4 | Biblia kijtoua tlen techpaleuia

¿Tlen kijtosneki?

Biblia amo kijtoua ken timopajtiskej pero uelis kinpaleuis akinmej sapanoua motekipachouaj. Matikitakan seki tlamantli tlen uelis kinpaleuis.

¿Ken techpaleuia?

“Akimeh amo mokokoah [amo] kinekih se tepajti, yej non mokokoah” (MATEO 9:12).

Biblia kijtoua ualeua moneki matechpaleuikan oksekimej. Miakej akinmej amo kuali momachiliaj okinmitatoj tepajtijkej. Okachi kuali omomachilijkej ijkuak okinmiluijkej tleka ijkon kinpanoua uan okinpaleuijkej ken moneki.

“Tla tiktekitiltiah tokuerpo iwa tikchijchikawah, okachitsi techpalewia” (1 TIMOTEO 4:8).

Kuali timomachiliskej tla tikchiuaj tlen techpaleuia. Uelis tikchiuaskej ejercicio, tikkuaskej tlen techpaleuia uan kuali matikochikan.

“Akin yolpaki chikajtok pero akin moyolkokoua kipoloua ichikaualis” (PROVERBIOS 17:22).

Tiyolpakiskej tla tiktlajtoltiskej tlen kijtoua Biblia uan tla tikitaj tlen uelis tikchiuaskej. Tla timochijchikauaj timokuayejyekoskej tlen kuali, xamo techpaleuis kuali matimomachilikan.

“Ixtlamatilistli kajki iuan akinmej yolyamankej” (PROVERBIOS 11:2).

Xamo moneki oksekimej mamitspaleuikan tla tikneki tikchiuas seki tlamantli, ikinon xikinkauili mamitspaleuikan. Moyolikniuan uan mofamiliares kinekij mitspaleuiskej pero amo kimatij ken kichiuaskej. Xikinmilui ken tikneki mamitspaleuikan pero amo xikinmilui tlen amo uelis kichiuaskej. Noijki amo xikilkaua tikintlasojkamatilis.

¿Ken kinpaleuia Biblia akinmej amo kuali momachiliaj?

Nicolea san niman mopatla ken momachilia. Ye okijto: “Onikitak amo kuali onikatka ikinon onikitato tepajti. Ye onechilui tleka ijkon onechpanouaya uan onikajsikamatki onimokokouaya. Noijki onechilui tlen pajtli uelis nechpaleuiskia”.

Peter sapanoua moyolkokoua. Ye okijto: “Ne uan nosiua nochipa tiktlajtoltiaj Biblia uan non sapanoua nechpaleuia. Kualkan kuali nimomachilia ijkuak ijkon nikchiua. Yonikitak ijkuak amo kuali nimomachilia nikajsi se versículo tlen nechpaleuia”.

Ji-yoo kipia se kokolistli tlen kichiua sapanoua matlakua. Ye okijto: “Ijkuak opejki nimokokoua onipinauaya nikinmiluis oksekimej tlen onechpanouaya. Pero se noyolikni onechajsikamatki uan okiteititi nechtlasojtla. Non onechpaleui manikita amo nika noselti”.

Timothy kipia se kokolistli tlen itoka trastorno obsesivo compulsivo. Ye okijto: “Sapanoua nechpaleuia tlen kijtoua Biblia porque axkan nikita tekitl ken moneki uan noijki ijkuak nimoseuia. Noijki tlen ompa kijtoua nechpaleuia kuali manimomachili”.