TLAPOUALISTLI 42

Se burra otlajto

¿YOTIKAK se burra ma tlajto? ‘Amo’, tikijtos. ‘Yolkamej amo uelij tlajtoaj’. Maski ijkon, Biblia kijtoa se burra otlajto. Ma tikitakan ken opanok nin.

Israelitas yikalakiskiaj itech tlali Canaán. Balac, ueyi tekiua itech Moab, okinmakajsiaya israelitas. Ik non, otlatitlanki ma kitemokan se tlakatl tlen tlamati tlen omotokayotiaya Balaam pampa yaskia uan kinuijuikaltiskia israelitas. Balac okilui Balaam kimakaskia miak tomin, ik non, Balaam otlejkok ipan iburra uan okitato Balac.

Jehová amo okinekiaya Balaam ma kiuijuikalti Ialtepetl. Ik non, okititlanki se ángel ika se espada ueyak pampa yetoskia ipan ojtli uan ijkon kitsakuiliskia Balaam. Balaam amo ueli okitak ángel, maski ijkon, iburra kema okitak. Ik non, burra amo okinekiaya panos kanin okatka ángel uan saiktlami, omotekak ipan ojtli. Balaam okualanki miak, uan okiuitek burra ika se kuauitl.

Ijkuakon, Jehová okichi Balaam ma kikaki ken otlajto iburra. Burra okitlajtlani: ‘¿Tlen onimitschiuili pampa tinechuiteki?’.

‘Yotinechpinati’, okijto Balaam. ‘¡Tla nikpiaskia se espada nimitsmiktiskia!’.

Burra okitlajtlani: ‘¿Achto ijkon yonimitschiuili?’.

‘Amo’, okinankili Balaam.

Ijkuakon, Jehová okichi Balaam ma kita ángel tlen okatka ipan ojtli ika iespada. Ángel okijto: ‘¿Tleka otikuitek moburra? Oniuala pampa nimitstsakuilis ipan ojtli, pampa amo tikuijuikaltis Israel. Tla moburra amo moketsaskia, ne nimitsmiktiskia, uan moburra amo itlaj nikchiuiliskia’.

Balaam okijto: ‘Yonitlajtlako. Amo nikmatia kox otikatka itech ojtli’. Ángel okika Balaam ma uia, uan Balaam oyajki okitato Balac. Ok okinekiaya kiuijuikaltis Israel, maski ijkon, Jehová okichi ma kiteochiua Israel eyijpa.

Números 21:21-35; 22:1-40; 23:1-30; 24:1-25.