Tlen toTajtsin Dios techmachtia techpaleuia ma tikneltokakan tlen kichiuas

ToTajtsin Dios kinmixpolos akinmej amo yolkualmej

“Ijkuak amo yolkualmej pankisaj ken xiuitl tlen amo kuali uan nochtin tlen kichiuaj tlen amo kuali momiaktiliaj, ijkuakon yejuan sepa kinmixpoloskej” (SALMO 92:7).

Itech okse tlamachtil otikitakej axkan miakej kichiuaj tlen amo kuali. Pero tejuan ayakmo techtlajtlachialtia porque itech Biblia kijtoua ijkon panoskia. Itech 2 Timoteo 3:1-5 kijtoua itlamian tonalmej miakej kichiuaskej tlen amo kuali. Pero ¿tleka tikijtouaj itlamian tonalmej? Porque ayakmo miak poliui uan ayakmo yetoskej akinmej amo kitlakaitaj toTajtsin Dios. Kinmixpolos akinmej kichiuaj tlen amo kuali. Ijkuakon san chantiskej nikan tlaltikpak akinmej kitlakamatij. Ijkon kijtoua Salmo 37:29: “Yolmelauakej yetoskej tlaltikpak uan nochipa itech chantiskej”.

ToTajtsin Dios kixpolos Satanás

“Dios non teyolsewia, san nima kitlajtlaksas n satanás” (ROMANOS 16:20).

Ijkuak ayakmo yetos Satanás, amo kuali ejekamej uan akinmej amo yolkualmej, nochtin akinmej nikan chantiskej kipiaskej yolseuilistli. ToTajtsin Dios techiluia amikaj techmomojtis (Miqueas 4:4).

ToTajtsin Dios kitlajtlamis kokolistli uan mikilistli

“Xikita, axa Dios yochanchiwato iwa n tlakah [...]. Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli nion tekipanólistli” (APOCALIPSIS 21:3, 4).

ToTajtsin Dios kipojpolos nochi tlen Satanás, Adán uan Eva okichijkej ma titlajyouikan. Pero ayakmo ijkon techpanos, amo timokokoskej nion timikiskej. Akinmej kitlasojtlaskej uan kitlakamatiskej toTajtsin Dios nochipa yoltoskej. Pero ¿kanin chantiskej?

ToTajtsin Dios kichiuas tlaltikpak ma yeto se xochitlali

“Kualtsin yetos kanin tlauaki uan kualtsin tlaxochitis kanin tlakuauak tlali” (ISAÍAS 35:1).

Ijkuak toTajtsin Dios kitlajtlamis tlen amo kuali, tlaltikpak yetos se xochitlali. Kitokaskej miak kuajmej uan xochitl itech nochi tlaltikpak uan tikpiaskej miak tlamantli tlen tikkuaskej (Salmo 72:16). Nochi kanin onka atl chipauak yetos. Uan xamo hasta ayakmo tikijtoskej tlasokio. Nochtin kichijchiuaskej inkal, kipiaskej tlen moneki, tlen kikuaskej uan kanin chantiskej (Isaías 65:21, 22).

ToTajtsin Dios kinyolitis akinmej yoixpolikej

“Nochteh non yomikkeh moyolitiskeh” (HECHOS 24:15).

¿Mitspaktiskia oksepa tikinmitas akinmej tikintlasojtla uan moyolikniuan tlen oixpolikej? Ijkuak tlaltikpak yetos se xochitlali toTajtsin Dios kinyolitis. ¡Sapanoua nanyolpakiskej ijkuak inmiuan nanmotaskej! Biblia kijtoua toTajtsin Dios yiuejkika okinyoliti konemej, tlakamej uan siuamej uan miakej okitakej ijkuak ijkon opanok. Uan Jesús sekimej okinyoliti uan miakej okitakej (Lucas 8:49-56; Juan 11:11-14, 38-44).