¿Tleka tecnología uelis kichiuas ayakmo kuali ximouika iuan monamik?
Akinmej yomonamiktijkej uelis kinpaleuis tecnología para motlapouijtoskej ijkuak amo san sekan yetoskej.
Pero tla nochipa san kitaj incelular, tableta noso computadora:
Ayakmo motlapouiskej.
Tekipanojtoskej inkalijtik maski amo moneki.
Uelis kikajkayauaskej inamik noso isiua.
MONEKI TIKMATIS
XIMOTLAPOUIKAN
Se tlakatl tlen itoka Michael okijto: “Ijkuak nika iuan nosiua, ualeua kichiua ken amo iuan nika porque san kita icelular uan nechiluia: ‘Techtlapojpolui, yikin axkan nimajxilia nikinmitas mensajes’”. Okse tlakatl tlen itoka Jonathan okijto: “Xamo san sekan uelis tiyetoskej pero mota ken uejka tikatej porque amo timotlapouiaj”.
XIMOKUAYEJYEKO: ¿Amo nimotlapouia iuan nonamik porque san nikinmita mensajes noso porque ikaj iuan nimotlapouia ika teléfono? (EFESIOS 5:33).
TEKITL
Sekimej kanin tekipanouaj san tlen hora kinnotsaj. Oksekimej xamo amo tekipanouaj miak horas pero ijkuak ajsitiuij inkalijtik, ok mokuayejyekojtokej tlen tekitl kipiaj. Se tlakatl tlen itoka Lee okijto: “Nechchiuilia oui amo nikitas nocelular ijkuak nika iuan nosiua”. Se siuatl tlen itoka Joy okijto: “Nitekipanoua nikan nokalijtik, ik non, oui nikita ayakmo nitekipanos, ik non, moneki nimochijchikauas para nikchiuas tlen moneki”.
XIMOKUAYEJYEKO: ¿Tikkaki mosiua noso nonamik ijkuak mitstlapouijtok? (LUCAS 8:18).
MOKAJKAYAUAJ
Sekimej okintlajtlanijkej uan okitakej miakej akinmej yomonamiktijkej ualeua mokualaniaj porque amo kinpaktia tlen kitlalia innamik itech redes sociales. Sekimej okijtojkej okitlalijkej seki tlamantli itech redes sociales pero innamik noso insiua amo okimatki.
Redes sociales kichiua ayakmo kuali ma mouikakan akinmej yomonamiktijkej uan ualeua mokajkayauaj. Ik non, sekimej abogados tlen kinpaleuiaj ma moxelokan inmixpan tekiuajkej, kijtouaj moxelouaj porque moouijtiliaj ika redes sociales.
XIMOKUAYEJYEKO: ¿Amo tikneki monamik ma kita akin iuan timotlapouia? (PROVERBIOS 4:23).
¿TLEN UELIS TIKCHIUAS?
XIKITA TLEN MONEKI TIKCHIUAS
Ijkuak ikaj amo kuali tlakua, mokokoua. Noijki ijkon tla akinmej yomonamiktijkej amo motlapouiaj, ayakmo kuali mouikaskej (Efesios 5:28, 29).
PRINCIPIO BÍBLICO ‘Xikpejpenakah tlan okachi kualiʼ (FILIPENSES 1:10).
Xikitakan tlen uelis nankichiuaskej noso xikijkuilokan tlen uelis namechpaleuis.
Maski san se uelta itech se tonal san sekan xitlakuakan.
Amo san nochipa xikitakan namocelular noso namotableta.
Xikitakan ken uelis san sekan nanyetoskej noso ken nankichiuaskej itlaj tlen namechpaktia.
Ijkuak yiyouak xikseuikan namocelular noso namotableta uan xikintlalikan kanin amo uelis nankitaskej.
Maski san kanaj 15 minutos ximotlapouikan pero amo xikitakan namocelular noso namotableta.
Xikijtokan keski horas nanyetoskej itech internet.