TLAPOUALISTLI 97
Jesús okalak ken ueyi Tekiua
SATEPAN okinpajti ninmej ome tlakamej tlen amo otlachiayaj, Jesús oajsito itech se altepetl tlen amo uejka okatka itech Jerusalén. Okinmilui ome imachtijkauan: ‘Xikalakikan itech altepetl uan nankajsiskej se burrojkonetl. Xiktotomakan uan xinechualikilikan’.
Ijkuak okiualikilijkej burrojkonetl, Jesús omotlali ipan. Uan oyajki Jerusalén tlen amo uejka okatka. Ijkuak yoajsitoka Jerusalén, miakej tlaltikpaktlakamej okinamikito. Miakej tlaltikpaktlakamej okimokixtilijkej intlaken uan okitlalijkej ipan ojtli. Oksekimej okitekej uan okitlalijkej ixijyo soyatl, uan okijtojkej: ‘¡ToTajtsin Dios ma kiteochiua ueyi tekiua tlen axan kalaki ika itoka Jehová!’.
Yiuejkika, itech Israel akinmej yikin okintlaliayaj ken ueyi tekiuajkej, okalakiayaj Jerusalén ipan se burro pampa nochtin kinmitaskiaj. Uan Jesús noijki ijkon okichi. Uan ninmej tlaltikpaktlakamej okiteititijkej okinekiayaj Jesús ma yeto inueyi tekiua. Maski ijkon, amo nochtin okinekiayaj. ¿Tikmati tleka? Ma tikitakan tlen opanok ijkuak Jesús oyajki itech teokali.
Itech teokali, Jesús okinpajti akinmej amo otlachiayaj uan koxomej. Ijkuak chokotsitsintin okitakej nin, okiueyichijkej Jesús. Maski ijkon, teopixkamej okualankej, uan okiluijkej Jesús: ‘¿Tikaki tlen kijtojtokej chokotsitsintin?’.
Jesús okijto: ‘Kema. ¿Amo keman onankitlajtoltijkej itech Biblia kanin kijtoa: “ToTajtsin Dios kichiuas chokotsitsintin ma kiueyichiuakan”?’. Ik non, chokotsitsintin ok okiueyichiuayaj ueyi tekiua akin toTajtsin Dios okitemakak.
Tejuan tiknekij tikchiuaskej ken nonmej chokotsitsintin, ¿amo melauak? Uelis sekimej tlaltikpaktlakamej kinekiskej ayakmo ma titlajtokan itech itekiuajkayo toTajtsin Dios. Maski ijkon, tejuan ok tikintlapouiskej nochtin itech nochi tlamantli kuajkualtsin tlen Jesús kichiuas pampa tlaltikpaktlakamej.
Ijkuak Jesús okatka itech Tlaltikpak, ayamo oajsiaya tonal pampa ye tlanauatiskia. ¿Keman peuas tlanauatis? Imachtijkauan okinekiayaj kimatiskej. Axkan ma timomachtikan itech non.