Tlamachtilmej para Toteki akinmej tikchiuaj ken Cristo
© 2025 Watch Tower Bible and Tract Society of Pennsylvania
5-11 DE MAYO
KEN TECHPALEUIA BIBLIA PROVERBIOS 12
Kiteochiuaskej akin chikauak tekipanoua
Itlaj tlen okachi ipati amo ken diamantes
Itech ninmej tonalmej, miakej itekipanojkauan toTajtsin Dios oui kitlanij tomin pampa kipiaskej tlen ika mopanoltiskej. Pero amo tlachtekij nion tlakajkayauaj, okachi kuali, chikauak tekitij. Ijkon kiteititiaj okachi ipati kipiaskej inyelis ken toTajtsin Dios uan amo miak tlamantli (Proverbios 12:24; Efesios 4:28).
¿Ken uelis tiyolpakiskej ijkuak chikauak titekitij?
Nin tlajtlanilistli miak ipati, pampa itlanankilis kichiuas ma tiyolpakikan itech toteki. Jesucristo okijto: “Okachi makipia pakílistli n tlakatl non tlapalewia ika tlan kipia, iwa amo akin kipalewiah” (Hechos 20:35). Uan amo san akinmej tikintekichiuiliaj noso akinmej tikinnemakiltiaj itlaj mopaleuiaj ika totekij, noijki mopaleuiaj tokalchanejkauan uan noijki ueli tikpiaj tlen tiknekij.
Tokalchanejkauan. Ijkuak se tlakatl noso isiua mochijchikauaj pampa kinmakaskej ikalchanejkauan tlen moneki, kinpaleuiaj itech ome tlamantli. Achto, kinmakaj tlen okachi moneki: tlakuali, intlaken uan se kali; ijkon kitlakamatij itlanauatil toTajtsin Dios uan kinmakaj tlen kinekij inkalchanejkauan (1 Timoteo 5:8). Uan noijki kinmachtiaj ika inneskayo ken moneki chikauak tekitiskej. Shane kijtoa: “Notajtsin se kuali neskayotl itech tekitl: pampa amo tlachteki uan itech nochi inemilis tekiti, uan yiuejkika tekiti ken kuajxinki. Ye onechmachti chikauak ma nitekiti ika nomauan, uan ma nikchiua tlamantli tlen kinpaleuia tlaltikpaktlakamej”.
Akinmej amo itlaj kipiaj. Tlatitlanil Pablo okijto akinmej melauak kichiuaj ken Cristo omonekiaya “matekitikan ika inmawah para makipiakan tlan ika kimpalewisken akimeh kimpoloa” (Efesios 4:28). Tla timochijchikauaj pampa tikinpaleuiskej tokalchanejkauan uelis noijki tikinpaleuiskej akinmej amo itlaj kipiaj (Proverbios 3:27). Kema, tla chikauak titekitij uelis tiyolpakiskej ijkuak oksekimej tikinpaleuiaj.
Matiktemokan ken techpaleuia Biblia
ijwyp-S tlamachtil 95 párrs. 10, 11
¿Nikmati tlen nikchiuas ijkuak itlaj nechpanos?
● Kuali xikita tlen mitspanotok. Xikita tlen okachi oui tikixnamiki. Biblia kijtoua: “Xoxo akin san niman kiteititia kualani pero akin ixtlamatki tetlapojpoluia ijkuak kiuijuikaltiaj” (Proverbios 12:16). Amo xiktekauili mamitsyolkoko nochi tlen mitspanoua.
Joanne okijto: “Akinmej inuan onimomachtiaya san niman omoyolkokouayaj maski amitlaj okinpanouaya. Inyolikniuan noijki ijkon okijkuilouayaj itech redes sociales. Non okachi okinyolkokouaya uan ayakmo okimatiayaj tlen kichiuaskej”.
12-18 DE MAYO
KEN TECHPALEUIA BIBLIA PROVERBIOS 13
Amo mamitstlajtlachialti “intlauil akinmej amo yolkualmej”
it-2-S págs. 186, 187
Tlauili
Tlauili kineskayotia okseki tlamantli. Ijkuak ikaj nejnemi moneki motlauilis ika se tlauili. Proverbios ijkon kineskayotia ijkuak kijtoua tlen kipanoua akin yolkuali uan akin amo yolkuali: “Intlauil yolkualmej sapanoua petlani pero seuis intlauil akinmej amo yolkualmej” (Prov. 13:9). Itlauil akin yolkuali okachi petlani. Pero amo okachi tlauia intlauil akinmej amo yolkualmej maski mochijchikauaj miak. Noijki maski mochijchikauaskej kichiuaskej miak tlamantli, toTajtsin Dios kichiuas mayetokan kanin tlayoua uan ompa mokxitlanuiskej. Ijkon kipanos akin kiuijuikaltia ipapa uan imama (Prov. 20:20).
Akin seui itlauil kijtosneki amitlaj kiselis satepan. Okse proverbio kijtoua: “Akin amo yolkuali satepan ayakmo yoltos uan seuis intlauil akinmej amo yolkualmej” (Prov. 24:20).
w12-S 15/7 pág. 12 párr. 3
Matiktekichiuilikan Jehová porque ye techkauilia matikpejpenakan tlen tikchiuaskej
3 Satanás okikajkaya Adán, Eva uan miakej ángeles. Yejuan amo okikauilijkej makinyekana Jehová. Ikinon tejuan noijki uelis techkajkayauas. Satanás kineki matikneltokakan itlanauatiluan toTajtsin Dios sapanoua oui tikintlakamatiskej uan amo techpaleuiaj matipakikan (1 Juan 5:3). Titlajyouiskej tla ijkon timokuayejyekoskej. Matikitakan tleka ijkon tikijtouaj. Se tokni oauilnenki ijkuak okipiaya 24 xiuitl. Ye okijto: “Onimouikaya inuan akinmej amo yolkualmej. Ikinon onikchiuaya tlen yejuan okichiuayaj porque amo oniknekiaya nikinkualanis”. Xamo yotechpanok ijkon ken okipanok non tokni.
w04-S 15/7 pág. 31 párr. 6
“Akin ixtlamatki achto mokuayejyekoua tlen kichiuas”
Akin ixtlamatki uan yolkuali kiteochiuaskej porque achto mokuayejyekoua tlen kichiuas. Ikinon Salomón okijto: “Yolkuali tlakua uan ixui pero amitlaj kipia inmijti akinmej amo yolkualmej” (Proverbios 13:25). Jehová kimati tlen okachi techpaleuis. Ye kimati tlen moneki tikchiuaskej para kuali timouikaskej iuan tofamilia uan inuan oksekimej. Noijki kimati tlen techpaleuis ijkuak titetlapouiskej uan ijkuak techyektlaliskej. Ikinon kuali tiyetoskej tla tiixtlamatkej uan tikchiuaj tlen kijtoua iTlajtol.
Matiktemokan ken techpaleuia Biblia
“Cristo Ye n tlayákanki [...] itech nochi tlakatl”
13 ¿Tlen techmachtia? Tlakamej tlen kipiaj infamilia nochipa moneki kiteititiskej tetlasojtlaj. ¿Tleka ijkon moneki kichiuaskej? Apóstol Juan okijto: “Tla amo kitlasojtla se ikni [ifamilia] non [kita], kenomi weletis kitlasojtlas Dios non amo kita” (1 Juan 4:11, 20). Tlakamej tlen kinekij kichiuaskej ken Jehová uan Jesús kintlasojtlaj infamilia, kinpaleuiaj ma mouikakan iuan Jehová, kinpaleuiaj kuali ma momachilikan uan kinmakaj tlen ika mopanoltiskej (1 Tim. 5:8). Kinmachtiaj uan kinyektlaliaj inkoneuan. Kiueyichiuaskej Jehová tla nochipa kuali kipejpenaj tlen kichiuaskej uan moneki kitaskej tlen kipaleuis infamilia. Ma tikitakan ken uelis kichiuaskej ijkon ken Jehová uan Jesús.
19-25 DE MAYO
KEN TECHPALEUIA BIBLIA PROVERBIOS 14
Kuali ximokuayejyeko tlen tikchiuas ijkuak itlaj panos
Matikpatioitakan toyolilis
10 Ijkuak tlaxixini, ijkuak miakej mokokouaj noso ijkuak sekimej moteuiaj, uelis techpanos itlaj tlen amo kuali. Pero tla tekiuajkej techiluiaj matimokauakan tokalijtik noso tla techiluiaj san niman matikisakan uan tikintlakamatij amo okachi techpanos tlen amo kuali (Rom. 13:1, 5-7). Ijkuak panos seki tlamantli tlen amo kuali uelis tikmatiskej tlen tikchiuaskej tla tikintlakamatij tekiuajkej. Xamo techpaleuis tla tikololouaj tlakuali tlen amo san niman ijtlakaui, atl uan pajtli.
11 Ijkuak itech nochi tlaltikpak miakej mokokouaj, ¿tlen moneki tikchiuaskej? Moneki tikintlakamatiskej tekiuajkej, matimomajtekikan, amo matimotokikan kanin katej miakej, matikmotlalilikan cubrebocas uan matimokauakan tokalijtik. Tla ijkon tikchiuaj, tikteititiskej tikpatioitaj toyolilis.
12 Ijkuak panoua tlen amo kuali, toyolikniuan, akinmej tikinmixmatij, itech noticias noso internet, uelis techiluiskej tlen amo melauak. Amo san niman matikneltokakan tlen techiluiskej, okachi kuali matikinkakilikan tlen techiluiaj tekiuajkej uan tepajtijkej (xiktlajtolti Proverbios 14:15). Noijki moneki tikintlakamatiskej tokniuan tlen pouij itech Cuerpo Gobernante uan tokniuan tlen tlayekanaj Betel ijkuak techiluiskej ken timonechikoskej uan ken titetlapouiskej porque yejuan moyekanaj ika tlen kijtoua Biblia ijkuak itlaj kipejpenaj (Heb. 13:17). Ijkuak tikintlakamatij tokniuan akinmej techyekana, timomaluiaj uan tikinmaluiaj oksekimej, tikueyichiuaj itoka Jehová uan oksekimej amo techteneuaskej (1 Ped. 2:12).
Matiyetokan tiyolchikauakej ijkon ken Sadoc okatka yolchikauak
11 ¿Ken uelis tiyetoskej tiyolchikauakej ijkon ken Sadoc ijkuak techiluiskej matikinpaleuikan tokniuan maski uelis itlaj techpanos? Se, matikchiuakan tlen technauatiaj. Miak ipati matitetlakamatikan ijkuak itlaj panotos uan ijkon amo timoxexeloskej. Ikinon matikchiuakan tlen technauatiskej tokniuan tlen tlapaleuiaj Betel (Heb. 13:17). Tlayekankej moneki kitlajtoltiskej miak uelta amatl kanin kijtoua tlen kichiuaskej ijkuak tlaxixinis (1 Cor. 14:33, 40). Ome, matiyetokan tiyolchikauakej pero noijki matiyetokan tiixtlamatkej (Prov. 22:3). Kuali matikitakan tlen uelis techpanos uan matimomaluikan. Eyi, matikneltokakan Jehová. Ye kitekipachoua tlen techpanoua uan kineki kuali matiyetokan. Noijki techpaleuis amitlaj matechpano ijkuak tikinpaleuiskej tokniuan.
Matiktemokan ken techpaleuia Biblia
it-1-S pág. 423
Kuali timokuayejyekouaj
Akinmej kuali mokuayejyekouaj noijki uelis kinkokoliskej. Ikinon xamo non kijtosneki Proverbios 14:17: “Kikokoliaj akin kuali mokuayejyekoua tlen kichiuas”. Akinmej amo kuali mokuayejyekouaj kinkokoliaj akinmej kuali mokuayejyekouaj. Noijki ualeua kinkokoliaj akinmej kuali mokuayejyekouaj uan kitekichiuiliaj toTajtsin Dios. Jesús okijto: “Namechkokoliaj porque ne onamechpejpenki uan amo inuan nanpouij” (Juan 15:19). Tlen ijkuilitok itech Proverbios 14:17 noijki kijtosneki akinmej amo kuali mokuayejyekouaj. Non kijtosneki noijki kikokoliskej akin amo kuali mokuayejyekoua. Ikinon nin texto sekimej kitlajtolkopaj ijkin: “Kikokoliskej akin amo kuali mokuayejyekoua” (DK, Mod; noijki xikita BAS, BJ, MK uan okseki biblias).
26 DE MAYO-1 DE JUNIO
KEN TECHPALEUIA BIBLIA PROVERBIOS 15
Xikinpaleui oksekimej mayolpakikan
¿Tleka moneki kuali ma tikinselikan tokniuan?
17 Se precursora tlen okinkalotiaya akinmej oyajkej itech Tlamachtilmej para akinmej kichiuaj ken Cristo okijto: “Onimotekipachoaya porque amo kuali kajki nokalijtik uan seki tlamantli tlen nikpia amo yankuik. Pero onechyolseui isiua se tokni tlen otlamachtiaya itech nonmej tlamachtilmej. Onechilui ijkuak ye uan inamik okintlajpaloayaj tlanechikolmej, okachi oyolpakiayaj ijkuak okatkaj iuan tokniuan tlen okipiayaj chikauak intlaneltokilis maski amo okipiayaj miak tlamantli uan porque pero okachi okipatioitayaj kitekichiuiliskej Jehová. Non onechilnamikti tlen otechiluiaya nonantsin ijkuak otikatkaj titsikitsitsintin: ‘Okachi kuali tikkuaskej se plato kilitl kanin onka tlasojtlalistli’” (Prov. 15:17). Amo ma timotekipachokan, okachi kuali, ma tikinselikan tokniuan ijkuak techtlajpalokiuij.
w18.04 págs. 23, 24 párrs. 16-18
Axkan okachi moneki ma timoyolchikauakan
16 Tla amo okachi titlajtoaj, amo ma timokuayejyekokan amo uelis tikinyolchikauaskej tokniuan. Amo ma timotekipachokan porque amo oui tikinyolchikauaskej. Ma tiixuetskatokan ijkuak tikintlajpaloaj tokniuan. Tla yejuan amo ixuetskaj xamo itlaj kintekipachojtok noso moneki ikaj iuan motlapouiskej. Kuali momachiliskej tla tikinkakiskej (Sant. 1:19).
17 Ma tikitakan tlen okipanok se telpochtli itoka Henri. Sapanoa omoyolkokoaya porque sekimej ikalchanejkauan ayakmo okitekichiuiliayaj Jehová ken itajtsin akin okatka tlayekanki uan nochtin okitlakaitayaj. Se tlayekanki itech circuito okinekiaya kiyolchikauas Henri, ik non, okonitoj café uan okikak ijkuak opejki kitlapouia ken omomachiliaya. Henri okajsikamatki tla okinekiaya ma mokuepakan iuan Jehová, omonekiaya yetos yolmelajki ixpan Jehová. Noijki okipaleui tlen kijtoa Salmo 46, Sofonías 3:17 uan Marcos 10:29, 30.
18 ¿Tlen techmachtia tlen okipanok Marthe uan Henri? Tinochtin uelis titeyolchikauaskej ijkuak moneki. Ueyi tekiua Salomón okijkuilo: “Ijkuak moijtoa se tlajtoli ijkuak moneki, ¡melauak teyolchikaua!”. Noijki okijto: “Teyolpakti akin petlantokej ixtololouan uan se kuali tlajtoli teyolchikaua” (Prov. 15:23, 30). Tla tikitaj ikaj moyolkokoa, ¿ken tikyolchikauaskej? Ma tiktlajtoltilikan se revista Akin Tetlapouijtok noso tlen tikpiaj itech jw.org. Noijki Pablo okijkuilo: “Ximosepannonotsakah iwa ximosepanyekuikakah ika kuali ixtlamatílistli. Xiktlakuikilikah Dios ika nochi nomoyolo ika salmos iwa ika tlakuíkalteh non kiweyiliah, iwa ika tlakuíkalteh non tlatiochiwah” (Col. 3:16; Hech. 16:25). Tejuan noijki kuali timomachiliskej tla tiktlakuikiliskej Jehová ken okichi Pablo.
Matiktemokan ken techpaleuia Biblia
ijwbq-S tlamachtil 39 párr. 3
¿Mopajtiaj iTlaixpantijkauan Jehová?
2. ¿Moneki tikintlajtlaniskej oksekimej tepajtijkej ken timopajtiskej? Techpaleuis tla tikintlajtlaniskej oksekimej tepajtijkej. Noijki okachi tikmatiskej ken timopajtiskej tla sapanoua timokokouaj (Proverbios 15:22).
2-8 DE JUNIO
KEN TECHPALEUIA BIBLIA PROVERBIOS 16
Ximotlajtlani eyi tlamantli tlen mitspaleuis kuali xikpejpena tlen tikneki tikchiuas
w14-S 15/1 pág. 19 párrs. 11, 12
Kuali xikpejpena tlen tikchiuas
11 Tejuan tiyolpakij porque tiktekichiuiliaj toTajtsin Dios (Prov. 16:20). Pero Baruc tlen okatkaj isecretario Jeremías ayakmo oyolpakiaya ijkuak okitekichiuiliaya toTajtsin Dios. Ikinon Jehová okilui: “Te tiktemoua tlamantli tlen tikpatioita. Ayakmo xiktemo non tlamantli’. ‘Porque niktlajyouiltis nochi tlen yoltok’, [...] ‘uan melauak nimitsmakas moyolilis ken tlen tikmoaxkatis san kanin tias” (Jer. 45:3, 5). ¿Tlen timokuayejyekoua okachi kipaleuiskia mayolpaki Baruc? ¿Kitemoskia tlen ye okinekiaya kipias noso mochijchikauaskia kitekichiuilis toTajtsin Dios uan ijkon momakixtiskiaj ijkuak kipojpoloskiaj Jerusalén? (Sant. 1:12).
12 Se tokni itoka Ramiro yolpaki kitekichiuilis Jehová. Ye okijto: “Onineski itech tepeyo tlen itoka Andes uan ompa amo onka miak tlamantli. Nokni tlen okachi ueyi onechilui manimomachti universidad porque ye kitlaxtlauaskia. Non nechpaleuiskia maniktlani miak tomin. Ijkuakon yikin onimoapolaktijka uan se precursor yonechiluijka matitetlapouitij itech se altepetsintli. Ompa onitetlapouito uan noijki onimomachti ken nitetsonkaltekis. Opejki nitetsonkalteki uan ijkon onikpiaya tlen ika nimopanoltis. Miakej omotlasojkamatiayaj ijkuak otikinmachtiayaj. Satepan onitlapaleuito itech se tlanechikol kanin otlajtouayaj okse tlajtoli. Opanok majtlaktli xiuitl uan onikitak amo onka okse tlamantli tlen nechpaleuis okachi maniyolpaki. Okachi nipaki nikinpaleuis oksekimej makajsikamatikan iTlajtol toTajtsin Dios ika intlajtol”.
w13-S 15/9 pág. 17 párrs. 1-3
¿Yotikpatlakej tonemilis?
TIKCHIUAJ miak tlamantli tlen oksekimej kichiuaj noso tikchiuaj tlen otechititijkej ijkuak otimoskaltijkej. Timotlakentiaj ken techpaktia, techpaktia seki tlakuali uan tikteititiaj ken toyelis. Ijkon tikchiuaj porque tikinmitaj oksekimej ijkon kichiuaj noso ijkuak mopatla seki tlamantli.
2 Pero onka okseki tlamantli miak ipati. Matikitakan tleka ijkon tikijtouaj. Ijkuak timoskaltiaj techititiaj seki tlamantli tlen kuali uan okseki tlamantli moneki tikixtopeuaskej porque amo kuali. Pero miakej tlatlamantli mokuayejyekouaj. Ualeua tikchiuaj seki tlamantli porque totlalnamikilis amo techkuejsoua. Biblia kijtoua: “Akinmej amo judíos kichiuaj tlen kijtoua itlanauatil toTajtsin Dios maski amo kixmatij” (Rom. 2:14). Tla amo onka se tlanauatil tlen kijtoua tlen moneki tikchiuaskej, ¿kijtosneki uelis tikchiuaskej tlen otechmachtijkej ijkuak otimoskaltijkej noso tlen kichiuaj kanin tichantij?
3 Biblia kijtoua ome tlamantli miak ipati tlen kiteititia amo moneki ijkon matikchiuakan akinmej tiktekichiuiliaj toTajtsin Dios. Kijtoua onka se ojtli tlen tlakatl kita kuali pero non ojtli teuika itech mikilistli (Prov. 16:25). Tejuan titlajtlakolejkej ikinon amo uelis toselti timoyekanaskej porque timotlapololtiaj (Prov. 28:26; Jer. 10:23). Noijki Satanás “tlanauatia ipan tlaltikpak” uan ye kinmaka tlanauatilmej akinmej kinnauatia. Nin kijtosneki tlen yejuan kitaj kuali uan tlen amo kuali noso tlen okachi kipatioitaj (2 Cor. 4:4; 1 Juan 5:19). Moneki matikchiuakan tlen kijtoua Romanos 12:2 (xiktlajtolti) tla tiknekij matechteochiua toTajtsin Dios uan matechseli.
Matiktemokan ken techpaleuia Biblia
Ma tikinpatioitakan tokniuan tlen yikipiaj miak xiuitl
IJKUAK diamantes ayamo kinchipauaj amo petlanij nion motaj kualtsitsintin. Ik non, tla ikaj kinmitas amo kimatis kox diamantes. 2 Tokniuan tlen yikipiaj miak xiuitl, se kualtsin tetliokolil yetoskia ken nonmej diamantes. Biblia kijtoua akinmej yokuaistayakej motaj kualtsitsintin (xiktlajtolti Proverbios 16:31; 20:29). Pero xamo oui tikinpatioitaskej. Telpokamej uan ichpokamej kinpaleuis miak tla kajsikamatij moneki kinpatioitaskej nonmej tokniuan. Itech nin tlamachtil tikinnankiliskej eyi tlajtlanilmej. ¿Tleka Jehová kinmita se tetliokolil tokniuan tlen yikipiaj miak xiuitl? ¿Tleka kinpatioitaj itech ialtepe Jehová? ¿Ken uelis noijki ijkon tikchiuaskej?
9-15 DE JUNIO
KEN TECHPALEUIA BIBLIA PROVERBIOS 17
¿Ken uelis timouikas iuan mosiua noso monamik?
g-S 9/14 pág. 11 párr. 2
¿Tlen mitspaleuis amo san xikilnamikto tlen omitstoktijkej?
Xikita kuali tlen tikchiua. Biblia kijtoua miakej san niman kualanij (Proverbios 29:22). ¿Ijkon mitspanoua? Ximotlajtlani: “¿San nikilnamiktok tlen onechtoktijkej? ¿San niman nikualani? ¿Nikuelita nikueyitilis tlen onechtoktijkej?”. Biblia technejmachtia ayakmo timouikaskej inuan toyolikniuan tla ijkon tikchiuaskej (Proverbios 17:9; Eclesiastés 7:9). Noijki akinmej yomonamiktijkej uelis ijkon kinpanos. Tla san tikilnamiktok tlen mitstoktiaj, ximochijchikaua xikteititi tikmati timochias (principio bíblico: 1 Pedro 4:8).
w08-S 1/5 pág. 11 párr. 1, 2
¿Tlen mitspaleuis tla timokualania iuan mosiua noso monamik?
1. Xikita keman uelis nanmotlapouiskej. Biblia kijtoua: “Nochi moneki tikitaskej keman tikchiuaskej, [...] keman amitlaj se kijtos uan keman se tlajtos” (Eclesiastés 3:1, 7). Kanin peua nin tlamachtil otikitakej se tlakatl uan isiua omokualanijkej. Nin techititia tikijtouaj miak tlamantli ijkuak ikaj iuan timokualaniaj. Tla ijkon techpanoua amo san niman matikualanikan uan amo san niman itlaj matikijtokan. Tla nankitaj peua nanmokualaniaj, xikilui monamik noso mosiua satepan nanmotlapouiskej. Kuali nanyetoskej tla nankichiuaskej tlen kijtoua nin principio bíblico: “Ijkuak ikaj peua kualani yetoskia ken ijkuak kikajkauaj atl ikinon xio uan ijkon amikaj iuan timokualanis” (Proverbios 17:14).
Biblia kijtoua matikitakan keman titlajtoskej. Tla amo timotlapouiskej iuan akin otimokualanijkej okachi timoouijtiliskej uan yetoskia ken tiktokaj amo kuali xiuitl tlen san niman moskaltia. Amo san ijkon matikkauakan tlen techpanotok. Tla yonanmokualanijkej, xikyekilui mosiua noso monamik satepan nanmotlapouiskej. Non namechpaleuis xikchiuakan tlen kijtoua nin texto: “Amo xikualantokan nochi se tonal” (Efesios 4:26). Pero moneki tikchiuas tlen yotikijto.
Matiktemokan ken techpaleuia Biblia
it-2-S pág. 545 párr. 4
Toixtololo
Toixtololouan kiteititiaj ken timomachiliaj uan noijki mota kox titeiknomatij (Deut. 19:13). Noijki mota itech toixtololouan tla itlaj techkualania (Sal. 35:19; Prov. 6:13; 16:30). Ijkuak amo tiknekij tikitaskej tlen kichiuaj oksekimej, tikchiuaj ken amo tikitaj noso tikintsakuaj toixtololouan (Mat. 13:15; Prov. 28:27). Inmixtololouan xoxotij san kanin tlachixtinemij. San ixkualantinemij uan amo tlachiaj kanin moneki. Noijki san tlen amo mokuayejyekouaj (Prov. 17:24). Toixtololouaj kiteititiaj kox timokokouaj, kox tichikauakej uan kox tipakij (1 Sam. 14:27-29; Deut. 34:7; Job 17:7; Sal. 6:7; 88:9). Ijkuak Jehosafat omotlatlaujti, okijto yejuan otlachixtokaj ixpan Jehová (2 Crón. 20:12).
16-22 DE JUNIO
KEN TECHPALEUIA BIBLIA PROVERBIOS 18
Xikinyolchikaua akinmej mokokouaj
“Ixtlamatilistli tlen melauak, chikauak mokaki itech ojtli”
17 Matimokuayejyekokan ijkuak titlajtouaj. Tla amo ijkon tikchiuaj, xamo tikinyolkokoskej oksekimej. Biblia kijtoua: “Akin amo mokuayejyekoua ijkuak tlajtoua tetsopitia ken se espada pero innenepil ixtlamatkej tepajtia” (Prov. 12:18). Kuali timouikaskej iuan oksekimej tla amo san tikijtojtinemij tlen kichiuaj oksekimej (Prov. 20:19). Tla tiknekij makinpaleui oksekimej tlen tikijtoskej, moneki matiktlajtoltikan Biblia (Luc. 6:45). Uelis kinpaleuis oksekimej tlen tikijtoskej tla timokuayejyekouaj tlen kijtouaj Biblia uan noijki uelis kinyolseuis (Prov. 18:4).
mrt-S tlamachtil 19, recuadro
¿Tlen tikchiuas tla tiualmokokojtikisa?
Kuali xikkaki moyolikni. Kuali xikkaki ijkuak mitstlapouis tlen kipanoua uan ijkon tikteititis tikneki tikpaleuis. Amo moneki nochi tiknankilis tlen mitsiluis porque xamo san kineki xikkaki ken momachilia. Amo mamitsmomojti tlen mitsiluis nio xikteneua. Amo xikijto tikmati ken momachilia moyolikni tla mokokoua uan amo mota (Proverbios 11:2).
Xikilui tlen kiyolchikauas. Xamo ualeua amo tikmatis tlen tikiluis pero xikilui tikmati tlajyouijtok. Xamo non kiyolchikauas maski amo tikiluis miak tlamantli. Tla amo tikmati tlen tikiluis, san xikilui tiktlasojtla. Amo xikilui ye amo okachi tlajyouijtok noso amo kipia se kokolistli tlen temikti.
Xiktemo tlen kokolistli kipia moyolikni. Ye mitstlasojkamatilis porque timochijchikaua tikajsikamatis tlen kipanotok uan okachi kiyolchikauas tlen tikiluis (Proverbios 18:13). Pero amo xikilui tlen kichiuas tla amo mitsiluia xikpaleui.
Xikilui tikneki tikpaleuis. Xiktlajtlani ken uelis tikpaleuis uan amo ximokuayejyeko yitikmati tlen tikchiuas. Xamo mitsiluis amo xikpaleui porque amo kineki mitstonalpolos. Xikilui uelis tiktlakouiti, tiktlachipauis noso uelis tikchiuas okseki tlamantli (Gálatas 6:2).
Amo ximosotlaua. Xamo moyolikni mitsiluis ayakmo kichiuas tlen yomitsiluijka noso amo kinekis mouan motlapouis. Xikmati ximochia, xikajsikamati uan ok xikilui tikneki tikpaleuis (Proverbios 18:24).
¿Ken uelis tikinpaleuiskej akinmej amo kuali momachiliaj?
“Xikinyolchikawakah akimeh mosotlawah” (1 TESALONICENSES 5:14).
Xamo moyolikni motekipachoua noso kimachilia amitlaj ipati. Ikinon miak ipati xikteititi mitstekipachoua tlen kipanoua. Ijkon tikyolchikauas moyolikni uan tikpaleuis mamoyolseui maski amo tikmati tlen tikiluis.
“Se melauak toyolikni nochipa kiteititia techtlasojtla” (PROVERBIOS 17:17).
Xikilui moyolikni tikneki tikpaleuis. Xiktlajtlani ken kineki xikpaleui uan amo xikpaleui ijkon ken te tikneki. Xamo moyolikni kineki xikpaleui pero amo kimati ken mitsiluis. Uelis tikiluis ken kichiuas seki tlamantli uan uelis san sekan nannemitiuij. Noijki uelis tiktlajtlanis kox kineki xiktlakouiti, kox kineki xiktlachipaui noso xikchiua okseki tlamantli (Gálatas 6:2).
“Xikinmajsikamatiltikah [noso xikinxikokan] nochteh” (1 TESALONICENSES 5:14).
Xamo moyolikni amo nochipa kinekis mouan motlapouis. Pero xikilui tikkakis ijkuak ye kinekis mitstlapouis. Moyolikni mokokoua ikinon xamo itlaj kichiuas, kijtos itlaj tlen mitsyolkokos, ayakmo kinekis kichiuas tlen okijto noso kualanis. Ijkuak tikpaleuis moyolikni xikajsikamati uan amo san niman ximosotlaua (Proverbios 18:24).
Matiktemokan ken techpaleuia Biblia
it-2-S pág. 1063
Motlatlanij
Yiuejkika omotlatlaniayaj para kitaskiaj ken kichiuaskiaj seki tlamantli. Omotlatlaniayaj ika tepexitsitsintin noso kojtsitsintin uan okitlaliayaj ijtik intlaken noso ijtik se xoktsin uan okitsetselouayaj. Okimatiayaj akin otlatlaniaya ijkuak okikixtiayaj se tepexitsintli noso se kojtsintli. Omotlatlaujtiayaj ijkuak ijkon okichiuayaj ijkon ken ijkuak okijtouayaj itlaj kichiuaskiaj. Omokakiaya ijkuak omotlatlaujtiayaj uan non okiteititiaya okiluiayaj Jehová makinpaleui. Ika hebreo tlajtoli motlatlanij moijtoua goh·rál uan nin tlajtoli kinejnekij ijkuak motlatlanij noso ijkuak itlaj kineskayotia. Non kijtosneki itlaj kimakaskiaj akin tlatlaniskia (Jos. 15:1; Sal. 16:5; 125:3; Is. 57:6; Jer. 13:25).
¿Tleka omotlatlaniayaj? Proverbios 16:33 kijtoua: “Itech intlaken itlaj okitlaliayaj para motlatlaniskej pero Jehová okijtouaya akin tlatlaniskiaj”. Israelitas ijkon okichiuayaj ijkuak sekimej omokualaniayaj: “Ayakmo omokualaniayaj ijkuak omotlatlaniayaj uan ijkon okinxexelouayaj akinmej omokualaniayaj” (Prov. 18:18). Amo omotlatlaniayaj san para mauiltiskej, moyolpaktiskej uan kitlaniskej tomin. Amo okitlaniayaj tomin nion itlaj okipolouayaj. Amo omotlatlaniayaj para kitlaniskej tomin tlen ika kiyektlaliskej templo noso tlen kinmakaskiaj teopixkej nion kololoskiaj tomin para kinmakaskej akinmej amitlaj kipiaj. Pero soldados romanos omotlatlankej porque okinekiayaj itlaj kitlaniskej. Yejuan okichijkej tlen kijtoua Salmo 22:18 uan ijkon okitakej akin kimokauiskia itlaken Jesús (Mat. 27:35).
23-29 DE JUNIO
KEN TECHPALEUIA BIBLIA PROVERBIOS 19
Kuali ximouika inuan tokniuan
¿Tlen techpaleuis melauak matimotlasojtlakan?
16 Matikitakan tlen kuali kichiuaj oksekimej uan amo san matikitakan tlen amo kuali kichiuaj. Matikijtokan timoyolpaktijtok inuan sekimej tokniuan uan tikneki inuan tikmokixtilis se foto. Te tikinkixtia eyi fotos pero tikita se foto amo kuali okiski se tokni. Ikinon tikpojpoloua non foto uan tikinmokauia ome fotos kanin nochtin kuali okiskej.
17 Fotos tlen tikintlatiaj yetoskia ken itlaj tlen tikilnamiktokej. Ualeua tikilnamiktokej ijkuak otimoyolpaktiayaj inuan tokniuan. Pero xamo tikilnamikij se tokni okijto noso okichi itlaj tlen amo kuali. ¿Tlen tikchiuaskej? Uelis tikilkauaskej ijkon ken ijkuak tikpojpolouaj se foto (Prov. 19:11; Efes. 4:32). Uelis tikilkauaskej tlen amo kuali otechtokti uan okachi matikilnamikikan kuali iuan otimouikayaj. Okachi kuali tla tikintlatiaj “fotos tlen kuali okiskej”.
w23.07 págs. 9, 10 párrs. 10, 11
Okachi matitetlasojtlakan
10 Tejuan noijki tikitaj ken tikinpaleuiskej tokniuan (Heb. 13:16). Matikitakan tlen okichi Anna tlen otimomachtijkej yichikome. Ye uan inamik oyajkej okintlajpalotoj sekimej tokniuan ijkuak otlaxixinki. Yejuan okitakej oxixinki inkal tokniuan ikinon amo okipiayaj intlaken chipauak para kimokentiskej. Anna okijto: “Otikuikakej intlaken, otikpakej uan oksepa otikinmakatoj. Amo oui tlen otikchijkej pero non otechpaleui okachi kuali inmiuan matimouikakan”. Anna uan inamik okinpaleuijkej nonmej tokniuan porque okintlasojtlayaj (1 Juan 3:17, 18).
11 Ijkuak tikintlasojtlaj oksekimej, tikteititiaj tikchiuaj uan timokuayejyekouaj ken Jehová. Tlen tikchiuaj kitaj oksekimej. Pero xamo amo keman tikmatiskej ken kinpaleuia oksekimej tlen tikchiuaj. Khanh tlen otikitakej itech párrafo 8 amo kinmilkaua tokniuan tlen okipaleuijkej. Ye okijto: “Nikintlasojkamatilia nochtin tokniuan tlen onechpaleuijkej manitetlapoui. Yejuan onechtlasojtlayaj ikinon oyayaj nechnotsatiuij, inmiuan onitlakuaya uan satepan oyayaj nechkauatiuij nokalijtik. Tlen okichijkej okatka oui pero omochijchikajkej nechpaleuiskej porque nechtlasojtlaj”. Pero amo nochtin techtlasojkamatiliskej porque tikinpaleuiaj. Khanh noijki okijto: “Niknekiskia nochtin nikintlasojkamatilis akinmej onechpaleuijkej pero axkan amo nikmati kanin chantij. Pero Jehová kema kimati uan niktlatlaujtia makinteochiua”. Jehová kimati tlen tikchiuaj maski amo sapanoua ueyi. Kita ken timochijchikauaj uan kineki techteochiuas (xiktlajtolti Proverbios 19:17).
Nochipa ma timotlasojtlakan ika nochi toyolo uan ma timopaleuikan
6 Ma tikitakan ken sekimej okinchiuilijkej tlen kuali apóstol Pablo uan oksekimej. Ye uan oksekimej oyayaj itech se barco pero oapolaki, ik non, oajsitoj isla Malta. Maski akinmej ompa ochantiayaj amo inmiuan omouikayaj okinmiknomatkej uan okinkalotijkej (Hechos 28:2, 7). Pero ¿uelis tikijtoskej akinmej ochantiayaj itech non isla nochipa okintlasojtlakej Pablo uan oksekimej? Amo. Yejuan okinekiayaj kinpaleuiskej porque ijkuakon ijkon omonekiaya.
7 Párrafo 6 kiteititia akinmej kitechiuiliaj tlen kuali, amo ijkon ken akinmej nochipa tetlasojtlaj ika nochi toyolo. Tikmatiskej tleka tlatlamantli kijtosneki tla tikitaj ken otetlasojtlakej itekipanojkauan Jehová. Ma tikitakan ken okichi David. Maski Saúl okinekiaya kimiktis David, ye nochipa kitlasojtlas Jonatán porque okiski itech iyolo kitlasojtlas. Maski opanok miak xiuitl ijkuak yoixpoliuik Jonatán, David noijki nochipa okitlasojtlaya Mefibóset ika nochi iyolo, ye okatka ikone Jonatán. ¿Tleka ijkon okichi David? Porque sapanoua okitlasojtlak Jonatán. Non kiteititia akinmej kitechiuiliaj tlen kuali amo ijkon ken akinmej nochipa tetlasojtlaj ika nochi inyolo (1 Sam. 20:9, 14, 15; 2 Sam. 4:4; 8:15; 9:1, 6, 7).
Matiktemokan ken techpaleuia Biblia
it-1-S pág. 545
Techyektlalia
San ye Jehová sapanoua ixtlamatki. Ye amikaj kiluia tlen moneki kichiuas (Is. 40:13; Rom. 11:34). Jesús okichi tlen okilui iTajtsin uan okiseli iespíritu santo ikinon ye noijki uelis techyektlalis (Is. 9:6; 11:2; Juan 5:19, 30). Nin kijtosneki moneki tikkakiskej Jehová tla tiknekij matechpaleui tlen techiluia. Amitlaj ipati tikkakiskej tlen oksekimej techiluiaj tla kixnamiki Jehová (Prov. 19:21; 21:30).
30 DE JUNIO-6 DE JULIO
KEN TECHPALEUIA BIBLIA PROVERBIOS 20
¿Tlen mitspaleuis kuali xikpejpena akin iuan timonamiktis?
w24.05 pág. 26, 27 párrs. 3, 4
¿Tlen moneki kichiuaskej novios para kiyolpaktiskej Jehová?
3 Ijkuak se telpochtli uan se ichpochtli mochiuaj novios, yolpakij pero moneki mokuayejyekoskej kox monamiktiskej uan amo san kajauilmatiskej. Ijkuak monamiktiskej kiluiskej Jehová nochipa motlasojtlaskej uan motlakaitaskej. Ikinon moneki kuali mokuayejyekoskej tlen kichiuaskej (xiktlajtolti Proverbios 20:25). Ijkuak se telpochtli uan se ichpochtli mochiuaj novios, okachi kuali moixmatij uan non kinpaleuis makipejpenakan kox monamiktiskej noso amo. Pero tla kijtoskej ayakmo yetoskej novios amo kijtosneki itlaj amo kuali okichijkej. Ijkuak okatkaj novios kuali omoixmatkej ikinon okipejpenkej amo monamiktiskej.
4 ¿Tleka miak ipati makajsikamatikan telpochmej uan ichpochmej tlen kijtosneki ijkuak ikaj kipia inovia noso inovio? Tla se tokni tlen ok iselti kajsikamati tlen kijtosneki amo nemis iuan ikaj tlen amo kineki monamiktis. Pero tinochtin moneki matikajsikamatikan non tlamantli uan amo san akinmej ayamo monamiktiaj. Ualeua sekimej kijtouaj ijkuak se telpochtli uan se ichpochtli yomochijkej novios moneki monamiktiskej. Pero yejuan motekipachouaj ijkuak ijkon kinmiluiaj. Se tokni itoka Melissa uan chanti Estados Unidos okijto: “Sekimej tokniuan kinmiluiaj miak tlamantli akinmej yomochijkej novios para mamonamiktikan. Ikinon sekimej novios monamiktiaj maski amo kuali mouikaj. Oksekimej telpochmej uan ichpochmej kijtouaj amikaj iuan nemiskej porque ijkon amitlaj kintekipachos”.
¿Tlen mitspaleuis xikajsi akin iuan timonamiktis?
8 Xamo timotlajtlania ken uelis tikitas tlen kichiua akin mitspaktia. Uelis tikitas ken iyelis uan kox kuali mouika iuan Jehová ijkuak nanmonechikouaj noso ijkuak nankichiuaj okseki tlamantli inuan tokniuan. Noijki uelis tikitas akinmej inuan mouika uan tlen kipaktia motlapouis inuan oksekimej (Luc. 6:45). Noijki xikita kox kineki kichiuas tlen te mitspaktiskia tikchiuas. Uelis timotlapouis inuan tlayekankej noso tokniuan tlen kipiaj chikauak intlaneltokilis. Yejuan mitsiluiskej tlen tikneki tikmatis (Prov. 20:18). Uelis tikintlajtlanis ken kitaj oksekimej non ichpochtli uan ken iyelis (Rut 2:11). Pero amitlaj xikchiua tlen uelis kikuejsos. Xiktlakaita, amo san tlen amo xikiluijto uan amo san iuan xiyeto.
¿Tlen moneki kichiuaskej novios para kiyolpaktiskej Jehová?
7 ¿Tlen mitspaleuis kuali xikixmati monovio noso monovia? Ximotlapouikan nochi tlen moneki uan amo ximokajkayauakan. Ximotlajtlanikan nochi tlen moneki uan ximokakikan (Prov. 20:5; Sant. 1:19). Uelis nanmotlapouiskej tla san sekan nantlakuaskej, tla nanpaxialotiuij kanin miakej panouaj uan tla san sekan nantetlapouiskej. Noijki uelis nanmoixmatiskej tla nanmonechikoskej inuan namoyolikniuan uan namofamilia. Xikinyoleua sekimej tokniuan uan xikchiua seki tlamantli. Ijkon tikmatis tlen kichiua ijkuak itlaj panoua uan ken mouika inuan oksekimej. Ijkon okichi se tokni itoka Albert tlen chanti Países Bajos ijkuak ye uan Alicia okatkaj novios. Ye okijto: “Otikchiuayaj seki tlamantli tlen otechpaleuiaya okachi matimoixmatikan. San sekan otitlakualchiuayaj noso itlaj otikchiuayaj kalijtik. Non otechpaleui matikitakan tlen okachi kuali otikchiuayaj uan tlen amo kuali otikchiuayaj”.
8 Noijki mitspaleuis kuali xikixmati monovia noso monovio tla iuan timomachtis Biblia. Porque tla nanmonamiktiskej monekis nanmomachtiskej Biblia ken familia uan ijkon nankikauiliskej toTajtsin Dios manamechyekana (Ecl. 4:12). Ikinon namechpaleuis tla desde axkan san sekan nanmomachtiskej. Uelis ijkon nankichiuaskej maski ayamo nankatej ken se familia uan maski tlakatl ayamo kiyekana inovia. Pero tla san sekan nanmomachtiskej uelis nankitaskej ken nanmouikaj iuan Jehová. Max uan Laysa tlen chantij Estados Unidos okijtojkej ijkuak san sekan omomachtiayaj okinpaleui makichiuakan okse tlamantli. Max okijto: “Ijkuak otimochijkej novios san sekan otimomachtiayaj amatlajkuilolmej. Otiktlajtoltiayaj tlen moneki kichiuaskej novios, akinmej yomonamiktijkej uan tlen moneki kichiuaskej familias. Non otechpaleui matimotlapouikan seki tlamantli miak ipati tlen amo otikchiayaj timotlapouiskej”.
Matiktemokan ken techpaleuia Biblia
it-2-S pág. 187 párr. 5
Tlauili
Proverbios 20:27 kijtoua: “Tlen kijtoua se tlakatl yetoskia ken itlauil Jehová uan kita tlen kipia iyolipan”. Ijkuak ikaj kijtoua teixpan tlen kuali noso amo kuali, kiteititia ken iyelis uan mota tlen kipia iyolipan uan nin yetoskia ken petlani (noijki xikita Hech. 9:1).