TLAMACHTIL 46
Jehová techiluia kichiuas se xochitlali
“ToTajtsin Dios tlen melauak kiteochiuas akin kineki makiteochiuakan ipan tlaltikpak” (IS. 65:16).
TLAKUIKALI 3 Jehová nechpaleuia uan nechyolchikaua
XIKILNAMIKTOa
1. ¿Tlen okinmilui profeta Isaías israelitas?
PROFETA Isaías okijto Jehová ye “Dios tlen melauak”. Ika hebreo tlajtoli “melauak” nikan kijtosneki “amén” (Is. 65:16; nota). Tlajtoli “amén” kijtosneki “ijkon mamochiua”. Biblia miak uelta kijtoua tlajtoli “amén” para kiteititis melauak tlen Jehová uan Jesús kijtouaj noso kichiuaj. Ikinon tlen Isaías okinmilui israelitas okiteititi melauak mochiua tlen Jehová kijtoua. Jehová noijki yokiteititi melauak mochiua tlen kijtoua.
2. ¿Tleka uelis tikneltokaskej tlen Jehová yokijto kichiuas satepan? ¿Tlen tlajtlanilmej tikinnankiliskej itech nin tlamachtil?
2 ¿Tejuan uelis tikneltokaskej tlen Jehová yokijto kichiuas? Opanok kanaj 800 xiuitl ijkuak profeta Isaías okatka, apóstol Pablo okijto tleka uelis tikneltokaskej melauak mochiuas tlen Jehová yokijto. Pablo okijto: “Ye amo keman tlakajkayaua” (Heb. 6:18). Kanin meya atl amo uelis kisas atl tsopelik uan atl poyek. Noijki ijkon Jehová akin kijtoua tlen melauak amo uelis tlakajkayauas. Ikinon uelis tikneltokaskej nochi tlen kijtoua Jehová uan uelis tikneltokaskej tlen yokijto satepan kichiuas. Itech nin tlamachtil tikinnankiliskej ninmej tlajtlanilmej: ¿Tlen yokijto Jehová kichiuas satepan? ¿Ken yokiteititi melauak kichiuas tlen yokijto?
¿TLEN YOKIJTO JEHOVÁ?
3. (1) ¿Tlen sapanoua kipatioitaj akinmej kitekichiuiliaj toTajtsin Dios? (Apocalipsis 21:3, 4) (2) ¿Tlen kijtouaj sekimej ijkuak kikakij tlen tikintlajtoltiliaj?
3 Tlen axkan timomachtiskej sapanoua kipatioitaj nochtin akinmej kitekichiuiliaj toTajtsin Dios (xiktlajtolti Apocalipsis 21:3, 4). Jehová kijtoua “ayakmo yetos mikilistli, ayakmo ikaj moyolkokos, ayakmo ikaj chokas nion ayakmo ikaj tlajyouis”. Ijkuak titetlapouiaj tikintlajtoltiliaj nonmej versículos oksekimej para tikinyolchikauaskej uan tikinmiluiskej ken tlayetos satepan. ¿Tlen kijtouaj sekimej ijkuak kikakij tlen tikintlajtoltiliaj? Yejuan kijtouaj: “Mokaki kualtsin pero amo nikneltoka melauak ijkon mochiuas”.
4. (1) ¿Tlen ome tlamantli yokimatiaya Jehová? (2) ¿San techiluia Jehová tlen kichiuas?
4 Ijkuak Jehová okilui apóstol Juan makijkuilo ken tiyetoskej itech xochitlali, Jehová okimatiaya axkan tikintlapouiskiaj oksekimej tlen ye okijto. Noijki okimatiaya miakej oui kineltokaskiaj tlen yankuik kichiuas (Is. 42:9; 60:2; 2 Cor. 4:3, 4). Pero ¿ken tikinpaleuiskej oksekimej makineltokakan melauak mochiuas tlen kijtoua Apocalipsis 21:3, 4? ¿Tlen techpaleuis okachi matikneltokakan Jehová uan tlen yokijto kichiuas? Jehová techpaleuia matikneltokakan tlen yokijto kichiuas satepan uan amo san techiluia tlen kichiuas. ¿Ken techpaleuia?
JEHOVÁ KIJTOUA MELAUAK MOCHIUAS TLEN YOKIJTO
5. ¿Tlen versículos techpaleuiaj matikneltokakan tlen Jehová kichiuas uan tlen kijtouaj?
5 Versículos tlen nikan katej techpaleuiaj matikneltokakan Jehová melauak kichiuas se xochitlali. Nikan kijtoua: “Akin okatka ipan trono okijto: ‘Ne nochi nikyankuilijtok’. Noijki okijto: ‘Xikijkuilo nin tlajtoli porque melauak uan nochtin uelis kineltokaskej’. Ye onechilui: ‘¡Nin tlajtoli yomochi! Ne niAlfa uan niOmega, ne niachto uan nisaiktlami’” (Apoc. 21:5, 6a).
6. ¿Tleka Apocalipsis 21:5, 6 techpaleuiaj matikneltokakan tlen Jehová yokijto kichiuas?
6 ¿Tleka nonmej versículos techpaleuiaj matikneltokakan tlen Jehová yokijto kichiuas? Amochtli Apocalipsis kiyekijtoua tlen kijtouaj nonmej versículos: “Tlen Jehová kichijtok yetoskia ken kitlalia ifirma ipan se amatl tlen miak ipati uan ijkon kiteititia melauak kichiuas tlen yokijto”.b Apocalipsis 21:3, 4 kijtoua tlen Jehová kichiuas uan itech versículos 5 uan 6 yetoskia ken Jehová kitlalia ifirma ipan tlen ye yokijto uan ijkon kiteititia melauak kichiuas tlen yokijto. Axkan matimomachtikan tlen Jehová okijto para matikneltokakan tlen ye kichiuas.
7. ¿Akin tlajtoua itech versículo 5 uan tleka miak ipati?
7 Kanin peua versículo 5 ijkin kijtoua: “Akin okatka ipan trono okijto” (Apoc. 21:5a). Itech amochtli Apocalipsis Jehová eyi uelta otlajto. Ikinon sapanoua miak ipati tlen kijtoua versículo 5 kanin peua porque tlen ompa kijtoua ye okijto. Ijkon okijto Jehová uan amo okijto se ángel nion amo okijto Jesús. Non techpaleuia okachi matikneltokakan ninmej tlajtolmej. Jehová “amo tlakajkayaua” (Tito 1:2). Ikinon matikneltokakan tlen kijtoua Apocalipsis 21:5, 6.
“NE NOCHI NIKYANKUILIJTOK”
8. ¿Tlen okijto Jehová para kiteititis melauak mochiuas tlen yokijto? (Isaías 46:10).
8 Satepan toTajtsin Dios okijto: “Ne nochi nikyankuilijtok” (Apoc. 21:5). Tlen toTajtsin Dios okijto kijtosneki mochiuas satepan pero ye okijto ken yetoskia yimochijtok porque ye kimatok melauak ijkon mochiuas (xiktlajtolti Isaías 46:10).
9. (1) ¿Tlen timokuayejyekouaj ijkuak tikkakij tlajtoli “ne nochi nikyankuilijtok”? (2) ¿Tlen kinpanos “iluikak” uan “tlaltikpak” tlen axkan katej?
9 Apocalipsis 21:5 kijtoua: “Ne nochi nikyankuilijtok”. Nonmej tlajtolmej techpaleuiaj matimokuayejyekokan ome tlamantli tlen Jehová kichiuas. Ye tlayektlalis uan kipatlas seki tlamantli. Achto tikitaskej tlen kipatlas. Apocalipsis 21:1 kijtoua: “Opojpoliuik iluikak uan tlaltikpak tlen achto okatkaj”. Iluikak tlen achto okatka kijtosneki tekiuajkej tlen kinyekana Satanás uan iejekauan (Mat. 4:8, 9; 1 Juan 5:19). Ijkuak Biblia kijtoua tlaltikpak ualeua kijtosneki akinmej chantij ipan tlaltikpak (Gén. 11:1; Sal. 96:1). Tlaltikpak tlen achto okatka kijtosneki akinmej amo yolkualmej. Non kijtosneki Jehová amo san kiyektlalis iluikak uan tlaltikpak. Ye kinpojpolos uan kitlalis se yankuik “iluikak” uan se yankuik “tlaltikpak”. Non kijtosneki kitlalis se yankuik tekiua uan ye kinnauatis akinmej yolkualmej.
10. ¿Tlen okseki kijtosneki tlajtolmej ijkuak kijtoua Jehová ‘nochi kinyakuilis’?
10 ¿Tlen okseki kijtosneki tlajtolmej ijkuak kijtoua Jehová ‘nochi kinyakuilis’? (Apoc. 21:5). Jehová kiyektlalis tlaltikpak uan techpaleuis ayakmo matiyetokan titlajtlakolejkej. Tlaltikpak yetos se xochitlali ijkon ken okijto profeta Isaías. Kualtsin yetos ijkon ken yiuejkika okatka xochitlali Edén. Tejuan noijki techyankuilis toTajtsin Dios porque kinpajtis akinmej amo ueli nejnemij, akinmej amo tlachiaj uan akinmej amo tlakakij. Noijki kinyolitis akinmej yoixpolikej (Is. 25:8; 35:1-7).
NIN TLAJTOLI “MELAUAK UAN NOCHTIN UELIS KINELTOKASKEJ” UAN “¡NIN TLAJTOLI YOMOCHI!”
11. ¿Tlen okinauati Jehová makichiua Juan uan tleka?
11 ¿Tlen okse tlamantli techpaleuia matikneltokakan? Jehová okilui Juan: “Xikijkuilo nin tlajtoli porque melauak uan nochtin uelis kineltokaskej” (Apoc. 21:5). Jehová noijki okilui Juan tleka omonekiaya kinmijkuilos nonmej tlajtolmej. Okilui: “Porque melauak uan nochtin uelis kineltokaskej”. Non kijtosneki Jehová amo tlakajkayaua uan mochiua tlen kijtoua. Tipakij porque Juan okitlakamatki Jehová ijkuak okinauati makijkuilo tlen okilui. Non techpaleuia matikmatikan toTajtsin Dios kikopas tlaltikpak se xochitlali. Noijki techpaleuia matimokuayejyekokan ken techteochiuas toTajtsin Dios.
12. ¿Tleka Jehová okijto “¡Nin tlajtoli yomochi!”?
12 ¿Tlen okijto Jehová satepan? Ye okijto: “¡Nin tlajtoli yomochi!” (Apoc. 21:6). Tlen Jehová okijto moajsikamati ken yimochiuaskia xochitlali. Ijkon moajsikamati porque amikaj uelis kiluis amo makichiua tlen ye kineki kichiuas. ¿Tlen okijto Jehová satepan para matikneltokakan melauak kichiuas tlen yokijto?
“NE NIALFA UAN NIOMEGA”
13. ¿Tleka Jehová okijto ye ‘Alfa uan Omega’?
13 Yotikitakej Jehová eyi uelta otlajto ijkuak itlaj okinextili Juan (Apoc. 1:8; 21:5, 6; 22:13). Ijkuak ye otlajto okijto: “Ne niAlfa uan niOmega”. Alfa ika peua abecedario griego uan tlami ika omega. Jehová okijto ye Alfa uan Omega porque ye kitlamia tlen kipeualtia.
Jehová kitlamia tlen kipeualtia (Xikinmita párrafos 14 uan 17).
14. (1) Xikijto keman okijto Jehová ‘ye Alfa’ uan keman kijtos ‘ye Omega’. (2) ¿Tlen techiluia Jehová itech Génesis 2:1-3?
14 Ijkuak Jehová okinchijchi Adán uan Eva, ye okinmilui tlen okinekiaya kichiuas nikan tlaltikpak uan ken okinekiaya matiyetokan. Biblia kijtoua: “ToTajtsin Dios okinteochi uan okinmilui: ‘Ximomiaktilikan uan ximochiuakan nanmiakej, xiktemitikan tlaltikpak uan xikmaluikan’” (Gén. 1:28). Ijkuak Jehová okijto tlen okinekiaya kichiuas yetoskia ken okijto ‘ye Alfa’. Ajsis tonal inkoneuan Adán uan Eva tlen ayakmo yetoskej tlajtlakolejkej momiaktiliskej uan kikopaskej se xochitlali tlaltikpak. Ijkuakon Jehová kijtos ‘ye Omega’. Jehová okiteititi melauak mochiuaskia tlen okijto ijkuak otlanki okichijchi iluikak, tlaltikpak uan nochi tlen kipia. ¿Ken okichi? Okijto chikome tonal yetoskia miak ipati (xiktlajtolti Génesis 2:1-3). ¿Tlen kijtosneki tlen okijto? Jehová okitlali non tonal para mamochiua tlen ye okinekiaya ipan tlaltikpak uan para tejuan. Ijkon mochiuaskia nochi tlen okinekiaya ijkuak tlamiskia chikome tonal.
15. ¿Tleka omotaya Jehová ayakmo uelis kichiuaskia tlen omokuayejyekouaya?
15 Adán uan Eva otlajtlakolchijkej ijkuak okixnamikej toTajtsin Dios. Noijki inmixuiuan opejki tlajtlakolchiuaj uan mikij (Rom. 5:12). ToTajtsin Dios okinekiaya nochtin matetlakamatikan uan ayakmo ikaj mayeto tlajtlakole. Pero ¿kijtosneki ayakmo mochiuaskia tlen ye okinekiaya? ¿Satanás kichiuaskia Jehová amo keman makijto ‘ye Omega’? Satanás xamo omokuayejyeko Jehová amo uelis itlaj kichiuaskia. Jehová uelis kinmixpoloskia Adán uan Eva uan kichijchiuaskia okse tlakatl uan siuatl para mochiuaskia tlen ye okinekiaya. Pero tla ijkon kichiuaskia, Diablo uelis kijtoskia Jehová san tlakajkayaua. Porque Génesis 1:28 kijtoua Jehová okinmilui Adán uan Eva inmixuiuan momiaktiliskiaj ipan tlaltikpak.
16. ¿Tleka Satanás uelis kijtoskia Jehová amitlaj ueli kichiua?
16 ¿Tlen okse tlamantli xamo omokuayejyeko Satanás? Xamo omokuayejyeko Jehová kinkauiliskia Adán uan Eva makinpiakan inkoneuan pero nochipa tlajtlakolchiuaskiaj (Ecl. 7:20; Rom. 3:23). Tla ijkon panoskia, Satanás kijtoskia Jehová amo ueli itlaj kichiua. Porque ipan tlaltikpak nochtin tlajtlakolchiuaskiaj uan amo mochiuaskia tlen toTajtsin Dios kineki.
17. ¿Tlen okichi Jehová ijkuak Satanás, Adán uan Eva okixnamikej uan tlen panos? (Noijki xikita dibujo).
17 Satanás amo keman omokuayejyeko Jehová uelis itlaj kichiuaskia para mamochiua tlen ye kineki. Ye tlayektlaliskia maski Satanás, Adán uan Eva okixnamikej (Sal. 92:5). Jehová okiteititi ye amo tlakajkayaua uan nochipa mochiua tlen kijtoua porque okinkauili Adán uan Eva makinpiakan inkoneuan. Noijki okiteititi ye nochi ueli kichiua uan amitlaj uelis kitsakuilis. ¿Ken okichi? Okichi se teixui makinmakixti ixuiuan Adán uan Eva. Ijkon yejuan tetlakamatiskiaj uan mochiuas tlen Jehová kineki (Gén. 3:15; 22:18). Satanás amo keman omokuayejyeko Jehová uelis techtlaxtlauaskia uan ijkon techmakixtiskia. Porque ijkuak otechtlaxtla okiteititi ye melauak techtlasojtla (Mat. 20:28; Juan 3:16). Pero Satanás amo tetlasojtla porque san tlaixneki. ¿Ken techpaleuia Jehová otechtlaxtla? Ijkuak tlamis 1,000 xiuitl inmixuiuan Adán uan Eva tlen tetlakamatiskej uan ayakmo tlajtlakolchiuaskej yetoskej itech se xochitlali ijkon ken Jehová kineki. Ijkuakon Jehová kijtos “niOmega”.
¿TLEN TECHPALEUIS MATIKNELTOKAKAN YETOS SE XOCHITLALI?
18. ¿Tlen eyi tlamantli techpaleuia matikneltokakan tlen Jehová yokijto? (Noijki xikita recuadro “Eyi tlamantli tlen techpaleuia matikneltokakan Jehová kichiuas tlen yokijto”).
18 Axkan otimomachtijkej seki tlamantli tlen techititia melauak yetos se xochitlali tlaltikpak. ¿Tlen uelis tikinmiluiskej oksekimej para tikinpaleuiskej makineltokakan toTajtsin Dios melauak kichiuas tlen yokijto? Achto matikinmiluikan Jehová ye akin okijto tlen kichiuas. Amochtli Apocalipsis kijtoua: “Akin okatka ipan trono okijto: ‘Ne nochi nikyankuilijtok’”. Ye kineki kichiuas tlen yokijto porque ixtlamatki uan kipia chikaualistli para kichiuas. Satepan matikinmiluikan Jehová kimati melauak mochiuas tlen yokijto ikinon ijkuak okijto kichiuas se xochitlali okijto ken yetoskia yomochi. Ye okijto: “Porque melauak uan nochtin uelis kineltokaskej”. Noijki okijto: “¡Nin tlajtoli yomochi!”. Noijki matikinmiluikan Jehová kitlamia ijkuak itlaj kipeualtia. Ikinon iTlajtol kijtoua: “Ne niAlfa uan niOmega”. Jehová kiteititis Satanás san tlakajkayaua uan amitlaj ueli kichiua.
19. ¿Tlen uelis tikchiuaskej tla ikaj amo kineltoka tlaltikpak yetos se xochitlali?
19 Matikilnamikikan okachi tikneltokaj tlen Jehová yokijto ijkuak tikinmiluiaj oksekimej tlen ye kichiuas. Ikinon ¿tlen uelis tikchiuaskej tla ikaj tiktlajtoltiliaj Apocalipsis 21:4 uan techiluia ‘mokaki kualtsin pero amo kineltoka melauak mochiuas’? Uelis tiktlajtoltiliskej uan tikyekiluiskej Apocalipsis 21:5 uan 6. Matikititikan tlen ompa kijtoua kiteititia Jehová melauak kichiuas tlen yokijto uan yetoskia ken yokitlali ifirma (Is. 65:16).
TLAKUIKALI 145 ToTajtsin Dios okijto yetos se xochitlali
a Axkan timomachtiskej Jehová techititia melauak kichiuas se xochitlali ijkon ken ye okijto. Okachi tikneltokaj tlen Jehová yokijto kichiuas ijkuak tikintlapouiaj oksekimej.