Hulda okiko tlen okinekiaya
TLA tiaskia yikanaj keski xiuitl ompa isla Sangir Besar ompa Indonesia, xamo tikinmitaskia eyi tokniuan itempa mar. Itech isla Sangir Besar okinmixmatiayaj porque okinpaleuiayaj oksekimej mamomachtikan Biblia, pero ijkuak okatkaj itempa mar amo otetlapouiayaj. ¿Tlen okichiuayaj?
Isla Sangir Besar tlen kajki ik norte ompa Indonesia
Okalakiayaj ijtik mar uan okintemouayaj uejueyij temej tlen okatkaj ken se pelota. Satepan okinuikayaj itempa mar. Ompa omotlaliayaj uan ika se martillo okinxamaniayaj temej. Satepan okitlaliayaj tetl itech botes uan otlejkouayaj itech escaleras para kinuikaskiaj inchan. Okintlatiayaj temej itech uejueyij bolsas. Satepan seki camiones okinuikayaj nonmej bolsas uan ika non tetl okiyektlaliayaj ojtli.
Hulda kololojtok tetl itempa mar
Se tokni tlen inuan okatka itoka Hulda. Ye okachi otekipanouaya itempa mar. Ijkon okipaleuiaya ifamilia ika tlen okitlaxtlauiayaj. Pero ye okinekiaya kimokouis se tableta para uelis kalakiskia itech JW Library®. Ye okimatiaya kipaleuiskiaj tlen kajki itech JW Library uan videos para okachi kuali tetlapouiskia uan okachi kajsikamatiskia tlen kijtoua Biblia.
Se metstli uan tlajko nochi kualkan Hulda otekipano ome hora. Ye okitemiti se camión tsikitsin ika tetl tlen okixamani. Ijkon okajxiti tomin para kimokouis se tableta.
Hulda kipixtok itableta
Hulda okijto: “Sapanoua onisotlauak porque onikxamani tetl. Pero kuali onimomachili ijkuak yonikpiaya notableta uan okachi kuali onimomachtiaya uan onitetlapouiaya”. Noijki okijto tableta okipaleui ijkuak opejki kokolistli Covid 19. Ijkuakon nochtin tokniuan otetlapouiayaj uan omonechikouayaj ika videoconferencia. Tipakij porque Hulda ueli okiko itableta.