¿Otikmatiaya?
¿Tleka David okinpiaya sekimej soldados tlen amo okatkaj israelitas?
SEKIMEJ isoldados David amo okatkaj israelitas. Zélec okatka ammonita, Urías okatka hitita uan Itmá okatka moabita (1 Crón. 11:39, 41, 46).a Noijki okatkaj soldados keretitas, peletitas uan guititas (2 Sam. 15:18). Xamo keretitas uan peletitas okatkaj infamilia filisteos (Ezeq. 25:16). Guititas opouiayaj ompa altepetl Gad (Jos. 13:2, 3; 1 Sam. 6:17, 18).
¿Tleka David okinpiaya soldados tlen amo okatkaj israelitas? Porque yejuan okatkaj yolkualmej uan amo kikauaskiaj David nion kikauaskiaj Jehová. The New Interpreter’s Dictionary of the Bible kijtoua: “Keretitas uan peletitas amo okikajkej David maski sapanoua otlajyoui ijkuak otlanauatijtoka”. ¿Ken tikmatij ijkon opanok? Soldados tlen okatkaj israelitas okikajkej tekiua David uan okitokakej se tlakatl tlen omotokayotiaya Seba tlen okixnamikiaya tekiua. Pero keretitas uan peletitas okipaleuijkej David makixpolo Seba uan noijki akinmej okipaleuiayaj (2 Sam. 20:1, 2, 7). Se tonal se ikone David tlen omotokayotiaya Adonías okinekiaya ipatka tlanauatis. Pero keretitas uan peletitas oksepa amo okikajkej David uan okipaleuijkej Salomón mamochiua tekiua porque okimatiayaj Jehová okipejpenki matlanauati (1 Rey. 1:24-27, 38, 39).
Okse tlakatl tlen amo okatka israelita uan amo keman okika David omotokayotiaya Ittái uan okatka guitita. Ittái uan 600 isoldados okipaleuijkej David ijkuak Absalón okintlatlanki sekimej israelitas makitlalikan tekiua. David okilui Ittái amo omonekiaya kipaleuis porque amo okatka israelita. Pero Ittái okinankili: “Ijkon ken yoltok Jehová uan te tinotekiua, ne mouan niyetos maski san kanin tiyetos notekiua, maski nimikis noso niyoltos” (2 Sam. 15:6, 18-21).
Ittái nochipa okatka iuan David porque Jehová okipejpenki mayeto tekiua.
Amo okatkaj israelitas keretitas, peletitas uan guititas pero okineltokayaj Jehová melauak toTajtsin Dios. Yejuan okitlakaitayaj David porque okimatiayaj Jehová okipejpenki. David omotlasojkamatki porque isoldados nochipa okipaleuijkej uan amo keman okikajkej.
a ITlanauatil toTajtsin Dios tlen tikajsij itech Deuteronomio 23:3-6 okijtouaya nion se ammonita nion se moabita uelis pouiskia itech itlanechikol Israel. Amo uelis pouiskiaj maski ochantiaya Israel uan amo kipiaskiaj nochi tlen okipiayaj israelitas. Pero uelis mouikaskiaj inuan israelitas uan uelis ompa chantiskiaj. Xikita amochtli Perspicacia para comprender las Escrituras uan xiktemo kanin kijtoua “Ammonitas” uan satepan kanin kijtoua “Se casan con israelitas”.