TLAPOUALISTLI 44
Rahab okintlati akinmej ichtaka otlachiatoj
NINMEJ tlakamej kipiaj se ouijkayotl. Moneki choloskej, pampa amo ma kinmiktikan. Yejuan israelitas tlen ichtaka otlachiatoj, uan siuatl akin kinpaleuia itoka Rahab. Rahab chanti ipan se kali tlen kajki ipan itepamitl altepetl Jericó. Ma tikitakan ken opanok nin.
Israelitas yipanoskiaj aueyatl Jordán uan kalakiskiaj itech Canaán. Maski ijkon, achto, Josué okintitlanki ome tlakamej tlen ichtaka otlachiatoj. Okinmilui: ‘Xiakan uan xikitakan tlali uan altepetl Jericó’.
Ijkuak tlakamej tlen ichtaka otlachiatoj okalakej Jericó, oyajkej ikalijtik Rahab. Maski ijkon, akaj okimatilti ueyi tekiua itech Jericó: ‘Yala yoak oualajkej ome israelitas tlen ichtaka otlachiakoj’. Ijkuak ueyi tekiua okikak nin, okintitlanki sekimej tlakamej ma kitatij Rahab, uan okiluijkej: ‘¡Xikinkixti tlakamej tlen katej itech mokalijtik!’. Maski ijkon, Rahab okintlati ninmej tlakamej tlakpak ipan ikalijtik. Ik non, okijto: ‘Sekimej tlakamej oualajkej nokalijtik, uan amo nikmati itech kanin oualajkej. Oyajkej ijkuak opejki tlayoa, achto kitsakuaskiaj ikaltlatsakuil altepetl. ¡Tla nanmotlaloskej, nankinmajsiskej!’. Uan tlakamej omotlalojkej pampa okintemotoj.
Ijkuak oyajkej, Rahab san niman oyajki kanin okatka tlakamej. Uan okinmilui: ‘Ne nikmati Jehová namechmakas nin tlali. Otikakej Jehová okiuatski ueyi atl Rojo ijkuak onankiskej Egipto, uan noijki namejuan onankinmiktijkej ueyi tekiuajkej Sehón uan Og. Ken ne onamechchiuili tlen kuali, xinechmakakan namotlajtol, namechtlatlaujtia, moneki nechchiuiliskej tlen kuali. Xikmakixtikan notajtsin, nonantsin uan nokniuan’.
Akinmej ichtaka otlachiatoj okiluijkej ijkon kichiuaskiaj, maski ijkon, Rahab omonekiaya kichiuas itlaj. Okiluijkej: ‘Xikilpi itech moventana nin mekatl chichiltik, uan xikinnechiko nochtin mochanejkauan mokalijtik. Uan ijkuak nochtin tejuan tiualmokuepaskej pampa tikmoaxkatiskej Jericó uan tikitaskej nin mekatl itech moventana, amo akaj tlen yetos itech mokalijtik tikmiktiskej’. Ijkuak akinmej ichtaka otlachiatoj omokuepkej inauak Josué, okimatiltijkej nochi tlen opanok.