Nochipa tiyoltoskej

1. ¿Ken techpaleuia timokuayejyekoskej ayakmo keman tiixpoliuiskej ijkon ken yokijto Jehová?

JEHOVÁ yokijto tikpiaskej “nemílistli non ayik tlami” akinmej kitlakamatij (Rom. 6:23). Ijkuak timokuayejyekouaj nochipa tiyoltoskej okachi tiktlasojtla toTajtsin Dios. Ximokuayejyeko Jehová sapanoua techtlasojtla, ikinon techiluia nochipa tiyoltoskej uan nochipa iuan timouikaskej.

2. ¿Ken techpaleuia tikmatiskej nochipa tiyoltoskej?

² ToTajtsin Dios techiluia nochipa tiyoltoskej uan non techpaleuia matitlaxikokan tla titlajyouijtokej. Nochipa matiktekichiuilikan Jehová maski akinmej techkokoliaj techiluiskej techmiktiskej. Ijkon tikchiuaj porque tla tiktekichiuiliaj Jehová uan tiyolmelajkej maski tiixpoliuiskej ye oksepa techyolitis uan ayakmo keman tiixpoliuiskej (Juan 5:28, 29; 1 Cor. 15:55-58; Heb. 2:15). ¿Tleka tikneltokaj melauak nochipa tiyoltoskej? Matikitakan tleka ijkon tikijtouaj.

JEHOVÁ NOCHIPA YOLTOS

3. ¿Tleka tikneltokaj Jehová melauak kichiuas nochipa matiyoltokan? (Salmo 102:12, 24, 27).

³ Jehová uelis kichiuas nochipa matiyoltokan porque ye kitemaka yolilistli uan nochipa kajki (Sal. 36:9). Matikinmitakan seki textos tlen techititiaj Jehová nochipa kajki uan nochipa yetos. Salmo 90:2 kijtoua: “Te yotikatka tiDios uan nochipa tiyetos”. Salmo 102 noijki ijkon kijtoua (xiktlajtolti Salmo 102:12, 24, 27). Profeta Habacuc okijkuilo: “Te nochipa tika Jehová. Te tinoDios uan tiSanto, amo tiixpoliui” (Hab. 1:12).

4. ¿Tleka amo matimotekipachokan tla amo tikajsikamatij Jehová kajki nochipa?

⁴ Ualeua amo tikajsikamatij ijkuak Biblia kijtoua Jehová “kajki nochipa” (Is. 40:28). Pero amo san tejuatsin ijkon mitspanoua. Elihú okijto amo keman tikmatiskej keski xiuitl kipia toTajtsin Dios (Job 36:26). Maski tejuan itlaj amo tikajsikamatij, amo uelis tikijtoskej non amo melauak. Xamo tejuan amo tikajsikamatij ken chijchitok tlauili uan ken tekiti pero non amo kijtosneki amo kajki. Xamo noijki tejuan ijkon techpanoua, amo keman tikajsikamatiskej ken uan keman oneski Jehová. Pero non amo kijtosneki toTajtsin Dios amo kajki noso amo nochipa yetos. Tejuan amo moneki nochi tikajsikamatiskej para tikmatiskej toTajtsin Dios nochipa kajki (Rom. 11:33-36). Ye yokatka ijkuak ayamo okatkaj tlaltikpak, tonaltsin uan sitlalimej. Biblia kijtoua toTajtsin Dios ika ichikaualis okichijchi tlaltikpak uan iluikak (Jer. 51:15; Hech. 17:24). Matikitakan okse tlamantli tlen techpaleuis matikneltokakan nochipa tiyoltoskej.

JEHOVÁ OTECHCHIJCHI PARA AMO MATIIXPOLIUIKAN

5. ¿Tlen okinekiaya Jehová para Adán uan Eva?

⁵ Nochtin yolkamej tlen okinchijchi Jehová mikij pero ye okinekiaya tejuan nochipa matiyoltokan. Ikinon Jehová okilui Adán: “Kuauitl tlen kichiua makimatikan tlen kuali uan tlen amo kuali, amo xikkua itlakilo porque tla tikkuas, non tonal timikis” (Gén. 2:17). Adán uan Eva amo ixpoliuiskiaj tla kitlakamatiskiaj Jehová. Xamo se tonal toTajtsin Dios kinkauiliskia makikuakan “itlakilo kuauitl tlen kitemaka yolilistli”. Non kinmititiskia yejuan “nochipa”b yoltoskiaj (Gén. 3:22).

6, 7. (1) ¿Tleka tikijtouaj toTajtsin Dios amo otechchijchi para timikiskej? (2) ¿Tlen tikneki tikchiuas ijkuak nochipa tiyoltos? (Xikinmita dibujos).

⁶ Sekimej ixtlamatkej yokitakej tokuatitix uelis kitlatis sapanoua miak tlamantli. Itech 2010, se revista tlen tlajtouaj itech ciencia tlen okiski ompa Estados Unidos okijto tokuatitix uelis kitlatis kanaj dos millones quinientos mil gigabytes. Non yetoskia ken tikitaj se video tlen uejkaua kanaj tres millones de horas, para tikitaskej tiuejkauaskej 300 xiuitl. Pero tokuatitix uelis kitlatis okachi miak tlamantli. Ikinon tikijtouaj Jehová okichijchi tokuatitix para kitlatis sapanoua miak tlamantli tlen uelis timomachtiskej. Non kijtosneki amo san moneki tiyoltoskej 70 noso 80 xiuitl (Sal. 90:10).

⁷ Jehová otechchijchi para tiknekiskej nochipa tiyoltoskej. Biblia kijtoua toTajtsin Dios “okitlali itech inyolo tlaltikpaktlakamej makinekikan yoltoskej nochipa” (Ecl. 3:11). Ikinon tejuan amo tiknekij tiixpoliuiskej (1 Cor. 15:26). Ijkuak sapanoua timokokouaj san niman tikitatiuij tepajti uan timopajtiaj porque amo tiknekij tiixpoliuiskej. Ijkuak ikaj akin tiktlasojtlaj ixpoliui sapanoua timoyolkokouaj uan amo san niman timoyolseuiaj (Juan 11:32, 33). Jehová sapanoua techtlasojtla ikinon otechchijchi para tiknekiskej nochipa tiyoltoskej porque ye ijkon okinekiaya. Moneki tikneltokaskej nochipa tiyoltoskej. Axkan timomachtiskej seki tlamantli tlen kiteititia Jehová kineki nochipa matiyoltokan ika tlen yokichi uan tlen kichijtok.

AMO MOPATLA TLEN JEHOVÁ KINEKI KICHIUAS

8. Ijkon ken kijtoua Isaías 55:11, ¿tleka uelis tikneltokaskej Jehová ok kineki kichiuas tlen okijto?

⁸ Jehová ok kineki nochipa matiyoltokan, maski Adán uan Eva otlajtlakolchijkej uan axkan tinochtin tiixpoliuij (xiktlajtolti Isaías 55:11). ToTajtsin Dios kineki nochtin akinmej kitlakamatij nochipa mayoltokan. Porque ye yokijto uan yikichijtok miak tlamantli para mamochiua tlen ye kineki.

9. ¿Tlen okijto kichiuas Jehová? (Daniel 12:2, 13).

⁹ Jehová yokijto kinyolitis akinmej yoixpolikej uan uelis nochipa yoltoskej (Hech. 24:15; Tito 1:1, 2). Job okineltokaya Jehová kineki kinyolitis akinmej yoixpolikej (Job 14:14, 15). Noijki profeta Daniel okimatiaya kinyolitiskej akinmej yoixpolikej uan uelis nochipa yoltoskej (Sal. 37:29; xiktlajtolti Daniel 12:2, 13). Ijkuak Jesús nikan okatka, judíos noijki okimatiayaj Jehová uelis kichiuaskia itekipanojkauan nochipa mayoltokan (Luc. 10:25; 18:18, TNM). Ijkuak Jesús otetlapoui okijto kinyolitiskej akinmej yoixpolikej uan ijkuak okimiktijkej, Jehová okiyoliti (Mat. 19:29; 22:31, 32; Luc. 18:30; Juan 11:25).

10. ¿Tlen techmachtia ijkuak yiuejkika okinyolitijkej sekimej? (Xikita dibujo).

¹⁰ Jehová kichiua matiyoltokan ikinon noijki uelis kinyolitis akinmej yoixpolikej. Ye okimakak chikaualistli profeta Elías para kiyolitis ikone se iknosiuatl tlen ochantiaya Sarepta (1 Rey. 17:21-23). Satepan toTajtsin Dios okipaleui Eliseo para kiyolitis ikone se siuatl tlen ochantiaya Sunem (2 Rey. 4:18-20, 34-37). Non techititia Jehová kinyolitis akinmej yoixpolikej. Noijki Jesús ijkuak okatka nikan tlaltikpak okinyoliti sekimej (Juan 11:23-25, 43, 44). Axkan Jesús kajki iluikak uan Jehová kikauilia matlanauati “itech ilwikak iwa itech tlaltíkpaktli”. Ikinon ye uelis kinyolitis “nochteh non yomikkeh iwa tooktokeh” para nochipa yoltoskej nikan tlaltikpak (Mat. 28:18; Juan 5:25-29).

11. ¿Ken techpaleuia Jesús omotemakak topatka?

¹¹ ¿Tleka Jehová okitekauili makitlajyouiltikan uan makimiktikan ikone? Jesús okijto: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16). ToTajtsin Dios techtlapojpoluia porque okitemakak ikone topatka makimiktikan uan ijkon uelis nochipa tiyoltoskej (Mat. 20:28). Apóstol Pablo okiyekijto tlen kineki toTajtsin Dios, ye okijto: “Porke ijkó yej n mikílistli owala por se tlakatl (Adán), ijkó noiwa por se tlakatl (Jesús) moyolitiskeh non yomikkeh. Ijkó kemi nochteh n tlaltikpaktlakah mikkih porke walewatokeh de Adán, ijkó noiwa nochteh akimeh tiktlakitah Cristo, nochipa yolitoskeh por Ye” (1 Cor. 15:21, 22).

12. ¿Ken tlapaleuis iTekiuajkayo toTajtsin Dios para mamochiua tlen okijto?

¹² Jesús okinmachti idiscípulos mamotlatlautikan para matlanauati iTekiuajkayo toTajtsin Dios uan mamochiua tlen okijto iTajtsin nikan tlaltikpak (Mat. 6:9, 10, TNM). ToTajtsin Dios kineki matiyoltokan nochipa nikan tlaltikpak. Ikinon okitlali ikone matlanauati itech iTekiuajkayo inmiuan 144,000 tlen kinpejpena itech tlaltikpak. Yejuan tlapaleuiskej mamochiua nikan tlaltikpak tlen Jehová kineki (Apoc. 5:9, 10).

13. ¿Tlen kichijtok Jehová uan tlen moneki tikchiuas?

¹³ Axkan Jehová kinnechikojtok “senmiaktikeh tlaltikpaktlakah” uan kinmachtia ken chantiskej ijkuak tlanauatis iTekiuajkayo (Apoc. 7:9, 10; Sant. 2:8). Maski axkan miakej mokokoliaj uan onka guerras, akinmej kitlakamatij toTajtsin Dios mochijchikauaj motlasojtlaskej. Yetoskia ken ‘kinkopaj inmiespadas tlen ika tlameuaj’ (Miq. 4:3). Amo yauij guerras, yejuan kinpaleuiaj miakej makixmatikan toTajtsin Dios uan kinmachtiaj tlen kineki kichiuas satepan, ijkon “kipiaskeh n nemílistli non ayik tlami” (1 Tim. 6:19). Pero tokniuan tlen kipaleuiaj iTekiuajkayo toTajtsin Dios ualeua kintlajyouiltiaj infamiliares noso amo kipiaj tlen ika mopanoltiskej pero Jehová nochipa kinmaluia uan kinmaka tlen ika mopanoltiskej (Mat. 6:25, 30-33; Luc. 18:29, 30). Non techmachtia iTekiuajkayo toTajtsin Dios melauak kichiuas tlen ye yokijto.

SATEPAN KUALTSIN TIYETOSKEJ

14, 15. ¿Ken Jehová kipojpolos mikilistli?

¹⁴ Jesús yitlanauatijtok iluikak itech iTekiuajkayo toTajtsin Dios uan san niman kichiuas tlen Jehová kineki (2 Cor. 1:20). Desde 1914 Jesús yitlanauatijtok uan amo kinkauilia makichiuakan seki tlamantli akinmej kikokoliaj (Sal. 110:1, 2). San niman Jesús uan 144,000 tlapejpenalmej kintlaniliskej akinmej kinkokoliaj uan kinmixpoloskej (Apoc. 6:2).

¹⁵ Ijkuak Jesús tlanauatijtos mil xiuitl, kinyolitis akinmej yoixpolikej uan kinpaleuis akinmej ompa yetoskej para ayakmo makipiakan tlajtlakoli. Ijkuak saiktlami kinyejyekoskej, akinmej Jehová kinmitas yolkualmej “yetoskej tlaltikpak uan nochipa itech chantiskej” (Sal. 37:10, 11, 29). Uan “ikokolikni non sa iksemi kipojpolos ye n mikílistli” (1 Cor. 15:26). ¡Melauak tiyolpakiskej!

16. ¿Tleka tiktekichiuiliaj Jehová?

¹⁶ Ken yotikitakej, tikneltokaj tiyoltoskej nochipa porque Biblia ijkon kijtoua. Ken tikatej itlamian tonalmej, tlen Jehová okijto techmakas moneki techpaleuis amo matikkauakan. Tla tiknekij tikyolpaktiskej Jehová, moneki matiktlasojtlakan ika nochi toyolo ye uan noijki Jesús pero amo san porque tikmatij techmakixtiskej (2 Cor. 5:14, 15). Tikintlasojtlaj ikinon tiknekij tikchiuaskej ken yejuan uan timochijchikaua tikinmatiltiskej oksekimej tlen tikchiaj tikseliskej (Rom. 10:13-15). Tla techtekipachoua tlen kinpanoua oksekimej uan tikinpaleuiaj, Jehová kinekis nochipa touan mouikas (Heb. 13:16).

17. ¿Tlen moneki tikpejpenaskej tikchiuaskej? (Mateo 7:13, 14).

¹⁷ ¿Tlen techpanos? ¿Tiyoltoskej nochipa? Jehová kijtoua uelis tiyoltoskej, pero tejuan moneki tiyetoskej itech ojtli tlen techpaleuis matiyoltokan (xiktlajtolti Mateo 7:13, 14). Pero, ¿ken tiyetoskej ijkuak nochipa tiyoltoskej? Non timomachtiskej itech okse tlamachtil.