¿Tlen kijtosneki timotekipachouaj?

Sapanoua timotekipachouaj ijkuak tikixnamikij ouijkayotl. Tokuatitix kichiua ma kinpia miakej hormonas totlalnakayo. Ik non, okachi totoka tiyoltikuinij, tlejko topresión noso temoua, ayakmo kuali tekitij topulmones uan ualeua tisejsepouij. Tejuan amo tikmatij tlen techpanoua pero totlalnakayo yikimati timotekipachouaj. Ijkuak ayakmo timotekipachouaj, ayakmo itlaj kipanoua totlalnakayo uan san kuali kajki.

TECHPALEUIA TLA SAN TEPITSIN TIMOTEKIPACHOUAJ PERO AMO KUALI TLA SAPANOUA TIMOTEKIPACHOUAJ

Totlalnakayo itlaj kichiua ijkuak timotekipachouaj porque ijkon otechchijchijkej, ik non, ueli tikixnamikij ouijkayotl uan okseki tlamantli temomojti. Nochi non tlamantli kichiua tokuatitix. San niman itlaj tikchiuaj ijkuak timotekipachouaj. Ijkuak tepitsin timotekipachouaj techpaleuia ma tikchiuakan tlen tiknekij uan kuali ma tikchiuakan. Techpaleuia ijkuak tikchiuaj examen, ijkuak tiktemouaj tekitl noso ijkuak timauiltiaj.

Pero uelis timokokoskej tla nochipa timotekipachoskej. Uelis timoyolkokoskej uan ayakmo kuali timokuayejyekoskej. Noijki xamo tikpatlaskej toyelis uan ayakmo kuali timouikaskej iuan oksekimej. Ijkuak ikaj sapanoua motekipachoua, xamo konis itlaj tlen amo kipaleuis. Xamo moyolkokos, sotlauas noso kinekis momiktis.

Amo nochtin san se tlamantli kinpanoua ijkuak motekipachouaj. Sekimej kinkitskia se kokolistli uan oksekimej itlaj kipanoua intlalnakayo.