Jehová amo okualanki iuan Jonás

Itech Asiria okatka se altepetl tlen omotokayotiaya Nínive, ompa nochtin sapanoa otlajtlakolchiuayaj. Jehová okititlanki teotlajtojki Jonás ma uia Nínive uan ma kinmiluiti akinmej ompa ochantiayaj ma kipatlakan inyelis. Pero Jonás amo oyajki Nínive, ye otlejkok ipan se barco tlen oyaya altepetl Tarsis.

Ijkuak barco okatka itech ueyi atl, chikauak oejekakiauik uan akinmej ompa oyayaj sapanoa omomojtijkej. Okintlatlaujtijkej indioses uan omotlajtlaniayaj: “¿Tleka ijkon techpanotok?”. Jonás okinmilui: “Notlajtlakol. Nicholojtok para amo nikchiuas tlen Jehová onechnauati. Xinechtlamotlakan ijtik atl uan ijkon moketsas ejekakiauitl”. Akinmej oyayaj itech barco amo okinekiayaj kitlamotlaskej ijtik atl, pero Jonás oksepa okinmilui ma kichiuakan. Ik non, okitlamotlakej ijtik atl uan ejekakiauitl omoketski.

Jonás omokuayejyeko mikiskia. Okitlatlaujti Jehová ijkuak oapolaktoka. Ijkuakon, Jehová okititlanki se ueyi michin tlen okitolo Jonás, pero amo okimikti. Jonás okilui Jehová ijkuak okatka ijtik michin: “Nochipa nimitstlakamatis”. Jehová okichi Jonás ma yeto ijtik michin eyi tonal uan satepan nin michin okikixti itech tlali.

Jehová okimakixti Jonás, ¿nin kijtosneki ayakmo yaskia Nínive? Amo. Jehová oksepa okititlanki uan Jonás okitlakamatki. Oyajki Nínive uan okinmilui akinmej amo yolkualmej: “Jehová kipojpolos nin altepetl ijkuak panos 40 tonalmej”. Pero opanok itlaj tlen Jonás amo okichiaya. Ninivitas omoyolkuepkej uan okipatlakej inyelis. Ueyi tekiua itech Nínive okinmilui akinmej ochantiayaj ialtepe: “Xiktlatlaujtikan toTajtsin Dios uan ximoyolkuepakan, xamo ijkon ayakmo techixpolos”. Jehová okitak ninivitas omoyolkuepkej, ik non, ayakmo okinmixpolo.

Jonás okualanki porque Jehová amo okipojpolo Nínive. Ximokuayejyeko nin tlamantli: Jehová amo okualanki iuan Jonás uan okiknomatki. Pero Jonás amo okinmiknomatki akinmej ochantiayaj Nínive. Ye okualantoka, okiski itech altepetl uan omotlalito itlampa se ayojkilitl. Satepan, ayojkilitl ouaki uan Jonás okachi okualanki. Ik non, Jehová okilui: “Okachi tikpatioita ayojkilitl uan amo akinmej chantij Nínive. Ne onikinmiknomatki uan omomakixtijkej”. ¿Tlen okinekiaya Jehová ma kajsikamati Jonás? Okinekiaya ma kajsikamati akinmej ochantiayaj Nínive okachi okipiayaj inpati amo ken xiuitl.