3 Ma motlakaitakan

¿TLEN MONEKI KICHIUASKEJ?

Ijkuak akinmej yomonamiktijkej motlakaitaj, kichiuaj tlen moneki para kuali ma momachili innamik uan noijki ijkuak kipiaj se ouijkayotl. Amochtli Diez claves para transformar tu matrimonio kijtoua: “Akinmej motlakaitaj amo moueyinekij uan kijtouaj tlen kintekipachoua. Kikakij innamik ijkuak kinmiluia tlen mokuayejyekoua uan kitaj tlen uelis kinpaleuis”.

PRINCIPIO BÍBLICO: “Akin tetlasojtla [...] amo [...] kitemoa san tlan ye kipaktia” (1 Corintios 13:4, 5).

Tlakatl tlen itoka Micah okijto: “Nikpatioita nosiua uan amo nikyolkokoua, ijkon nikteititia niktlakaita. Noijki nikita tlen techpaleuis kuali timouikaskej”.

¿TLEKA MIAK IPATI?

Tla akinmej yomonamiktijkej amo motlakaitaj, san kijtoskej tlen amo kuali kichiua innamik uan moyolkokoskej. Ixtlamatkej kijtouaj tla ijkon kichiuaj, xamo moxeloskej.

Se tlakatl tlen itoka Brian okijto: “Tla tikteneua uan tikpinauia mosiua, kimachilis amitlaj ipati uan ayakmo mitsiluis tlen kitekipachoua”.

¿TLEN UELIS TIKCHIUAS?

XIMOKUAYEJYEKO

Ximokuayejyeko tlen otimotlapoui iuan monamik nin semana. Satepan xikinnankili ninmej tlajtlanilmej:

• ¿Keski uelta oniktene uan keski uelta onikyolchika?

• ¿Ken onikteititi niktlakaita?

XIMOTLAPOUI IUAN MONAMIK

• ¿Ken tikteititiaj timotlakaitaj?

• ¿Ken tikteititiaj amo timotlakaitaj?

NIN UELIS TIKCHIUAS

• Xikijkuilo eyi tlamantli tlen mitspaktiskia ma kichiua nonamik para kiteititis mitstlakaita. Xikmopatilikan amatl tlen onankijkuilojkej uan ximochijchikauakan xikchiuakan tlen ompa kijtoua.

• Xikijkuilo tleka mitspaktia iyelis nonamik uan xikilui tleka tikpatioita.

Se siuatl tlen itoka Megan okijto: “Nikteititia niktlakaita nonamik ijkuak nikpatioita uan nikchiua tlen kiyolpaktia. Tla ikaj tiktlakaita, amo moneki tikchiuas miak tlamantli uan amo moneki nochipa ma kitakan oksekimej”.

Amo san moneki tikijtos titetlakaita, moneki nonamik ma kita melauak tiktlakaita.

PRINCIPIO BÍBLICO: “Ximokemelokah ika nochi tlan nomechpalewis iwa xiteiknomatikah, xiktechiwilikah tlan kuali, ximotsikitsintilikah, xiyetokah nonyolyamankeh iwa xitexikokah” (Colosenses 3:12).