2 | ITlajtol toTajtsin Dios techyolseuia

BIBLIA KIJTOUA: “Nochi tlan yowejka omoijkuilo itech tiotlajkuíloli, omoijkuilo para matimoixtlamachtikah, para matikchiakah ika yolsewílistli tlan Ye yokijto techmakas” (ROMANOS 15:4).

¿Tlen kijtosneki?

Biblia kijtoua seki tlamantli tlen techyolseuia, techpaleuia matitlaxikokan uan techyolchikaua kuali matimomachilikan ijkuak timokuayejyekouaj tlen amo kuali. Biblia noijki kijtoua satepan ayakmo timoyolkokoskej.

¿Ken techpaleuia?

Ualeua tinochtin timotekipachouaj uan timoyolkokouaj. Pero oksekimej nochipa ijkon kinpanoua uan moneki mochijchikauaskej amo ijkon mamomachilikan. ¿Ken uelis kinpaleuis tlen kijtoua Biblia?

Biblia kijtoua miak tlamantli tlen uelis techpaleuis matikpatlakan tlen amo kuali timokuayejyekouaj (Filipenses 4:8). Ijkon uelis timokuayejyekoskej tlen techyolseuia uan techpaleuia kuali matimomachilikan (Salmo 94:18, 19).
Tla amo kuali timomachiliaj noso timokuayejyekouaj amitlaj topati, Biblia uelis techpaleuis amo ijkon matimomachilikan (Lucas 12:6, 7).
Biblia kijtoua tlen okinpanok sekimej itekipanojkauan toTajtsin Dios. Non techititia amo tikatej toselti porque toTajtsin Dios kajsikamati ken timomachiliaj (Salmo 34:18; 1 Juan 3:19, 20).
Biblia kijtoua toTajtsin Dios kichiuas ayakmo matikilnamikikan nochi tlen axkan techtlajyouiltia (Isaías 65:17; Apocalipsis 21:4). Biblia techpaleuia kuali matimomachilikan tla timochijchikauaj ayakmo timotekipachojtoskej.

Biblia okipaleui Jessica

Sapanoua nimoyolkokoua

“Ijkuak onikpiaya 25 xiuitl opejki nimokuayejyekoua tlen amo kuali uan tepajtijkej onechiluijkej sapanoua onimoyolkokouaya. Onikilnamikiaya tlen onechpanok uan nochipa ijkon onechpanouaya. Tepajtijkej onechiluijkej tlen onechpanok okichiuaya amo kuali manimokuayejyeko, ikinon opejki sapanoua nimoyolkokoua. Onikitato se tepajti manechpaleui manikita tleka nimokuayejyekoua tlen amo kuali”.

Nechpaleuia tlen kijtoua Biblia

“Ijkuak sapanoua onimoyolkokouaya, amo kuali onimomachiliaya, sapanoua onimotekipachouaya uan amo onikochiaya. Seki youak amo kuali onimomachiliaya porque san onimokuayejyekojtoka tlen amo kuali. Salmo 94:19 kijtoua toTajtsin Dios techpaleuia uan techyolseuia ijkuak itlaj sapanoua techtekipachoua. Ikinon kanin nikochi nikpia se Biblia uan se cuaderno. Ompa oijkuilitokaj textos bíblicos tlen onechyolchikauayaj. Ijkuak amo kuali onikochiaya, onikkauiliaya Jehová manechyolseui ika iTlajtol”.

“Biblia techpaleuia amo matimokuayejyekokan tlen amo kuali uan matimokuayejyekokan tlen kineki toTajtsin Dios. Onikneltokaya amitlaj nopati uan amikaj omonekiaya nechtlasojtlas. Pero onikitak non amo otlamachtiaya Biblia. Porque ompa kijtoua toTajtsin Dios techtlasojtla uan kitekipachoua tlen techpanoua. Yolik opejki kuali nimokuayejyekoua uan ayakmo san onimotekipachouaya. Opejki nimokuayejyekoua ken nechita toTajtsin Dios. Opejki kuali nimomachilia ijkuak ijkon onikchi”.

“Nikneki maajsi tonal ijkuak ayakmo matechtekipacho tlen timokuayejyekouaj. Nikneltoka satepan tinochtin kuali timomachiliskej. Non nechyolchikaua manitlaxiko hasta maajsi tonal ijkuak ayakmo nimoyolkokos”.