Israel kimoaxkatia Canaán

MIAK xiuitl achto kalakiskia Israel itech Canaán, Jehová okiluijka Abrahán kinmakaskia non tlali nochtin ixuiuan. Uan axkan, ika itlayekanalis Josué, israelitas kalakiskiaj pampa kimoaxkatiskiaj Tlali tlen okinmiluijkej Kinmakaskiaj.

ToTajtsin Dios omokuayejyeko kintlajtlamis cananeos, pampa okichiuayaj tlamantli tlen amo kuali uan sapanoa auilnemiaj. Ik non, okinnauati israelitas ma kixpolokan nochtin altepemej tlen okatka itech Canaán.

Achto ompa kalakiskiaj, Josué okintitlanki ome tlakamej tlen ichtaka otlachiatoj itech altepetl. Yejuan okalakej itech altepetl Jericó uan omokauatoj ichan se siuatl tlen itoka katka Rahab. Maski ye kimatia ke nin tlakamej okatkaj israelitas, okika ompa ma motlatikan. ¿Tleka? Pampa okikak itech milagros tlen Jehová okichi pampa okimakixti ialtepetl uan axkan otlaneltokaya itech. Rahab okinchiualti tlakamej tlen okinpaleui ma kijtokan ke nion ye uan nion ichanejkauan mikiskiaj ijkuak kixpoloskiaj ialtepetl.

Satepan, israelitas okalakej Canaán uan omoteuijkej iuan tlakamej tlen chantiaj Jericó. Jehová okichi in tepamitl ma uetsi, uan soldados israelitas okitlajtlamijkej altepetl, uan san Rahab uan ichanejkauan omakiskej. Ijkon opejki miak tlachiualismej tlen ouejka chikuasen xiuitl, ijkuak Josué uan isoldados okimoaxkatijkej miakej altepemej tlen okatka itech Tlali tlen okinmiluijkej Kinmakaskiaj. Satepan, okimoxejxelilijkej tlali tlen okimoaxkatijkej itech ichanejkauan Israel.

Se tonal, ijkuak yitlamia iteki tlen okimakaya toTajtsin Dios, Josué okinechiko nochi altepetl. Okinmilnamikti ken okinpaleui toTajtsin Dios inkojkoluan uan okinyolchika ma yetokan yolmelajkej. Maski ijkon, ijkuak omiki Josué uan akinmej okipaleuiayaj, israelitas omoxelojkej inauak Jehová uan opejki kinueyichiuaj teotsitsintin. Ipan 300 xiuitl ik tlayekapan, miekpa amo okitlakamatkej itlanauatiluan toTajtsin Dios. Uan ijkuak ijkon kichiuayaj, Jehová okintemaktiliaya innauak filisteos uan oksekimej tlen okinkualankaitayaj. Uan nochipa ijkuak kitlajtlaniliayaj ma kinpaleui, okitlaliaya se temakixtiani. Okatkayaj 12 nin temakixtijkej, tlen okintokayotijkej jueces.

Amochtli tlen tlajtoa itech non tonalmej, peua ika tlen okipanok juez Otniel uan tlami ika tlen okipanok tlakatl tlen okatka okachi chikauak itech nochi tonalmej: juez Sansón. Amochtli Jueces technextilia tlen opanok uan noijki techkauilia se tlamachtil tlen miak ipati: tla tiktlakamatij Jehová ye techteochiuas uan tla amo, titlajyouiskej.

(Okisak itech Josué, Jueces uan Levítico 18:24, 25.)