Sekimej techtlajtlaniaj
¿Akinmej okatkaj “ángeles tlen okinpejpenkej” tlen moijtouaj itech 1 Timoteo 5:21?
Apóstol Pablo akin otlapaleuiaya ken tlayekanki okitlajkuilili Timoteo tlen noijki okatka tlayekanki. Okilui: “Ne nimitsnauatia ixpan toTajtsin Dios, ixpan Cristo Jesús uan inmixpan ángeles tlen okinpejpenkej, xikchiua tlen nimitsnauatia uan nochi tlamantli kuali xikita uan amo xitechikoita” (1 Tim. 5:21). ¿Akinmej okatkaj “ángeles tlen okinpejpenkej”?
Matikitakan akinmej amo uelis yetoskej nonmej ángeles tlen okinpejpenkej. Nonmej ángeles tlen Pablo okijto amo yejuan 144,000. Porque ijkuak Pablo okitlajkuilili Timoteo, ompa iluikak ayamo okinyolitiayaj tlapejpenalmej. Apóstoles uan oksekimej tlapejpenalmej ayamo oyayaj iluikak ikinon amo yejuan okatkaj “ángeles tlen okinpejpenkej” (1 Cor. 15:50-54; 1 Tes. 4:13-17; 1 Juan 3:2).
Noijki amo yejuan ángeles tlen okixnamikej toTajtsin Dios ijkuak otlatenki. Nonmej ángeles omokopkej ejekamej porque okikauilijkej makinyekana Satanás uan okixnamikej Jesús (Gén. 6:2; Luc. 8:30, 31; 2 Ped. 2:4). Satepan Jesús kintsakuas mil xiuitl nonmej ángeles kanin uejkatlan uan satepan kinpojpoloskej iuan Satanás (Jud. 6; Apoc. 20:1-3, 10).
“Ángeles tlen okinpejpenkej”, katej iuan toTajtsin Dios uan Cristo ijkon ken moijtoua itech 1 Timoteo 5:21. Non kijtosneki kinpaleuiaj toTajtsin Dios uan Cristo ompa iluikak.
Katej sapanoua miakej ángeles tlen kitlakamatij toTajtsin Dios (Heb. 12:22, 23). Amo matimokuayejyekokan Jehová kinnauatia ángeles makichiuakan san se tekitl (Apoc. 14:17, 18). Matikilnamikikan Jehová okinauati san se ángel makinmiktiti ciento ochenta y cinco mil soldados asirios (2 Rey. 19:35). Noijki Jesús okijto san sekimej ángeles “kikixtiskej itech iTekiuajkayo nochi tlamantli tlen kichiua matlajtlakolchiuakan. Noijki kinkixtiskej akinmej amo kitlakamatij tlanauatil” (Mat. 13:39-41). Xamo oksekimej ángeles “kinnechikoskej tlapejpenalmej” tlen yaskej iluikak (Mat. 24:31). Noijki oksekimej ángeles kinmiluiaj matechmaluikan para amitlaj matechpano ijkon ken kijtoua Salmo 91:11 (Mat. 18:10; noijki xikita Mateo 4:11 uan Lucas 22:43).
Ijkon ken yotikitakej xamo “ángeles tlen okinpejpenkej” uan moijtouaj itech 1 Timoteo 5:21, okinpaleuiayaj tokniuan tlen omonechikouayaj. Achto versículos Pablo okintlapoui tlayekankej uan tokniuan okinmilui makintlakaitakan nonmej tlayekankej. Noijki okinmilui tlayekankej ijkuak kichiuaskiaj inteki nochi kuali makitakan, amo matechikoitakan uan kuali mamokuayejyekokan ijkuak itlaj kichiuaskej. ¿Tleka Pablo ijkon okinmilui? Ijkon okinmilui makichiuakan porque kinpaleuiaj tokniuan “ixpan toTajtsin Dios, ixpan Cristo Jesús uan inmixpan ángeles tlen okinpejpenkej”. Non kijtosneki Jehová, Jesús uan “ángeles tlen okinpejpenkej” kitaj ken tlayekankej kinmaluia tokniuan. Ikinon uelis tikijtoskej sekimej ángeles kinpaleuiaj tokniuan ijkuak kinmaluiaj, ijkuak kitaj ken titetlapouiaj uan ijkuak kiluiaj Jehová nochi tlen kitaj (Mat. 18:10; Apoc. 14:6).