlaxtlauaskej se carro, para momachtiskej noso para ika monamiktiskej. Tla amo kuali tikpejpenaskej tlen tikchiuaskej uelis satepan tikteuikiliskej miak tomin. Tla kuali timokuayejyekoskej tlen tikchiuaskej, tikpiaskej san tlen ika timopanoltiskej uan amo tikteuikiliskej miak tomin. Ijkon tiktekichiuiliskej toTajtsin Dios uan amo tlen onka itech Tlaltikpak (1 Tim. 6:10).
(2 Timoteo 2:23) Amo xikinkaki tlájtolteh non amitla impati iwa tekuatlapololtia, porke ya tikmatok sanwel ika se mokualania.
w14-S 15/7 pág. 14 párr. 10
Itekipanojkauan Jehová kixtopeuaj tlen amo melauak
10 Axkan amo okachi tikinmajsij akinmej tlamachtiaj tlen amo melauak itech tlanechikol. Pero amo ma tikinkakikan ijkuak sekimej kinekiskej techititiskej tlen kixnamiki iTlajtol toTajtsin Dios. Amo kuali inmiuan timokualaniskej nion ijkuak tikinmajsij itech Internet noso itech okseki tlamantli. Amo inmiuan ma timotlapouikan maski tiknekiskiaj tikinpaleuiskej porque tikixnamikiskej tlen kijtoa toTajtsin Dios. Akinmej tiktekichiuiliaj Jehová, tikixtopeuaj nochi tlen tlamachtiaj akinmej kixnamikij iTlajtol.
12-18 DE AGOSTO
KEN TECHPALEUIA BIBLIA | TITO 1-FILEMÓN
“¿Ken kintlaliaj tlayekankej?”
(Tito 1:5-9) Ne onimitskajte kan isla de Creta para xikyakatlami n tekitl non ayakmó oniwéletki onikyakatlami, iwa para xikintlali tetajmeh non matlayakantokah kan moololoah n tlaneltokakeh, ijkó kemi onimitsnawati xikchiwa. 6 Se akin kinyakanas n tokniwah moneki mayeknemi ika iyolo chipawak ijkó amaka makitlajtlakolti. Amo makikajkayawa isiwa, iwa ipilwah makineltokakah Cristo Jesús para amaka makinteili kox amo tetlakitakeh noso teixnamikeh. 7 Porke, se akin okitekitlalijkeh makinyakana n tokniwah, imak kipixtok tlan iaxka Dios. Yika nochipa mayeknemi para amaka makitlajtlakolti. Matetlakita, amo mayeto satlawel kuejsi. Amo matlawantinemi nion mamokualanijtinemi, nion makineki tomi non amo chipawak. 8 Yej moneki mayeto se tlakatl non ika pakílistli makinseli akimeh kontlajpaloah icha, makichiwa nochipa tlan kuali, makipia kuali itlalnamikilis, mayeto yolchipawak, mamotemakti inawak Dios, iwa makimati kenomi moyeknawatis. 9 Nochipa makitemachti tlan milák kijtoa n kualitlájtoli non okimachtijkeh, para weletis kinyolchikawas oksikimeh ika kuali tlamáchtili, iwa makimati kenomi kinnankilis akimeh kitlajtolkokopah.
San sekan titekitij ken kijtoaj iTlajtol toTajtsin Dios
12 Amo kipia miak xiuitl, Cuerpo Gobernante okipatlak ken kintlaliaj tlayekankej uan siervos ministeriales itech tlanechikol. Revista Akin Tetlapouijtok okiyekijto cuerpo gobernante itech achto siglo okinkauili tlayekankej tlen otetlajpaloayaj ma kintlalikan tlayekankej uan siervos ministeriales (xikita tlamachtil “Preguntas de los lectores” itech La Atalaya [ika náhuatl del centro Akin Tetlapouijtok] 15 de noviembre 2014). Ik non, itech metstli septiembre, xiuitl 2014, tlayekankej itech circuito opejkej kintlaliaj tlayekankej. Ijkuak tlayekankej kijtoaj se tokni uelis yetos tlayekanki noso siervo ministerial, tlayekanki itech circuito kixmati tokni uan ikalchanejkauan. Ik non, iuan tetlapouia (1 Timoteo 3:4, 5). Satepan, tlayekanki itech circuito motlapouia iuan tlayekankej. San sekan oksepa momachtiaj tlaxelolmej kanin kijtoaj tlen moneki kichiuaskej akinmej kinekij yetoskej tlayekankej uan siervos ministeriales (1 Timoteo 3:1-10, 12, 13; 1 Pedro 5:1-3).
Ma tiktemokan ken techpaleuia Biblia
(Tito 1:12) Se profeta de ompa Creta, okijto: “N tlakah de Creta xolópijteh, toxkomeh, tlatsijkeh, iwa sa kemi yolkameh non tekuani.”
w89-S 15/5 pág. 31 párr. 5
Sekimej techtlajtlaniaj
Ijkuak Pablo ijkon okijkuilo, amo okinekiaya kinuijuikaltis nion kinchikoitas akinmej ochantiayaj Creta maski sekimej ijkon okichiuayaj. Non tikmatij porque Pablo okimatiaya miakej tokniuan tlen ompa ochantiayaj okipiayaj kuali inyelis uan toTajtsin Dios okinseli uan okinpejpenki ika iespíritu santo (Hechos 2:5, 11, 33). Okatkaj miakej tokniuan, ik non, uelis mochiuaskiaj tlanechikolmej itech miakej altepemej. Maski nonmej tokniuan okipiayaj tlajtlakoli amo otlakajkayauayaj, amo sapanoa otlakuayaj, porque tla ijkon kichiuaskiaj toTajtsin Dios amo kinseliskia (Filipenses 3:18, 19; Apocalipsis 21:8). Ompa Creta xamo okatkaj miakej tlen okinekiayaj momachtiskej iTlajtol toTajtsin Dios uan omoyolkokoayaj porque miakej amo okipiayaj chipauak innemilis. Axkan itech miakej altepemej miakej noijki ijkon kinpanoa (Ezequiel 9:4; noijki xikita Hechos 13:48).
(Filemón 15, 16) Chamo Onésimo omitscholili kech tonati, iwa axa mawalmokopati mamokawa nochipa mowa, 16 pero axa ayakmó kemi motlanemak, yej kemi mokni non tiktlasojtla. Ne kuali niktlasojtla, pero te okachi xiktlasojtla, amo kemi se tlakatl de nin tlaltíkpaktli yej kemi se mokni non kineltoka n Toteko Jesús.
w08-S 15/10 pág. 31 párr. 5
Tlen okachi ipati omotlajtolti itech cartas a Tito, Filemón uan Hebreos
15, 16 ¿Tleka Pablo amo okilui Filemón ayakmo ma yeto Onésimo itlakeual? Pablo okinekiaya mochijchikauas kitematiltis iTekiuajkayo toTajtsin Dios uan tlamachtis “itlajtol Toteko Cristo Jesús”. Ik non, ye amo okinekiaya kiyektlalis tlen omonekiaya kichiuiliskej se tlakeuali (Hechos 28:31).
19-25 DE AGOSTO
KEN TECHPALEUIA BIBLIA | HEBREOS 1-3
“Ma tikchiuakan tlen kuali uan ma tikixtopeuakan tlen amo kuali”
(Hebreos 1:8) Ijkuak kitenewa Ikone kijtoa: [toTajtsin Dios motrono, TNM], nochipa yetos; Tejwatsi kuali tiyektlanawatia ken moneki.
w14-S 15/2 pág. 5 párr. 8
Ma tiktlakaitakan Cristo toueyi tekiua
8 Itech 1914 Jehová okitlali iKone ken ueyi Tekiua Mesiánico. Ye ‘yektlanawatia ken monekiʼ, ik non, kuali tlanauatijtos uan amo techikoitas. Non tikmatokej porque ‘toTajtsin Dios itronoʼ, non kijtosneki Jehová otlanauati ma yeto ueyi tekiua. Noijki itrono Jesús nochipa yetos. Tinochtin kuali timomachiliaj porque tiktekichiuiliaj Jehová uan tikkauiliaj ma technauati akin ye okipejpenki.
(Hebreos 1:9) Mitspaktia nochi tlan kuali iwa tikkokolia tlan amokuali. Yika Dios, Modios omitsmák okachi miak pakílistli ke n oksikimeh non inwah titekiti.
w14-S 15/2 pág. 4 párr. 7
¡Ma tiktlakaitakan toueyi tekiua Cristo!
7 (Xiktlajtolti Salmo 45:6, 7). Jesús nochi kichiua ika melajkayotl uan kikokolia tlen uelis kisokiotis itoka iTajtsin. Ik non, Jehová okipejpenki ken ueyi Tekiua Mesiánico. Jehová okimakak “okachi miak pakílistli” uan amo ken ‘oksikimeh non inwah tekitiʼ non kijtosneki ikalchanejkauan David tlen noijki otlanauatijkej Judá. ¿Ken okimakak okachi miak pakilistli? Porque Jehová okitlali ma yeto ueyi tekiua uan ueyi teopixki (Sal. 2:2; Heb. 5:5, 6). Noijki toTajtsin Dios amo okipejpenki Jesús ika aceite, okipejpenki ika espíritu santo uan itekiuajkayo kajki iluikak.
Ma tiktemokan ken techpaleuia Biblia
(Hebreos 1:3) Ikone Ye itlawiltsotlanilis n Dios, iwa inewia otechnextiliko Akin Dios, iwa ika itlajtol weletini kichikajtok nochi tlan onka. Iwa satepa ijkuak yotechchipa de totlajtlakolwah, omotlali ik iyekma n Totajtsi Dios nepa kan ilwikak.
it-1-S pág. 1211
“Kixnextia”
¿Jesús nochipa okinexti ken okipiaya iyelis Jehová?
Itlayekankone toTajtsin Dios ouala nikan tlaltikpak uan omotokayoti Jesús, ye okiteititi ken okipiaya iyelis iTajtsin (2 Cor. 4:4). ToTajtsin Dios okilui iKone kichijchiuaskiaj tlakatl ken yejuan. Ik non, tikmatij toTajtsin Dios okichijchi Jesús ken ye (Gén. 1:26; Juan 1:1-3; Col. 1:15, 16, TNM). Ijkuak okatka nikan tlaltikpak, okatka se tlakatl ken tejuan pero amo okipiaya tlajtlakoli. Ik non, ye okachi kuali okinexti ken okipiaya iyelis iTajtsin. Satepan okijto: “Akin yonechitak kijtosneki yokitak Notajtsi” (Juan 14:9; 5:17, 19, 30, 36; 8:28, 38, 42). Ijkuak Jehová okiyoliti Jesús ken se espíritu uan okitlali ma tlanauati “itech ilwikak iwa itech tlaltíkpaktli”, Jesús okachi kuali okinexti ken okipiaya iyelis iTajtsin (1 Ped. 3:18; Mat. 28:18). Noijki ijkuak omokopki iluikak toTajtsin Dios “okiweyijkatlali” uan ijkon okachi kuali okinexti ken oueyititoka iTajtsin (Filip. 2:9; Heb. 2:9). Axkan ye okachi kinextia ken kipia iyelis Jehová (Heb. 1:2-4).
(Hebreos 1:10-12) Noiwa kijtoa: Tejwatsi Toteko [...] keman ayamitla okatka, Tejwatsi otikchijchi n tlaltíkpaktli, iwa ika momawah otikchijchi n ilwikak. 11 N tlaltíkpaktli iwa ilwikak pojpoliwiskeh, pero Tejwatsi nochipa tiyetos. Nochi tlan onka wewejtis kemi wewejti n tlakemitl. 12 Tikinkuekuelpachos kemi se tlakemitl, tikimpatlas kemi aka kipatla itlake. Pero Tejwatsi amo kema timopatla, iwa monemilis amo keman tlamis.
it-1-S pág. 478 párr. 2
Iluikak
Salmo 102:25 uan 26 kijtoa Jehová otlachijchi pero ijkuak tlatitlanil Pablo okijto tlen ompa ijkuilitok, okijto Jesucristo otlachijchi. Ijkon okijkuilo porque toTajtsin Dios okitekitilti itlayekankone ma kichijchiua semanauak. Noijki Pablo okijto Jesús yokatka achto kichijchiuaskiaj nochi tlen onka uan toTajtsin Dios uelis ‘kikuekuelpachosʼ nochi tlen onka “kemi se tlakemitl” (Heb. 1:1, 2, 8, 10-12).
26 DE AGOSTO-1 DE SEPTIEMBRE
KEN TECHPALEUIA BIBLIA | HEBREOS 4-6
“Matimochijchikawakah iwa matikalakikah kan Dios mosewia”
(Hebreos 4:1) Ijkó kiné, matimotlachilikah, axa ken ok tikpixtokeh tlan Dios otechsentlalili, amo kichiwa aka mokawas kala iwa amo kalakis itech imosewilis Dios.
(Hebreos 4:4) Itech tiotlajkuíloli ijkuilitok tlan Dios okichi itech chikome tonati: Dios omosewi ipan chikomeh tonati ijkuak otlanki otekitik.
w11-S 15/7 pág. 24 párrs. 3-5
¿Tlen kijtosneki toTajtsin Dios moseuijtok?
3 Ome tlamantli kiteititia itech achto siglo ok omoseuijtoka toTajtsin Dios “ipan chikomeh tonati”. Achto, Jesús okijto se tlamantli ijkuak sekimej okijtojkej okichiuaya sábado tlen amo omonekiaya uan non techpaleuia ma tikajsikamatikan toTajtsin Dios ok omoseuijtoka. Sekimej okijtojkej Jesús otekipanoaya porque otlapajtiaya sábado uan amo okitlakamatiaya Tlanauatil tlen okijkuilo Moisés. Ma tikitakan ken okinnankili: “Notajtsi [hasta axkan, TNM] tekiti, yika Ne noiwa nitekiti” (Juan 5:16, 17). Jesús okijto ok otekipanojtoka iTajtsin uan ijkon omopaleui. Yetoskia ken okijto: “NoTajtsin uan ne san se tekitl tikchiuaj, ye tekipanoa maski nin sábado sapanoa miak xiuitl youejka, ik non, amo tlajtlakoli tla ne noijki nitekipanos sábado”. Non techpaleuia ma tikajsikamatikan. Tlen okijto Jesús kiteititia ok okatkaj itech isábado toTajtsin Dios uan ok omoseuijtoka, kijtosneki ayakmo itlaj okichijchijtoka nikan tlaltikpak.
4 Noijki techpaleuia ma tikajsikamatikan non tlamantli tlen okijto tlatitlanil Pablo. Ijkuak ye kijtoskia tlen ijkuilitok itech Génesis 2:2, achto okijto: “Tejwah, akimeh otikneltokakeh non kuali tlájtoli, tikalakiskeh itech [iseuilis] Dios” (Heb. 4:3, 4, 6, 9). Tlen okijkuilo kiteititia ijkuakon ayamo otlamiaya “chikomeh tonati”. Ik non, ¿hasta keman tlamiskia isábado toTajtsin Dios?
5 Tla tiknekij tikmatiskej keman tlami non tonal moneki tikajsikamatiskej tleka toTajtsin Dios okitlali. Génesis 2:3 kijtoa Jehová okixelo tonal chikome para itlaj miak ipati kichiuas nikan tlaltikpak. ¿Tlen okinekiaya kichiuas? Okinekiaya nochtin akinmej nikan chantiskiaj ma kitlakamatikan uan ma kimaluikan tlaltikpak uan yolkamej (Gén. 1:28). Ik non, toTajtsin Dios uan iKone Jesucristo, akin tlanauatia “itech sábado”, hasta axkan tekipanojtokej (Mat. 12:8). ToTajtsin Dios ok moseuijtos hasta ijkuak mochiuas tlen kineki nikan tlaltikpak. ¿Keman mochiuas tlen kineki? Ijkuak Jesús tlamis tlanauatis mil xiuitl.
(Hebreos 4:6) Pero ok poliwi oksikimeh makalakikah kan Dios yotlayektlali para se mosewis, iwa akimeh achto okikakeh n kualitlájtoli non temakixtia amo okalakeh porke amo okitlakitakeh.
w11-S 15/7 pág. 25 párr. 6
¿Tlen kijtosneki toTajtsin Dios moseuijtok?
6 Jehová okiyekilui Adán uan Eva tlen okinekiaya kichiuas pero yejuan amo okipaleuijkej. Yiuejkika sapanoa miakej yokichijkej ken Adán uan Eva. Noijki israelitas amo okipaleuijkej toTajtsin Dios. Satepan tlatitlanil Pablo noijki okinnejmachti tokniuan ijkuak okinmilui: “Matimochijchikawakah iwa matikalakikah kan Dios mosewia, amo kichiwa aka de nomejwah kichiwas kemi nekateh non amo otetlakitakeh” (Heb. 4:11). Tlen okijto Pablo kijtosneki akinmej amo tetlakamatij amo ‘kalakiskejʼ kanin toTajtsin “Dios mosewia”. Tlen okijkuilo noijki technejmachtia, ¿tlen techpanoskia tla amo tikchiuaskej tlen toTajtsin Dios kineki? Xamo okachi oui ‘tikalakiskejʼ kanin toTajtsin “Dios mosewia”. Ik non, moneki kuali timomachtiskej. Achto ma tikitakan tlen okichijkej israelitas uan tleka amo ‘okalakejʼ kanin toTajtsin “Dios mosewia”.
(Hebreos 4:9-11) Pero, tejwah itlaneltokawah n Dios, ok tikchiah neka tonati ijkuak weletis timosewiskeh iwan Dios. 10 Porke akin kalaki kan Dios mosewia, mosewia de nochi iteki ijkó kemi Dios omosewi ijkuak okitlami iteki. 11 Yika, tejwah matimochijchikawakah iwa matikalakikah kan Dios mosewia, amo kichiwa aka de nomejwah kichiwas kemi nekateh non amo otetlakitakeh.
w11-S 15/7 pág. 28 párrs. 16, 17
¿Tlen kijtosneki toTajtsin Dios moseuijtok?
16 Axkan ayakmo ikaj kijtoskia tla tiknekij timomakixtiskej moneki tikchiuaskej seki tlamantli tlen kijtoa Tlanauatil tlen okijkuilo Moisés. Noijki ijkuak Pablo okintlajkuilili tokniuan ompa Éfeso okinmilui: “Yika por itlasojtlalis Dios, nomejwah ononmomakixtijkeh por ononkinetokakeh, amo nomotech kisa, yej porke Dios onomechtliokoli. Amo onomechmaktilijkeh n temakixtílistli por ononkichijkeh tlan kuali, para amaka mamoweyili” (Efes. 2:8, 9). Ik non, ¿tlen moneki tikchiuaskej para ‘tikalakiskejʼ kanin toTajtsin “Dios mosewia”? Ma tikilnamikikan toTajtsin Dios okixelo tonal chikome (ijkuak moseuiskia) para kichiuaskia tlen kineki nikan tlaltikpak. Ik non, tla tiknekij ‘tikalakiskejʼ kanin toTajtsin “Dios mosewia” noso tiknekij titlapaleuiskej, moneki tiktlakamatiskej uan tikchiuaskej tlen ialtepe techiluis para ma mochiua tlen ye kineki.
17 Nochipa ma tikpatioitakan tlen techiluia ika Biblia tlakeuali yolmelajki uan ixtlamatki uan amo san ma tikchiuakan ken tejuan timokuayejyekoaj. Tla ijkon tikchiuaskiaj tikixnamikiskej tlen toTajtsin Dios kineki kichiuas uan ayakmo iuan timouikaskej. ¿Tlen uelis kichiuas ayakmo ma tiktlakamatikan toTajtsin Dios? Itech okse tlamachtil tikitaskej tlen uelis kichiuas ayakmo ma tiktlakamatikan uan noijki tikitaskej tleka tlen tikpejpenaj tikchiuaskej kiteititia kox ‘yotikalakejʼ kanin toTajtsin “Dios mosewia”.
Ma tiktemokan ken techpaleuia Biblia
(Hebreos 4:12) Porke itlajtol Dios yolitok iwa kipia weletílistli. Nin tlájtoli okachi yakawitstik ke se espada non ojka tlateki, keman kalaki tlaxelojti ijtik toyolo iwa toespíritu, iwa techajsikamatiltia tlan kuali iwa tlan amo kuali.
Sekimej techtlajtlaniaj
¿Tlen kijtosneki ijkuak Hebreos 4:12 kijtoa “itlajtol Dios yolitok iwa kipia weletílistli”?
▪ Tlen ijkuilitok achto itech Hebreos 4:12 techititia “itlajtol Dios”, itech tlen otlajto Pablo, kijtosneki tlen toTajtsin Dios okijto itech itlanekilis, tlen ijkuilitok itech Biblia.
Itech toamatlajkuiloluan miak uelta tiktekitiltiaj Hebreos 4:12 pampa tikteititiskej Biblia kinpatilia innemilis tlaltikpaktlakamej. Uan non melauak. Pero noijki moneki ma tikajsikamatikan itech tlen otlapojtoka Pablo ijkuak okijkuilo nin tlaxelol. Ye okinmilui tokniuan hebreos ma kipaleuikan toTajtsin Dios ma mochiua itlanekilis. Miak tlamantli itech itlanekilis moijtoa itech iTlajtol toTajtsin Dios. Ijkuakon, Pablo okitekitilti inneskayo israelitas akin toTajtsin Dios okinmakixti itech Egipto. Yejuan okichiayaj chantiskej itech “tlali kanin onka leche uan neujtli” tlen Jehová okinmilui. Ompa melauak uelis moseuiskiaj (Éxodo 3:8; Deuteronomio 12:9, 10).
Non tlen okinekiaya toTajtsin Dios. Pero israelitas amo otlaneltokakej itech Jehová uan amo okitlakamatkej, ik non, miakej amo okalakej itech imoseuilis toTajtsin Dios (Números 14:30; Josué 14:6-10). Pero Pablo okijto ok uelis se kalakis “itech imosewilis Dios” (Hebreos 3:16-19; 4:1). Kuali tikmatij tlen okinmilui kinmakaskia poui itech itlanekilis toTajtsin Dios. Ijkon ken tokniuan hebreos, noijki uelis tiktlajtoltiskej itech itlanekilis iuan tikpaleuiskej. Pampa kiteititis tlen Jehová okijto ijkuilitok itech iTlajtol, otlajto itech Génesis 2:2 uan Salmo 95:11.
Techyolpaktia tikmatiskej ok uelis tikalakiskej “itech imosewilis Dios”. Tikneltokaj melauak uelis tikalakiskej “itech imosewilis Dios” ijkon ken kijtoa Biblia. ¿Ken uelis tikchiuaskej? Amo timochijchikauaj tiktlakamatiskej Tlanauatil tlen okijkuilo Moisés nion tikchiuaskej tlen kuali san pampa ma techseli toTajtsin Dios. Okachi kuali, ika pakilistli tikpaleuiaj toTajtsin Dios ma mochiua itlanekilis uan nochipa ijkon tikchiuaskej pampa itech titlaneltokaj. Miakej itech nochi Tlaltikpak yopejkej momachtiaj Biblia uan momachtiaj tlen toTajtsin Dios yokitematilti itech itlanekilis. Nin yokichi miakej ma kipatlakan innemilis, ma tlaneltokakan itech Jehová uan ma moapolaktikan. Nochi nin kiteititia “itlajtol Dios yolitok iwa kipia weletílistli”. Ken toTajtsin Dios yokitematilti itlanekilis itech Biblia, non yotechpaleui itech tonemilis uan ok techpaleuijtos.
(Hebreos 6:17, 18) Yika, Dios okinek kiteititis milák kichiwas tlan okijto, okitlajtolsentlali kitemakaskia tlan yokisentlalijka iwa amitla kipatlaskia. 18 Ijkó kiné, onka ome tlájtoli non amo weletis mopatlas. Ika no moajsikamati Dios amo weletis techkajkayawas. Noni techyolsewia, ken tejwah tiknekih Dios matechmokuitlawi, iwa tikneltokah Ye techmakas tlan yotechkakitijka.
it-1-S pág. 851 párr. 1
Chialistli
ToTajtsin Dios ‘okinpéjpenki para mayetokahʼ iluikak akinmej kichiaj yolilistli tlen amo keman tlamis (Heb. 3:1), non melauak mochiuas uan uelis tikneltokaskej. Ome tlamantli tlen amo keman mopatla techpaleuia ma tikneltokakan ijkon panos: ToTajtsin Dios nochipa kichiua tlen kijtoa uan tlen “okitlajtolsentlali”. Noijki tikmatokej ijkon panos porque Cristo kajki iluikak uan amo keman ixpoliuis, ik non, Biblia kijtoa: “Tikchiah ika totlaneltokalis, kemi se tépostli ankla non kitsoponia ijtik atl [...], non opanok itsalko n kortina [ijkon ken Tonal ijkuak okintlapojpoluiayaj judíos uan ueyi teopixki okalakiaya Santísimo] itech [iteokal, TNM] n Dios itech ilwikak iwa okalak itech lojar santo non chipaktik. Jesús ijkó okichi iwa otechtlapoli n lojar inawak Dios, porke Cristo Ye n Weyi Tiópixki semijkak kemi okatka Melquisedec” (Heb. 6:17-20).
© 2019 Watch Tower Bible and Tract Society of Pennsylvanias