TIKCHIUAJ KEN CRISTO

¿Ken uelis tikchiuaskej ken tokniuan tlen yikipiaj miak xiuitl?

Kanin timonechikouaj xamo katej tokniuan tlen yikipiaj miak xiuitl kitekichiuilijtokej Jehová. Moneki titlaneltokaskej ijkon ken yejuan kichiuaj. Ma tikinmiluikan ma techtlapouikan ken okatka ialtepe Jehová uan ken okinpaleui ma kixikokan ouijkayotl. Ijkuak timomachtiaj iuan tofamilia uelis tikyoleuaskej se tokni uan ma tikiluikan ma techilui ken yokitekichiuili Jehová.

Tla tejuatsin yimiak xiuitl tiktekichiuilijtok Jehová, xikinmilui telpokamej uan ichpokamej tlen yomitspanok. Jacob uan José okinmiluijkej inmixuiuan ken Jehová okinpaleui (Gén. 48:21, 22; 50:24, 25). Satepan Jehová okinmilui tetajmej ma kinmiluikan inkoneuan tlen ye okichi (Deut. 4:9, 10; Sal. 78:4-7). Axkan tetajmej uan oksekimej tokniuan, uelis kinmiluiskej telpokamej iuan ichpokamej tlen yokichi Jehová ika ialtepe.

IJKUAK YOTIKITAK VIDEO SAN SEKAN OKITEKICHIUILIJKEJ JEHOVÁ MASKI OKINTLAJYOUILTIJKEJ, XIKINNANKILI NINMEJ TLAJTLANILMEJ:

Tokniuan tlen otlapaleuiayaj Betel ompa Austria, ¿ken okinpaleuijkej tokniuan tlen ochantiayaj itech okseki altepemej ijkuak ayakmo okinkauiliayaj ma tetlapouikan?
¿Tlen okichijkej tokniuan para kipiaskiaj chikauak intlaneltokilis?
¿Tleka miakej tokniuan omoxelojkej itech ialtepe Jehová uan tlen okinpaleui oksepa ma mokopakan?
¿Ken mitspaleuia nin video okachi xikneltoka Jehová?

Nikan motaj seki fotos tlen katej itech video San sekan okitekichiuilijkej Jehová maski okintlajyouiltijkej: 1. Se mapa kiteititia altepemej tlen katej Europa del Este, kanin okintlajyouiltijkej tokniuan. 2. Se copiadora. 3. Tokniuan tlen chantij Rumania monapalouaj. — Tokniuan tlen yikipiaj miak xiuitl uelis techmachtiskej miak tlamantli tlen techpaleuis okachi ma titlaneltokakan.