TLAPOUALISTLI 70

Jonás uan ueyi michin

XIKITA tlakatl tlen kajki itech atl. Tlajyouijtok miak, ¿amo melauak? ¡Nin ueyi michin kitolos! ¿Tikmati akin nin tlakatl? Itoka Jonás. Ma tikitakan ken opejki kipia miak ouijkayotl.

Jonás okatka iteotlajtojki Jehová. Satepan omikik Eliseo, Jehová okilui Jonás: ‘Xio itech ueyi altepetl Nínive. Xikintlapouiti tlaltikpaktlakamej itech tlen sapanoa amo kuali kichijtokej’.

Maski ijkon, Jonás amo okinekiaya yas. Ik non, otlejkok itech se barco tlen amo oyaya Nínive. Jehová amo okipakti ma cholo Jonás. Ik non, okichi chikauak ma ejeka uan ma kiaui. Pampa chikauak oejekaya uan okiauia, barco uelis apolakiskia. Akinmej otekitiayaj itech barco omomojtijkej miak, uan okintsajtsilijkej inteotsitsintin ma kinpaleuikan.

Saiktlami, Jonás okinmilui: ‘Nikueyichiua Jehová, Dios akin okichijchi iluikak uan Tlaltikpak. Uan nicholojtok pampa amo nikneki nikchiuas tlen Jehová onechilui’. Ik non, akinmej otekitiayaj itech barco okitlajtlanijkej: ‘¿Tlen moneki timitschiuiliskej pampa ayakmo ejekas nion kiuauis?’.

Jonás okijto: ‘Xinechtlamotlakan itech atl, uan atl ayakmo molinis’. Akinmej otekitiayaj itech barco amo okinekiayaj ijkon kichiuaskej, maski ijkon, ijkuak okachi chikauak oejekaya uan okiauia, okitlamotlakej Jonás ijtik atl. San niman, ejekatl uan kiauitl omoketski, uan atl ayakmo omoliniaya.

Ijkuak Jonás oapolakiaya, se ueyi michin okitolo. Maski ijkon, ye amo omikik. Itech eyi tonalmej uan eyi yoak okatka ijtik ueyi michin. Jonás omoyolkoko miak pampa amo okitlakamatki Jehová uan amo oyajki Nínive. Ik non, ¿tikmati tlen okichi?

Jonás okitlatlaujti Jehová ma kipaleui. Ijkuakon, Jehová okichi ueyi michin ma kitlakuepa Jonás ipan tlali kanin uaki. Satepan, Jonás oyajki Nínive. ¿Amo techmachtia nin kipia miak ipati tikchiuaskej nochi tlen Jehová techiluia?

Jonás 1 a 4.