¿Techkaki toTajtsin Dios ijkuak tiktlatlaujtiaj?

Biblia technankilia

Ye techkaki. Techkaki ijkuak tiktlatlaujtiaj ika nochi toyolo uan tla amo kixnamiki tlen ye kineki. Biblia kijtoua sekimej okiluijkej toTajtsin Dios makinpaleui. Matikitakan akinmej ijkon okichijkej uan non techpaleuis matiktlatlaujtikan toTajtsin Dios maski amo keman ijkon otikchiuayaj:

• “Techmakixti porque techtlasojtla uan amo keman techkaua” (Salmo 109:26).

• “Pero ne amo ueli nimopaleuia uan amitlaj nikpia. NoTajtsin Dios san niman techpaleui” (Salmo 70:5).

Akin okinmijkuilo ninmej versículos sapanoua okineltokaya toTajtsin Dios. Pero ¿tla amo okachi titlaneltokaj? ToTajtsin Dios kinkaki akinmej kitlatlaujtiaj ika nochi inyolo. Biblia kijtoua toTajtsin Dios kinkaki akinmej “moyolkokouaj” uan akinmej “yolpatlachitokej” nin kijtosneki akinmej sapanoua tlajyouiaj (Salmo 34:18).

Xamo ualeua timokuayejyekouaj toTajtsin Dios uejka kajki uan amo kitekipachoua tlen techpanoua. Pero Biblia kijtoua: “Maski Jehová ueyititok kita akin yolyamanki pero akin moueyineki san uejka kita” (Salmo 138:6). Jesús okinmilui idiscípulos: “Dios kuali kimatok kech tsónkali nonkipiah itech nomotsonteko” (Mateo 10:30). ToTajtsin Dios kimati keski totsonkal tikpiaj maski tejuan amo tikmatij. Non kijtosneki techkaki ijkuak tikiluiaj tlen techtekipachoua (1 Pedro 5:7).