¿Tiktlasojkamatiliaj toTajtsin Dios tlen techmaka?

1, 2. (1) Ijkon ken kijtoua Salmo 40:5, ¿tlen yotechtliokoli Jehová? (2) ¿Tleka timomachtiskej nin eyi tlamantli?

JEHOVÁ kipaktia kitemakas tlen kipia. Ye otechtliokoli tlaltikpak, tokuatitix uan Biblia. Jehová otechmakak nin eyi tlamantli uan ijkon tikpiaj kanin tichantij, ueli timokuayejyekouaj uan timotlapouiaj iuan oksekimej. Noijki tikmatij miak tlamantli tlen achto amo otikmatiayaj (xiktlajtolti Salmo 40:5).

² Axkan timomachtiskej nin eyi tlamantli tlen Jehová techtliokolia. Tla timokuayejyekouaj tlen techmaka Jehová, okachi tiktlasojkamatiliskej uan tikyolpaktiskej (Apoc. 4:11). Noijki techpaleuis ma tikmatikan ken tikinpaleuiskej akinmej kinkajkayauaj ma kineltokakan tiuitsej itech se yolkatl.

TLALTIKPAK KUALTSIN CHIJCHITOK

3. ¿Tleka tlaltikpak amo ken okseki planetas?

³ Tikitaj Jehová ixtlamatki ijkuak timokuayejyekouaj ken okichijchi tlaltikpak (Rom. 1:20; Heb. 3:4). Katej okseki planetas tlen kiyaualouaj tonaltsin pero san tlaltikpak ueli ipan tichantij.

4. Xikijto ken kiteititia tlaltikpak Jehová ixtlamatki.

⁴ Tlaltikpak ken se kali tlen kuali tsaktok. Pero tlaltikpak okichijchi Jehová uan se kali san tlakamej kichijchiuaj. Amo tlaxikoskej akinmej ompa kaltsaktoskej tla amo kalaki ejekatl, amo kipiaj tlen kikuaskej uan amo kipiaj tlen koniskej. Noijki san niman ixpoliuiskej tla amo kipiaj kanin kitlamotlaskej tlajsoli. Pero ipan tlaltikpak onka nochi tlen yoltok uan kipia tlen ika tiyoltokej, ejekatl, tlakuali uan atl tlen amo keman tlami. Tlaltikpak kualtsin mota uan ueli ipan tichantij maski onka miak tlamantli tlen palani. ¿Tleka? Jehová okitlali ma palani nochi tlen yoijtlakauik uan oksepa uelis tiktekitiltiskej. Axkan ma tikitakan tlen kipanoua ejekatl uan atl.

5. ¿Ken moyankuilijti ejekatl uan tlen techititia?

⁵ Tejuan uan yolkamej moneki tikijyotilanaskej ejekatl para tiyoltoskej. Sejse xiuitl tejuan uan okseki tlamantli tlen yoltok miak ejekatl tikijyotilanaj. Ijkuak tikijyotilanaj ejekatl tikkixtiaj se tlamantli tlen itoka dióxido de carbono. Pero ejekatl tlen tikijyotilanaj amo keman tlami uan amo sokioua. ¿Tleka amitlaj kipanoua? Porque ejekatl moyankuilijti. Jehová okinchijchi okuilintsitsintin tlen amo motaj uan uejueyij kuajmej tlen kimokauiaj dióxido de carbono uan kikixtiaj ejekatl. Ijkon mochiua tlen kijtoua Hechos 17:24, 25: “Ye Akin kichiwa matiyolitokah, iwa techmaka toijyotilis, iwa nochi tlan onka”.

6. ¿Ken mochipajti atl uan tlen techititia? (Xikita recuadro “Jehová okichi ma mochipajti atl porque techtlasojtla”).

⁶ Nikan tlaltikpak onka atl porque tonaltsin kajki kanin moneki. Tla amo uejka yetoskia, nochi atl uakiskia uan tlaltikpak san yetoskia se tetl totonik. Pero tla tonaltsin uejka yetoskia nochi atl mokopaskia setl uan noijki tlaltikpak. Pero amo ijkon panoua porque Jehová okitlali tlaltikpak kanin moneki. Noijki atl mochipajti uan ijkon tiyoltokej. ¿Ken panoua? Tonaltsin kitotonia nochi atl uan mokopa mixtli. Sejse xiuitl tonaltsin kichiua sapanoua miak atl ma mokopa mixtli. Non atl mokaua ipan atmósfera kanaj majtlaktli tonal uan satepan kiaui noso tlaseuetsi uan yaui itech mar uan kanin momana atl. Satepan oksepa peua mochipajti. Nin kiteititia Jehová sapanoua chikauak uan ixtlamatki (Job 36:27, 28; Ecl. 1:7).

7. ¿Ken tiktlasojkamatiliaj Jehová otechmakak tlaltikpak?

⁷ Moneki timokuayejyekoskej tlen okichijchi Jehová tla tiknekij tikpatioitaskej tlaltikpak uan nochi tlen kipia (xiktlajtolti Salmo 115:16). Nin techpaleuis ma tiktlasojkamatilikan Jehová nochi tlen techmaka. Noijki tikteititiskej timotlasojkamatij tla amo tiksokiotiaj tlaltikpak.

TETLAJTLACHIALTI KEN CHIJCHITOK TOKUATITIX

8. ¿Ken tikmatij tokuatitix kuali chijchitok?

⁸ Tokuatitix kuali chijchitok. Ijkuak otikatkaj ijtik tonantsin, tokuatitix iselti omochijchijtiaj ijkon ken moneki. Sejse minuto omochijchiuayaj miakej células. Ixtlamatkej kijtouaj ijkuak yotlanki otimoskaltijkej, tokuatitix kinpia kanaj cien mil millones neuronas. Nochi ninmej neuronas katej ijtik tokuatitix uan etik san se kilo uan tlajko. Ma tikitakan seki tlamantli tetlajtlachialti tlen kichiua tokuatitix.

9. ¿Tleka se tlateochiuali toTajtsin Dios techkauilia ma titlajtokan?

⁹ Se tlateochiuali titlajtouaj. Ma timokuayejyekokan tlen techpanoua ijkuak titlajtouaj. Tokuatitix kichiua ma molinikan kanaj cien tlamantli tlen kipia tonenepil, tokech, totenxipal, tokamak uan toelpan para tikijtoskej se tlajtoli. Nochi molinia ken moneki uan ijkon moajsikamati tlen tikijtouaj. Uelis titlajtoskej miakej tlajtolmej. Itech 2019, ixtlamatkej okijtojkej ijkuak nesij konemej yikajsikamatij seki tlajtoli. Ik non, ixtlamatkej kijtouaj ijkuak tinesij yitikmatij seki tlajtoli uan uelis timomachtiskej okseki tlajtolmej. Se tlateochiuali toTajtsin Dios techkauilia ma titlajtokan (Éx. 4:11).

10. ¿Ken tiktlasojkamatiliaj Jehová techkauilia ma titlajtokan?

¹⁰ Tiktlasojkamatiliaj Jehová techkauilia ma titlajtokan ijkuak tikinyekiluiaj akinmej kineltokaj evolución tleka tikneltokaj ye otlachijchi (Sal. 9:1; 1 Ped. 3:15). Yejuan kinekij ma tikneltokakan amikaj otechchijchi nion tlaltikpak. Ika Biblia uan ika nin tlamachtil ma tikinyekiluikan Jehová okichijchi iluikak uan tlaltikpak (Sal. 102:25; Is. 40:25, 26).

11. ¿Tleka tikijtouaj tokuatitix tetlajtlachialti?

¹¹ Tetlajtlachialti tikilnamikij miak tlamantli. Yiuejkika se ixtlamatki okijto tokuatitix uelis kilnamikis tlen ijkuilitok itech veinte millones amochmej. Pero axkan kijtouaj okachi miak tlamantli uelis kilnamikis. Nin techpaleuia ma tikchiuakan itlaj miak ipati. Ma tikitakan.

12. ¿Ken techpaleuia tikilnamikiskej tlen otechpanok?

¹² San tlaltikpaktlakamej ueli tikilnamikij tlen otechpanok uan ijkon timomachtiaj miak tlamantli. Ijkuak tikilnamikij tlen otechpanok techpaleuia ma tikpatlakan tlen timokuayejyekouaj uan tlen tikchiuaj uan ijkon okachi kuali tikpiaj toyelis (1 Cor. 6:9-11; Col. 3:9, 10). Uelis tikmachtiskej totlalnamikilis uan ijkon tikmatiskej tlen kuali uan tlen amo kuali (Heb. 5:14). Uelis timomachtiskej ken titetlasojtlaskej, titeiknomatiskej uan tikchiuaskej nochi ika melajkayotl ijkon ken Jehová kichiua.

13. Ijkon ken kijtoua Salmo 77:11, 12, ¿tlen moneki tikchiuaskej ijkuak tikpejpenaskej tlen tikilnamikiskej?

¹³ Okachi tiktlasojtlaskej Jehová tla tikilnamikij ken yotechpaleui uan ken yotechyolseui. Ijkon noijki tikneltokaskej ye techpaleuis satepan (xiktlajtolti Salmo 77:11, 12; 78:4, 7). Noijki tikintlasojtlaskej oksekimej uan tikintlasojkamatiliskej tla tikilnamikiskej ken yotechpaleuijkej. Ixtlamatkej kijtouaj okachi yolpakij akinmej motlasojkamatij. Ma tikchiuakan ken Jehová ijkuak tikpejpenaskej tlen tikilnamikiskej. Ye ualeua kilkaua seki tlamantli. Tla timoyolkopaj ye techtlapojpoluia uan ayakmo kilnamiki tlen otikchijkej (Sal. 25:7; 130:3, 4). Ye noijki kineki ijkon ma tikchiuakan iuan akinmej otechyolkokojkej (Mat. 6:14; Luc. 17:3, 4).

14. ¿Ken tiktlasojkamatiliaj Jehová otechmakak tokuatitix?

¹⁴ Ma tiktekitiltikan tokuatitix para tikueyichiuaskej Jehová uan ijkon tikteititiskej tiktlasojkamatiliaj. Sekimej amo kuali kitekitiltiaj uan san yejuan kipejpenaj tlen kuali uan tlen amo kuali. Pero Jehová otechchijchi, ik non, okachi techpaleuiaj itlanauatiluan (Rom. 12:1, 2). Tikatej ika yolseuilistli ijkuak tikintlakamatij itlanauatiluan (Is. 48:17, 18). Noijki tikajsikamatij tiyoltokej para tikueyichiuaskej toTajtsin Dios uan tikyolpaktiskej (Prov. 27:11).

BIBLIA SE TETLIOKOLIL MIAK IPATI

15. ¿Ken kiteititia Biblia toTajtsin Dios techtlasojtla?

¹⁵ Biblia kiteititia toTajtsin Dios techtlasojtla. Ye okinnauati sekimej tlakamej ma kijkuilokan porque ye kitekipachoua tlen techpanoua. Jehová technankilia ika Biblia tlen timotlajtlaniaj. Ualeua timotlajtlaniaj: ¿Kanin tiuitsej? ¿Tleka tiyoltokej? uan ¿tlen panos satepan? Jehová kineki ma tikmatikan tlen timotlajtlaniaj, ik non, yokichi ma kitlajtolkopakan Biblia ika miakej tlajtolmej. Axkan Biblia kajki tlajko noso ajsitok ika kanaj tres mil tlajtolmej. Nin amochtli tlen okachi kitlajtolkopaj uan kixejxelouaj ipan nochi tlaltikpak. Nochtin uelis kimatiskej tlen tlamachtia Biblia maski san kanin chantij uan tlatlamantli intlajtol (xikita recuadro “Okitlajtolkopkej Biblia ika tlajtolmej africanos)”.

16. Ijkon ken kijtoua Mateo 28:19, 20, TNM, ¿ken tikteititiaj timotlasojkamatij tikpiaj Biblia?

¹⁶ ¿Ken tikteititiaj timotlasojkamatij tikpiaj Biblia? Nochipa ma tiktlajtoltikan, ma timokuayejyekokan tlen techmachtia uan ma tikchiuakan tlen kijtoua. Noijki tiktlasojkamatiliaj toTajtsin Dios ijkuak tikinpaleuiaj oksekimej ma kimatikan tlen tlamachtia Biblia (Sal. 1:1-3; Mat. 24:14; xiktlajtolti Mateo 28:19, 20, TNM).

17. ¿Tlen eyi tlamantli otechtliokoli Jehová uan tlen timomachtiskej chikome?

¹⁷ Axkan otikitakej eyi tlamantli tlen otechtliokoli toTajtsin Dios. Tlaltikpak, tokuatitix uan Biblia. Pero seki tlamantli tlen Jehová techtliokolia amo mota. Itech okse tlamachtil tikitaskej tlen tlamantli techtliokolia tlen amo mota.